Shehi: Qeveria dhe ka gabuar
Gjinushi: Era e fitores, majtas

TIRANE - Sonte në emisionin "A1Report!", drejtoresha e "Shqiptarja.com", Anila Basha ka pritur në studio kryetarin e PSD-së, Skënder Gjinushin dhe kryetarin e LZHK-së, Dashamir Shehin. Tema e diskutimit ishte fushata elektorale dhe partitë e vogla përballë partive të mëdha. Gjinushi tha se "krahas një dështimi total të kësaj qeverie, nisur edhe nga fakti që rezultati i 2009 është shumë i ngushtë madje është barazim dhe me votë popullore është tashmë në favor të së majtës, atëherë çdo prirje pozitive çon në fitore të sigurt në zgjedhjet e 23 qershorit" ndërsa Shehi vuri në dukje se "nuk shoh ndonjë motiv rilindës që të prodhojë një frymë të tillë të rrëzojë këtë maxhorancë".

Basha: Z. Gjinushi duket sikur era e këtyre zgjedhjeve, qoftë nëpërmjet asaj që perceptohet por edhe nëpërmjet sondazheve është majtas. Ka sens kjo?

Gjinushi: Kjo është prirje normale në çdo demokraci, aq më tepër në kushtet e shqipërisë ku ne vlerësojmë që në këto 8 vjet veçanërisht 4 vitet e fundit janë një dështim total në të gjithë sektorët, në planin ekonomik, në integrimin e vendit, pavarësinë e gjyqësorit, luftën ndaj krimit. Gjithë faktorët janë të tillë që shumica e qytetarëve kërkojnë ndryshim dhe ndryshimi kërkohet gjithmonë nëpërmjet opozitës. Nisur edhe nga fakti që rezultati i 2009 është shumë i ngushtë madje është barazim dhe me votë popullore është tashmë në favor të së majtës atëherë çdo prirje pozitive çon në fitore të sigurt në zgjedhjet e 23 qershorit. Dhe jo më që sondazhet japin diferencë të dukshme. Nuk duhet besuar te sondazhet sepse shpeshherë kanë dështuar me zgjedhjet në Shqipëri... Besimi është kaq që kur janë të gjitha në të njëjtin drejtim atëherë probabiliteti për të gabuar është 0.

Z.Shehi kaq shumë ka gabuar PD sa është e paaftë të marrë një mandat të tretë?

Shehi: Ju e thatë bukur, era po fryn. Erë është kjo fryn gjithandej.

Gjinushi: Eshtë erë e fortë...

Shehi: Po është era kaq e fortë sa mund të rrëzojë vetë të majtën. Para 4 muajsh u votua në Itali, do fitojë e majta, Berluskoni ka mbaruar...Ndaj nuk shoh këtu motiv rilindës që të prodhojë një frymë të tillë të rrëzojë këtë maxhorancë.

Po me çfarë duhet të krenohet kjo maxhorancë? Me korrupsionin, gjyqësorin, rrugët po bien, privatizimet të dështuara...

Shehi: Opozita ka për detyrë të sulmojë e të kundërshtojë dhe nuk shoh se ka bërë ndonjë gjë të veçantë në këtë mes. Por sigurisht nuk është cdo gjë e argjentë brenda këtij vendi. Ka kallaj e bronx, jemi në Shqipëri. Por unë gjykoj që koalicioni i djathtë ka akoma energji dhe mbështetje popullore për të marrë një mandat të tretë. Dhe kjo nuk është një gjë e rrallë në Evropë, duke filluar nga Gjermania, Italia...Me një fjalë nuk shoh ndonjë gjë të jashtëzakonshme që mund të prodhojnë këta të tjerët e për më tepër për temën e korrupsionit. Shumë e bukur është për ta diskutuar. Më fal kë do luftoj korrupsionin PS? LSI? Këta na bënë një nder të madh, na liruan duart, gojën dhe disa vende pune.

Pse kaq e korruptuar ka qenë LSI brenda koalicionit të djathtë?

Shehi: Gjykoj sipas zhurmave të fundit nga PS, demostrata e këto, ishin se ky ishte një grup grabitësish. Tani grabitësit u bënë opozitarë e të moralshëm. Kjo lloj teme, është e mirë ta luftojmë të gjithë. Por me këto akrobaci që ka bërë e majta shqiptare të paktën për korrupsionin duhet të pushonjë nja tre vjet.

Z.Gjinushi, ka të drejtë z.Shehi për këtë fakt?

Gjinushi: Po tani ne kemi pasur kontestimin tonë për ardhjen e LSI në koalicion në mënyrë të beftë dhe në mbarim mandati. Por ama qeveria nuk mund të thotë se ju nuk keni moral për të kërkuar ndryshimin e madh se keni LSI. Sepse duhet të pranojë që qeveria vetë ka lënë edhe LSI edhe veten të vjedhë me dy duar. Pra korrupsioni për të cilën ka ngarkesa dhe LSI apo akuza dhe prova këto janë bërë në qeveri dhe përgjegjës është kryeministri për qeverinë. Aq më tepër që këta nuk janë të vetmit sepse janë akoma më spektakolare vjedhjet në Durrës-Kukës, çështja e Gërdecit, vjedhje e hidrocentraleve, privatizimet e paligjshme dhe me efekte katastrofike. Vjedhja e KESH, krom, naftës. Vetëm nga pseudoprivatizimi i naftës humbën 85 milionë euro. Të gjitha këto, shto edhe atë që kanë dështuar gjithë proceset gjyqësore shoqërohen me shumëfishimin e rryshfeteve. Pra janë katër vjet qeverisje korruptive të kësaj qeverie. Dhe me të drejtë ngrihet një pyetje për të majtën pse ka marrë një pjesë të kësaj qeverie. Por sot për sot, jemi në opozitë. Dhe opozitën e përcaktojnë mbështetësit, morali i tyre që janë të paimplikuar, e përcaktojnë partitë. LSI nuk është e vetme, është PS, PSD, janë parti të tjera dhe sigurisht e përcakton ai që do marri detyrën e kryeministrit....

Po nuk duhet të mohojmë që LSI në këtë koalicion ka dalë më e favorizuar...

Gjinushi: Favorizuar në aspektin që ndonëse 4 vjet qëndroi në qeveri, vjen kërkon ndryshimin e kësaj qeverie. Ka një favor të pamerituar, pak kontrakdiktor dhe na jep një cen. Por këta të tjerët, janë e tëra cen. Po të zgjedhësh midis një koalicioni kokë e këmbë të korruptuar për shkak se PD 8 vjet mbështeti korrupsionin, dhe moralin që të akuzuarit për korrupsion ti marrësh në qeveri, duhet të kutojmë se mbi këtë moral u ngrit gjithë qeveria “Berisha”. Tërë ish të majtë të akuzuar i mori në qeveri të vetë. Me agrarë, LSI, Aleanca Demokratike...Madje dhe sot në fushatë ai ka hyrë me socialistë që deri dje flisnin njëlloj me ne kundër Berishës. Morali i të majtës është shumë bindës.

Do ta sjellin ndryshimin emrat e majtë që Berisha i vuri në listë? Islami, Dogjani e Kadeli?

Shehi: Më mirë të pyetej Berisha. Gjykoj që në momente të caktuara, persona të caktuar në zona të caktuara mund të përbënin ndonjë vlerë. Dhe Berisha ka gjykuar me një perceptim oportunist, siç gjykoi kur erdhi LSI apo Agrarja. Dmth unë gjykoj që brenda të majtës gjithmonë mund të gjesh aleatë të përkohshëm.

Po ju gjithmonë keni qenë kundërshtar i këtyre aleancave...

Shehi: Absolutisht. Jam edhe sot. Edhe sot e them. Ndaj e thashë që u ndjeva i lumtur që iku LSI se na liroi tre gjëra: duart, gojën dhe punën që na i zuri në mënyrë abuzive. Disa nga këto rrathët këtu poshtë (e ka fjalën për siglat e partive), janë ndërmarrje.

Z.Shehi, edhe partia juaj nesër mund të kthehet në një ndërmarrje...

Shpresoj që jo. Në momentin që ju thoni se liroi vende pune LSI kur iku pasi hoqi njerëzit nga administrata...

Shehi: S’i ka marrë të gjithë se po ti kishte marrë...ka akoma taborre që rrinë aty akoma...Unë gjithmonë kam gjykuar që administrata s;duhet të përzihej në këto lëvizje. Dhe kam frikë se nuk do të respektohet as nesër në cdo lloj forme që të jetë ndryshimi. Ndaj programi ynë gjithmonë ka qenë për rindërtimin e shtetit shqiptarë.
Dua t’ju pyes të dy liderët: Nëse e majta fiton zgjedhjet, çfarë ju ka premtuar Edi Rama. Kemi deklaratën e djeshme të kreut të PS që zoti Ngjela do të jetë në kabinet.

Gjinushi: Marrëveshja është bërë publike është një platformë që në fund të fundit...

Ajo është marrëveshja për publikun, na thoni atë marrëveshjen tjetër...

Gjinushi: Nuk ka një marrëveshje të fshehtë. Sepse marrëveshja e parë bëhet me votuesit, pra kontrata që lidh me të. Dhe cdo parti do të mbështesë fuqinë e saj në bazë të votave që merr dhe jo në bazë marrëveshjesh. Marrëveshja në çdo rast edhe ajo që shërben si një “kornizë” për aleancën e majtë, mbështetet mbi atë që pushteti dhe bashkëqeverisja ngrihet mbi votën, në bazë të kontributit që jep çdo parti. Sigurisht kjo s’duhet keqinterpretuar siç duan ta kthejnë disa duke pretenduar ndarjen e administratës me përqindje e gjithë sektorët...

Pse është e keqe kjo?

Eshtë e keqe nëse çdo gjë bëhet politike. Dihet se është administrata politike dhe administrata publike. Dhe publikja mbrohet me ligj gjë që është shpartalluar sidomos në katër vitet e fundit. Dhe jo vetëm kaq por 80% e administratës është bërë korrupsion: që nga pagesat për vendet e punës e deri tek pagesat mujore për të mbajtur vendin e punës.

Dakord, po zoti Ngjela do jetë në kabinet ministër...

Gjinushi: Nuk e di unë. Nuk merrem me marrëveshjet dypalëshe. Merrem me marrëveshjen tonë...

Eshtë e ndershme që një prej aleatëve e paska garantuar një post ministri...

Gjinushi: Nuk e di se kush është e ndershme apo e pandershme në këtë rast. Rëndësi ka që ne me PS ti rrimë marrëveshjes klasike për bashkëpunim mbi votën. Dhe fushata të bëhet në bazë të bashkëpunimit reciprok: dmth çdo votë për PS vlen ashtu sikurse duhet të dihet se cdo votë për PSD vlen po aq. Madje ndoshta vlen më shumë se mund të jetë votë e humbur, të pakënaqurisht e të zhgënjyerish. Ne besojmë se PSD do ketë mbi 40 mijë vota, përfaqësuesit e vet në kuvend duke garantuar çdo lloj marrëveshjeje politike.

Zoti Shehi, juve ju është premtuar post ministri? Juve ju është premtuar edhe vendi i deputetit në listën e sigurt të PD. Si mund të dilni në elektorat e të kërkoni vota për LZHK?

Shehi: Ne do të shkojmë ti kërkojmë votat dhe gjej rastin të them të votojnë për nr 49, LZHK dhe që thotë Dashamir Shehi. Unë vlej për këtë punë. Ndaj jam te ajo lista se jam një njeri që kam mbledhur 20 vjet me rradhë vota. Kjo është një zgjedhje taktike që kemi bërë dhe nuk kemi bërë keq, se na ka dhënë më shumë kohë të bredhim nëpër rrethe. E dyta mendoj se LZHK ka një identitet të vetin, ka edhe disa vota që i ka pasur historikisht dhe jo vetëm sot. Ndaj do ti kërkojmë të gjithëve votën e LZHK. Jemi shumë mirë në Durrës, Fier, Vlorë, veç Tiranës që gjykoj që do fitojmë.

Në Tiranë votat e tironasve do ndahen se po punon shumë edhe Bamir Topi...

Shehi: Tani kur të mbaroj kjo punë, do vëmë një bast të vogël që të shohim sesa merr zoti Topi dhe gjithë topçinjtë e tjerë.

Gjinushi: Ta pres unë bastin...

Pse, sa vota merr zoti Topi?

Shehi: Flasim për realitet konkret që është konfirmuar prej vitesh: në 2005, kam marrë 12 mijë vota në qark të Tiranës; unë si Dashamir Shehi kam marrë 6700 vota. Kur u bë hera e fundit kasaphana mora 4600 vota. Dmth sa herë kam hyrë në Tiranë nuk kam dalë poshtë 10%. Dmth këtu flasim për realitet konkret dhe jo ç’do të ndodhë.

Po njerëzit ndoshta janë lodhur, duan të provojnë një alternativë të re. Zoti Topi ka qenë ish-president...

Shehi: Shiko. Nëse do të ishin lodhur, do jenë lodhur me zotin Topi si ish-president. Pse po lodhen me një opozitar si unë? Kam 17 vjet që bëj opozitë. Ose njerëzit kanë luajtur mendç. Tani ai është një ish president, ka qenë një njeri i Berishës dhe me ca tam-tame dhe ca akrobacira, nga ato që përmendi zoti Gjinushi...Pse duhet të jesh i lodhur me një opozitar. Njerëzit lodhen me pushtetin...

Në fakt, ju si opozitar, qëndrestar, pse hytë tani në fund me këtë koalicion?

Për dy motive: Taktikisht dhe nga logjike nuk shoh hapësirë në këtë kod që është ndërtuar për dy persona, për Berishën e Ramën. E dyta, sepse gjykoj si një njeri i qendrës së djathtë që e kam traditë, dhe s’kam kapacitetetin me kapërcy nga një krah në krahun tjetër...
Kështu kemi kryeministrin që është i djathtë dhe zbaton politika të majta...

Shehi: Unë po flas për personin tim. Nuk kapërcej dot siç e ka bërë gjysma e nomeklaturës së sotme. Kështu që në një moment që shoh se unë skam qenë pjesë e pushtetit...

Nëse fiton PD do jeni pjesë e qeverisë?

Shehi: Nëse do kem votat e mjaftueshme për të hyrë si burrë i nderuar për të vënë këmbën djathtas sic di me e vënë unë, do të hyj. Por për të më marrë si hyzmeqar, si ushtar, unë jam 55 vjeç nuk bëj më për këtë. Këto që e kanë bërë. Këto pullat që janë këtu poshtë pse kanë hyrë? Pse janë bërë? (e ka fjalën për siglat e partive). Sepse kanë qenë hyzmeqarë, në daç ti vijë atyre në daç mos t’i vijë mirë.

Gjinushi: Futja në lista nuk është e pamoralshme. Ne nuk e kemi kërkuar, ne e sugjeruam. Sepse hyn në taktikë elektorale. Sepse vetë sistemi është i tillë. Nuk ka asgjë kur garantohet kryetari i një partie sepse do të japë më shumë vota sesa duhen për një deputet. Duhet për përfaqësimin, klima e bashkëpunimit etj. Kjo nuk është e ndaluar. Por është taktikë. PD e përdori, PS nuk e përdori.

Po cila është më e efektshme?

Gjinushi: Të dyja kanë të mirat dhe të këqiat e tyre sepse garanton partinë x të përfaqesohet, nga ana tjetër tenton të punosh më fortë.

Mos Rama ishte më euforik që mua nuk më duhen krerët e partive sepse unë me LSI i fitoj zgjedhjet?

Gjinushi: Kaq koment doja për këtë. Nuk është punë euforie sepse kjo as e ngre e as e ul. Dhe uroj të mos jetë dëshirë për të eliminuar. Pikë muhabeti.

Pse ju mendoni se ka strategji nga e majta për të eleminuar të vegjlit?

Gjinushi: Sistemi është kapricoz. Sepse psh në 2009, jemi para PDNJ që e keni këtu, dhe para PDIU por s morëm deputet. Pa harruar faktin se shumë vota rrjedhin gjatë numërimit që është një proces i cili do apo sdo ka firo. Ndaj bëhet garancia. Ndërsa te PD amoralja është se fut të PS, për ti kompensuar thjesht për mercenarizimin. Sa i takon debatit që u hap unë vlerësoj që Bamiri vërtet ka qenë president, dhe atje krijoi identitet të vetin. Kur ishte në grupin e PD ishte në një linjë me Berishën historikisht si president u përpoq relativisht sepse ka ai gabimet e veta, por të paktën nuk u  bë mashë. Dhe është krejt normal që në dështime të mëdha, të ketë një fraksionim. Dhe ndarja e votës në Tiranë s është thjesht Bamir e Dashamir. Por do jetë për një krah të shkëputur nga PD dhe pjesës që janë me PD. Nuk janë dallime mes individëve. Aq më shumë që PD këtë katër vjecar e humbi identitetin e djathtë. Sepse ish pronarët dhe ish të përndjekurit i dogji me benzinë. Jo që nuk tregoi mbështetje por i ka shpallur persona në kërkim dhe i survejon edhe me polici.  Ka treguar qartazi që e djathtë për të janë të pasuruarit e rinj nëpërmjet korrupsionit.

Zoti Shehi, si keni në plan në fakt ti afroni këto kategori?

Shehi: Që këtu ka të zhgënjyer kjo është e vërtetë. Dhe unë jam një njeri që mbroj të drejtën e pronës.

Si do të mund ta mbroni kur jeni në një qeveri që nuk është shumë “pro”?

Shehi: Qeveria në do të jetë në do të mos jetë. Nuk kemi ndarë çështjet e qeverisë. Edhe jashtë qeverisë unë do ta mbroj këtë tezë. Dhe besoj se qytetarët e Tiranës dhe gjithë Shqipërisë do të më besojnë më shumë mua, sesa ata që dekretuan ligjet kundër pronës. Kjo është kaq e thjeshtë dhe e hapur. Duhet të jenë zgjedhësit të trashë nga trutë që të mos e kuptojnë këtë gjë. Ore këtu ka pasur njerëz që kanë qenë në krye të vendit dhe duhet të mbajnë përgjegjësi për gjërat që nuk i bënë. Unë kam qenë kolonel i vogël i politikës antiqeveritare, skam hipur sipër. Kur të hipi atje të ma kërkojnë këtë gjë. Ndërsa këta kanë qenë atje dhe nuk kanë bërë asgjë. Kaq është muhabeti.

Këta të PD e keni fjalën?

Shehi: Edhe të PD, edhe Presidencës edhe të gjithë. Pra gjithë tarafi i përbashkët është. Ndaj nuk besoj se zgjidhin gjë për pronat. Shqiptarët dhe tiransit po deshën me zgjidh pronat do vijnë prapë te kjo derë që quhet LZHK. Po patën besim se po nuk deshën të ikin nga të kenë qejf. Do vijnë te kjo derë për të zgjidhur çështjen e pronës. Këto pullat që janë këtu ishin ca në qeveri e ca në presidencë dhe nuk zgjidhën gjë. Të jemi realistë për këtë. Këto pullat rozë kuptohet që pronën duan ta hanë me dhëmbë...

Ndoshta janë më shumë për zbatimin e ligjit 7501...

Shehi: Absolutisht jo. As dunë me e dit fare. Do të vijë dita, në fund të fundit kush i mori pronat këta këtej i morën (e ka fjalën për të majtën)

Gjinushi: Jo jo, nuk i kanë marrë ata.

Shehi: Këto e filluan të parët sekuestron.

Jo më shumë akuza ka pasur për të djathën...

Shehi: Po këto ishin në qeveri, në fund të fundit. E dyta, ne e kemi në Shqipëri një opozitë të dolcifikume, oportuniste. Sepse nuk ka qenë opozitë. Të gjithë këta kanë qenë në pushtet. Z. Rama, 13 vjet në krye të bashkisë më të madhe...

Po z. Gjinushi, ku ka qenë?

Shehi: Jo z. Gjinushi, fatkeqësisht për zotin Gjinushi, ka ardhur vërdallë bashkë me mua nëpër studio. Por këta të gjithë kanë qenë në pushtet. LSI ishte katër vjet...

PBDNJ nuk ka qenë psh...

Shehi: Po çfarë është PBDNJ? Ka për detyrë të mbrojë atë minoritetin në Shqipëri dhe kaq. Mos ta faktorizojmë më shumë.

Gjinushi: Më saktë, për të ngatërruar minoritetin (qesh).

Shehi: Bile PBDNJ duhet të jetë pjesë e çdo qeverie sepse funksioni i vet është të mbrojë interesat e një komuniteti dhe të krijojë një lloj moduli për mbrojtjen e minoriteteve. Ndërsa këta të tjerët që janë këtu, këta në pushtet kanë qenë. Ndaj edhe nuk janë të zotë nuk bëjnë opozitë reale.

Po nuk ju lënë z. Shehi të bëheni kryeministër për të zgjidhur çështjet...

Shehi: E për çfarë e dua? E dyta, ka një lloj morali kjo. Të marrët mendojnë që një parti që ka 4%, të marrë kryeministrin.

Po mund të jetë faktor determinant në krijimin e qeverisë siç ishte z.Meta...

Shehi: Absolutisht. Ke gjet fjalën e gabuar, por është rikatues. Brenda kësaj kërkese mungon morali. Po deshe t'i shërbesh shtetit, do i shërbesh sipas rregullave. Kjo nuk do të thotë aspak që z.Meta nuk bën kryeministër. Edhe unë me mendjen time të kulluar, unë them që të gjithë këta që janë këtu, unë “i ha”. Po puna është që kam 2% të votave. Nëse flasim për moral për të krijuar një traditë si shtet evropian do të flasim me rregulla të tjera. Këta janë bërë si gratë e fshatit që zihen te çezma.

Po zoti Gjinushi...

Gjinushi: Për dy temat e fundit të pronës dhe kryeministrit: Sigurisht që nuk është e moralshme që një parti pakice qoftë me 4,5,7 apo 10 deputetë të imponojë kryeministrin. Sepse po të marrim të abstragojmë që kemi një koalicion me një parti të madhe dhe tre të tjera që mund të plotësojnë 71 votat dhe të gjitha vënë kusht kryeministrin atëherë nuk qeveriset. Pra kjo nuk ekziston ky lloj morali dhe parimi. Ndërsa është e vërtetë që në koalicione të gjera bihet dakord për çështje ekuilibrash dhe zgjedhin një personalitet në krye të qeverisë. Kjo bëhet zakonisht para zgjedhjeve dhe më pas hyhet në zgjedhje dhe shërben si bashkues i koalicionit. Këto të tjerat kur hidhen kështu si shashka janë vetëm provokacione, janë presione...

E keni fjalën për deklaratën e zotit Naço që Meta do të jetë kryeministër?

Gjinushi: Konkretisht, konkretisht. Sepse pastaj kjo do të thotë se ti e mbështet fushatën vetëm mbi pazar elektoral...

Ju do të thoni se kjo është taktikë elektorale e LSI?

S’ështe vetëm kjo. Ajo tregon një ambicie të fshehtë që fle gjithmonë te LSI...

E ka Meta këtë ambicie thoni ju?

Absolutisht, sepse e ka treguar që me Nanon: që i thoshte o kryeministër o s’ka. Dhe përplasja me Nanon kështu u justifikua.

Nuk ju duket se çoni ujë në mullirin e Berishës me këto divergjenca brenda jush?

Jo përkundrazi. Duke paralajmëruar për rrezikshmërinë e kësaj partie në këtë pikë...

Pse kaq i rrezikshëm është Ilir Meta?

Po të dalë e fortë LSI në zgjedhje do të bëjë presion të madh. Dhe këtë që e hedh si shashkë elektorale e kërkon.

Po mundet që LSI t’i marrë votat, z. Gjinushi, pse paragjykohet...

Po pra po, ndaj duhet të jenë të kujdesshëm njerëzit, sepse absolutisht duhet të zgjedhin partitë që e garantojnë që do të qeverisë e majta, që do ketë qeverisje të ndershme, luftë kundër korrupsionit dhe nuk do të ketë kriza artificiale. Sepse e majta është djegur nga qulli. Jo se ka humbur votën e popullit. Por është djegur nga tekat e partive të caktuara, nga shitjet e deputetëve të caktuar, duke filluar nga agrarja e duke përfunduar me LSI.

Sa i takon pronave, absolutisht që s’po bëjmë historinë. Ligji 7501 është miratuar në 1991 me konsensus; në 1998 u bë një kompromis historik me kushtetutën, në të cilën thuhej se ligji mbi pronat të përputhej me kushtetutën. Dhe në 2001 kemi bërë amendimin ku hiqej kompensimi i pronës në qytet, dhe futej në fshat me 70 ha. Dhe pak a shumë ky ligj u votua në 2004 me rrugë konsensuale. Që nga ky vit, PD nuk bëri asgjë për kompensimin. Dhe sa më shumë vonohej, aq më shumë shterohen mjetet e shtetit për kompensim. E njëjta gjë është bërë edhe me kthimin. Madje e kanë atrofizuar komisionin. Nga 12 komisione bënë vetëm një, dhe e kthyen monokratik me një individ, i cili edhe fizikisht nuk e përballon dot barrën, pa i hyrë pastaj që nuk mund ti jepet një individi një pushtet i tillë sepse vetëm mbreti ka pasur tagrin që të bëjë dekrete për pronat. Këto janë çudira shqiptare dhe në fakt ai komision është marrë vetëm me kompensim miqsh, sekserësh, abuzim pronash. Dhe PD ka hequr dorë nga kompensimi i ish pronarëve dhe është marrë vetëm me zhvajtje pronash nga bregdeti dhe më gjerë.

Sa deputetë pretendoni të merrni në Kuvend zoti Shehi, dhe a do të mund të jeni një faktor imponues?

Shehi: Ne kemi besim në Vlorë, Fier, Durrës, e Tiranë.

Pra ju thoni LZHK, 5 deputetë.

Shehi: Këto janë shanse për tu marrë deputetët. I tillë është ligji. Dhe të mos fluturojmë kot.

Zoti Gjinushi sa pretendoni ju?

Gjinushi: Ne do të luftojmë në qarqet e mëdha. Po në qarqet e mëdha fusim edhe Lezhën e Beratin. Sa më shumë mandate të ketë qarku aq më lehtë fitohet një mandat. Për arsye të taktikës zgjedhore nuk tregojmë pikat e forta sepse alarmojmë kundërshtarin. Eshtë si në futboll.

Të gjithë partitë e vogla pretendojnë kaq shumë mandate. Do marrin gjë partitë e mëdha?

Shehi: Ne pretendojmë. Sa i përket LSI, kujtoj para katër vjetësh tha do marr 40 mandate dhe mori 4. Kjo është një lloj oguri i mirë për opozitën. Unë mendoj për qarqet e mëdha. Shpresoj të bëhen pesë.

Sa mendoni se do të marrë koalicioni i djathtë zoti Shehi?

73-74 mandate.

Ju zoti Gjinushi bini dakord me Ramën se koalicioni i majtë do të marrë 77-78 mandate?

Gjinushi: Unë i kam bërë prognozat e mia. Në 12 qarqe në 11 ne luajmë për gol. Varianti është o mbetet siç është ose e majta plus 2. Dhe është vetëm një qark me mundësi të ulët që mbrohemi, por edhe –pala tjetër shpreson me pak mundësi që të bëj gol ajo. Ndaj është si të kesh një ndeshje që ti gjuan 11 penallti dhe ai gjuan 1 e kush e fiton ndeshjen. Ky është probabiliteti.

Shehi: Probabiliteti është se këta humbin gjithmonë.

Gjinushi: Kush është humbës? Në 2007 e në 2011 e kemi fituar. 2005 dhe 2009 është fituar me 50 mijë vota...

Shehi: Ku?

Gjinushi: Po është fituar me 50 mijë vota. Por prej sistemit Dushk 1, dhe prej ikjes së LSI në 2009 qeveris Berisha. Dhe Berisha ka pranuar në Kuvend: shiko ju merrni vota unë qeveris. Kjo që thashë mundësitë janë mbi 74 deri ne 80, teorike. Mezi është i mundshëm.

Kam një pyetje: Nëse zoti Berisha merr si parti më shumë mandate, por koalicioni i majtë ka më shumë mandate në kuvend i gjithë bashkë, kë do të thërrase presidenti për të krijuar qeverinë?

Gjinushi: Nuk është e shkruar që “thërritet kryetari i partisë së parë”. Ne kemi të shkruar, që presidenti emëron kryeministrin me propozim të shumicës parlamentare. Pra ai që krijon shumicë shkon i propozon presidentin kryeministrin. Po të rrëzohet, propozon vetë presidenti, e po të rrëzohet dhe ky, i lihet kuvendit të nxjerrë një kryeministër. Po ra dhe ky, shkohet në zgjedhje të parakohshme. Nuk është partia e parë, por grupimi i parë që propozon.

Edhe ju zoti Shehi kështu mendoni?

Shehi: E shkruar është kështu, pastaj në parlamentin tonë mund të bëjë vaki që disa nga ky krah kalojnë në krahun tjetër dhe krijojnë një maxhorancë të re. Kushtetuta thotë siç thotë zoti Gjinushi. Këto janë taktika elektorale. Edhe zoti Meta në 2009 për hatër të integrimit u bashkua me qeverisjen e djathtë, dhe për çështjen e stabilitetit...

Gjinushi: Dhe na integruan.

Shehi: Kjo ishte një sakrificë e madhe që ata bënë në emër të Shqipërisë. Fatmirësisht ne po gëzojmë një nga lumturitë më të mëdha.

Gjinushi: Ato katër vjet mos ardhshin më.

Lidhur me KQZ, zoti Shehi. Ka shumë debate dhe diskutime dhe nga faktori ndërkombëtar. Duhet të riformatohet KQZ?

Shehi: Nuk duhet shkuar me një KQZ të cunguar, por duhet të gjendet një formulë që të bëhen 7 vetë. Sepse kjo do të paragjykonte zgjedhjet, dhe këtë infrastrukturë rreth zgjedhjeve dhe para komunitetit ndërkombëtar do të fillojë që të paragjykohet. Shpresoj që në ditët në vazhdim të gjendet një formulë.

Ikën ditët...

Shehi: KQZ këtu te ne peshën e ka pasur pas zgjedhjeve. Në fillim janë çështje administrative. Deri më sot nuk ka pasur probleme.

Probleme ka pasur, se psh, PD nga nr 43 e bëri 44 për ta pasur më të thjeshtë për zgjedhësit...

Shehi: Nuk gjykoj që ka qenë kështu.

Gjinushi: Sot ka dy cështje të paligjshme që "de facto" deligjitimojnë zgjedhjet. E para mandatet. Ne nuk kemi bërë ndarjen e re të mandateve. As konform ligjit as konform kushtetutës, por në mënyrë arbitrare shumica la në fuqi ndarjen e vjetër. Vendimi i kuvendit është vendimi më i dobët në planin juridik dhe në hierarkinë e shtetit sepse vendimet e kuvendit ska detyrime për të tretët. Kuvendi nxjerr ligje.

Kush është zgjidhja?

Gjykata Kushtetuese e la "remi" çështjen nuk e gjykoi për arsye proceduriale. Por që në momentin që fillon nxjerrja e rezultateve, atëherë ti ke të drejtë të kërkosh shpalljen e rezultateve konform ndarjes së re dhe jo të vjetër. Dhe gjykata kushtetuese është e detyruar të vendosë. Dhe me ndarjen e re, që me zgjedhjet e 2009 jemi 72 me 68 pa lëvizur asjë votë majtas djathtas. Ky është fakt. E dyta KQZ. Ajo nuk është thjesht e paplotë, ajo ka një të katërt të paligjshëm. Në një trupë gjykuese që ka një gjyqtar pa mandat, çdo vendim i saj do të jetë nul. Sepse edhe këtu PD nuk arriti as ta fshehë as moralisht zëvendësimin. E nisi si të drejtë morale, pastaj tha e shkarkojmë për çështje ligji e me radhë. Kodi e thotë qartë: kur shkarkohesh për çështje ligjore disipline, të zëvendëson ai që të ka vënë. E dyta, kjo nuk mund të funksionojë. Sepse Kolegji nuk zëvendëson dot KQZ. Korrigjohen vendimet. Eshtë një lloj si të thuash meqë nuk bëhen tre të pestat tia cojmë gjykatës kushtetuese për miratim. Por nuk i miraton dot gjykata. Ndaj kolegji nuk merr dot vendime. Pra kjo është e ngecur. Sepse duhen pesë për të nxjerrë rezultatin, dhe pesë anëtarë nuk janë. Dhe nuk ankohesh dot në Kolegj. Sepse ti në kolegj nuk ankohësh dot as pse nuk bëhen dot pesë anëtarë. Duhet riformatuar. S’duhet nënvlerësuar. E tha dhe një ambasador i OSBE se deklaroi që është si skuadra që dalin lojtarët që lidhin këpucët dhe mandej futen prapë. Po kjo nuk është punë lojtarësh por legjitimiteti. Dhe gjithë fryma e kodit është me konsensus. Riformatimi e kthen në legjitimitet dhe të jetë në ballancën e fillimit.

Zoti Shehi, vërtet do t'i hiqni vizat me SHBA?

Shehi: Unë gjykoj që mund të hiqen vizat. Strategji nuk është por një porpozim elektoral është. U bënë mirë shqiptarëve. Ç’a po u thotë Berisha? Do t’ju rrahim për katër vjet? Jo moj, unë besoj se është e këndshme për shqiptarët. Unë gjykoj se me forcimin e marrëdhënieve të mëtejshme...

Duket se marrëdhëniet e Berishës me SHBA e më konkretisht me ambasadorin Arvizu janë në nivelin e tyre më të ulët...

Shehi: Sa herë vijnë zgjedhjet të gjithë palët shohin a po qesh ambasadori, nëse është i vrejtur. Raporti është më i thellë e duhet marrë me seriozitet dhe kapërcehet procesi elektoral. Janë të mbështetura mbi interesat amerikane në rajon. Ndaj me Berishën apo pa Berishën edhe pa Ramën, që bëri një foto me Obamën, marrëdhëniet do ecin përpara, do jenë të qëndrueshme.

Po mirë Rama e bëri një foto, por Berisha nuk ka dalë fare jashtë këto kohë...

Shehi: Shiko Berishën e njohin shqiptarët; Ramën janë kurioz ta njohin. Edhe unë po të isha ndërkombëtar këtë punë do bëja. Do i thërrisja njëherë djemtë e rinj, a janë të aftë të drejtojnë. Si nxënësit që paraqiten njëherë në drejtori të shkollës. Berisha e ka kaluar këtë fazë nuk është e nevojshme që ta thërrasin.

Gjinushi: Atë nuk e thërrasin se e njohin se çfarë është dhe nuk është më i thirrshëm.

Shehi: Një natë bëmë një debat shumë të gjatë dhe zoti Milo numëroi gjithë vizitat dhe doli në konkluzionin që SHBA është e ashpër me Berishën. Dhe harroi që nga gjithë vizitat, harroi më kryesoren, vizitën e presidentit të SHBA në Tiranë. Si ta bëjmë tani, mos tia faturojmë këtë Berishës. Sepse marrëdhëniet Shqiptaro-amerikane kulmohen në të gjitha pikëpamjet. Dhe shanci i qëlloi Berishës. Ndaj lejeni këtë muhabet se nuk ka vlerë.

Gjinushi: Marrëdhëniet më të mëdha kanë qenë gjatë luftës së Kosovës. Dhe kanë ardhur të gjithë. Dhe ne nuk mburremi patjetër që ishte merita e të majtës. Por e majta kishte një meritë tjetër që mbështeti luftën e Kosovës. Qeveritë e majta e mbështetën. Ajo kishte edhe kosto, dhe Berisha ka dalë kundër, ka furnizuar me naftë Miloshevicin.

Shehi: Po kjo është një histori...

Gjinushi: Po kjo nuk është një histori. Madje është mburrur. Ka thënë se ia ka dhënë Serbisë për të ngrohur Kosovën. Po tha, Miloshevici e dogji. Ndihet që marrëdhëniet janë ftohur, pavarësisht lobingjeve. Sepse nuk plotëson dot 12 rekomandime. Ambasadori amerikan ka qenë gjithmonë tepër përkrahës, i tha edhe burrë shteti në moment tepër kritik dhe tani është i detyruar të distancohet, dhe ai tani nuk dëgjon as për KQZ, qoftë edhe formalisht; ndërkohë që vodhi edhe Tiranën, sy më sy, me monitorim ndërkombëtar dhe publik dhe ky ndjek të njëjtën rrugë. Kur së fundi i thonë të paktën të bëjë zgjedhje normale. Nuk bindet dhe është rritur rezerva ndaj tij. Dhe të mos ngatërrojmë marrëdhëniet dy palëshe e personale. Sepse Shqipëria është pjesë e NATO, është pro amerikane.

Në fakt zoti Gjinushi, aksionet më të mëdha i ka zoti Berisha, heqjen e vizave, futjen e Shqipërisë në NATO...

Gjinushi: Presidenti Amerikan erdhi për pavarësinë e Kosovës. Sic erdhën të gjithë për luftën. Ai shpalli pavarësinë dhe u lancua që e mbështetste pavarësinë. Eshtë sukses i shqiptarëve. Kur tregon ftohje.

Shehi: Po ku e kuptoni ju këtë ftohjen mo aman...

Gjinushi: Eshtë shprehur. Ambasadori amerikan doli edhe para disa ditësh dhe tha se na kritikojnë për "Act now" se mos ndërhyjmë për proces.

Shehi: Se mos e ka thënë për PS...

(Foto: Dashamir Shehi e Skender Gjinushi ne studion e Airport)

Gjinushi: Po të rrish tetë vjet do marrësh ca fryte. BE ka vetëm dështim.

Po u miratuan tre ligjet...

Gjinushi: Të mos bëjmë lojë të shëmtuar. Ajo është thjesht një alibi. Janë 12 rekomandime. U miratuan për tre minuta sepse nuk ka rëndësi. Eshtë e vërtetë që ka dashur të ketë një kompromis. Dhe ju lanë për tu bërë këto të treja: gjyqësor, administratë dhe parlament. Shtetet anëtare sidomos Hollanda shtuan korrupsionin. Dhe tani ka dalë kryefjalë standarti zgjedhor. Ndërsa e majta e ka lënë Shqipërinë në 2005 me MSA gati priteshin vetëm për zgjedhjet e pranueshme. Nano pranoi rrotacionin paqësor. MSA ishte mbi tavolinë. Dhe këta me MSA e gjetën dhe me MSA e lanë. Ishim dy vjet para Serbisë e Malit të Zi, ndërkohë që tani jemi dy vjet pas. Anëtarësimi në NATO, Dashi e di shumë mirë. De facto u bëmë në 99. Pastaj u firmos A3 nga Moisiu që parashikonte anëtarësim brenda 2007 dhe u arrit në 2008.

A do të ndikojnë në zgjedhje?

Shehi: Impakti direkt te qytetari janë vizat. Tani që jemi në NATO...

Flemë më rehat, jemi më të qetë. Nuk na sulmon njeri...

Shehi: Një pjesë e shqiptarëve kanë flejt e nuk kanë ndjerë gjë. Në fakt si shtet ndjehemi më të qetë, sigurisht që kemi ca angazhime më shumë brenda NATO-s e sigurisht që do të harxhohen edhe disa para më shumë. Po qe për impakt direkt mbi qytetarët, unë nuk gjykoj se një djalë nga fshati është i interesuar nëse jemi në NATO, thjesht do të dojë të mos ndalohet në kufi.

Duke iu rikthyer fushatës. Berati zoti Shehi është mbushur me postera të LZHK, ku i keni gjetur paratë?

Ai djali i Beratit është sipërmarrës. Unë ende nuk e kam parë. Unë nuk kam mundësitë e këtyre zotërinjve që kanë vënë këto pullat këtu. Po ti shohësh se e kupton vetë mundësitë. Unë paratë e mia të kolegëve do shpenzoj.

Ju s’do të bëni fushatë me postera, autobuza, spote në televizion...

As me autobuza e furgonë. Ne e kemi bërë këtë punë në këmbë. Dhe ju falenderojmë për televizionet. Këto partitë se ku i gjejnë paratë duhet të hetohen. Se si gjenden këto para.

Po afër qeverisë jeni zoti Shehi mund të gjeni fonde...

Afër qeverisë jemi. Por them se duhet të hetohen. Nga dalin këto para që prishen me kaq zemërgjerësi në favor të popullit. Këto po shkojnë ta iluminojnë popullin me flamujt e vetë.

Sa para do harxhoni në këtë fushatë?

Unë, në daç me thënë nja 20-25 milionë lekë të vjetra. Po pati ndonjë që na dëgjon dhe ka dëshirë me na ndihmu, hajde të na ndihmojë. Fjalimet i bëj më të bukura, disa i ha edhe për të pashëm. Por që para nuk kam me thënë të drejtën.

Po ju zoti Gjinushi, a keni para?

Si gjithmonë me fushatë minimale, sepse financimi i shtetit jo vetëm është i ulët, por jepet me vonesë. Më shumë kemi ndjekur taktikën e takimeve të vogla dhe derë më derë. Dhe vetë sistemi është i tillë, që partitë socialdemokrate, që synojnë të kapin 3-4 përqind dhe nga 10-20 vota në kuti votimi, kjo ndiqet me struktura në qendrat e votimit. Përvecse ato duan dhe shpenzime. Media me kohë duhet të ishin vigjilent ndaj atyre që dukshëm bëjnë fushatë mbi mundësinë që kanë vetë.

Mediat po detyrohen vetë me vendim KQZ për kasetat...

Gjinushi: Mediat duhet ti japin ato kur nuk vijnë në takime. Sepse ajo reklamë e partisë është. Dhe mesazhi që jep partia. Kur është vetë media, ajo duhet të japë lajmin. Por edhe aty të jepet një lajm korrekt.

Zoti Gjinushi, detyra jonë është të kapim edhe gafat...Derisa matet minutazhi duhet të jepet mesazhi që jep partia. Këto mitingjet e mëdha të PS e PD, apo strategjia e re të toën hall apo këndi i fjalës si ju duken?

Këto krijesat e reja elektorale, apo rotondat në bar, prapë i quaj pozitive. Më mirë të flasim në një klimë të qetë, të ketë argumente përtej mitingjeve, që tregojnë forcën e kapacitetin e partive. Këto shtesa tregojnë emancipim. Ajo që më çudit mua është se këtu mitingje nuk bën vetëm PD e PS. Por bëjnë edhe parti që s’merren vesh fare se nga kanë dalë. Mund të marrin edhe 800 vota. Nga i buron popullariteti. Sepse kur mbarojnë zgjedhjet e kupton. Dhe kjo është butaforike. Ti shohesh kryetarë të vegjël që puthin kalamanj me kostume...

E keni fjalën për zotin Idrizi?

Shehi: E kam fjalën për lloj lloj idrizërash...

E keni dhe në koalicion...

Shehi: Ore s’du me e dit për koalicion apo për gjëra me këto lloj muhabetesh. Unë them e gjithë kjo është një lloj butaforie që nuk i shkon shtetit, nuk i shkon manisë për të krijuar lidera, nuk na shkon me kriju guacka pa substancë brenda. Kjo është logjika ime, në daç tu pëlqejë në daç jo, të tjerëve. Mua edhe po të më japin paratë do të kisha komunikuar më ndryshe. Pa për këto malsorë të vegjël me qeleshe e vajza fshati, kjo më duket se është pas. Kjo nuk na afron me Evropën. Kjo trego që sado gërthasim për Evropën e kemi këmbën zvarrë në Ballkan.

Zoti Gjinushi ka akuza nga opozita që po detyrohet administrata për të qenë në mitingje. Kush i detyron mësuesit dhe infermierët që të dalin në miting?

Gjinushi: Problemi është se edhe në këto zgjedhje që kërkohen standarte absolutisht standardet janë të shkelura tashmë. Standarti i bërjes presion me vende pune në fushatë; standarti i mospërdorimit të administratës në fushatë apo i ndarjes së fushatës nga qeveria, janë disa standarde që bëjnë pjesë në kriteret bazike të Kopenhagenit apo Këshillit të Evropës. Dhe ne i kemi të shkelura që sot. Problem tjetër është blerja e votës, që është realisht në kthim në skllavëri.

Nuk është provuar blerja e votës...

Gjinushi: Ne e kemi në kurriz ti thua. Eshtë një gjë që preket e ndihet. Ankohen për ditë. E konstaton etj...

Pse nuk denoncohen këto pranë institucioneve?

Edhe e denoncojnë po ku. Në prokurori? Sepse këtu ngelën duke u denoncuar gjërat dhe nuk hetohen asnjëherë. Këtu nuk hetohet zhdukja e 85 milionë eurove, nuk gjykohet 21 janari, Gërdeci. Ndaj dhe njerëzit s’kanë besim te drejtësia. Ndaj ne kemi qenë skeptikë që me Berishën mund të bëhen zgjedhjet normale dhe të heqësh me votë një qeveri që manipulon votën. Megjithatë kjo do të zgjidhet më 23 dhe gjëja e parë që do ti kërkojmë shumicës së majtë është vendosja e zgjedhjeve të lira dhe të ndershme. Të bëhen zgjedhjet me karta e elektronikë për të garantuar zgjedhje të lira dhe të ndershme e për të përfunduar te një qeverisje e ndershme.

A jeni ju dakord që të ketë një debat Rama-Berisha?

Shehi: Unë jam plotësisht dakord. S’do bëja një, por tre të tilla.

Pse refuzon Berisha? Eshtë mbledhur koalicioni ta diskutojë?

Shehi: Me thënë të drejtën deri tani nuk jemi mbledhur, por edhe mund ta diskutojmë. Një debat Rama-Berisha do ishte i vlefshëm. Por ata janë mësuar të komunikojnë ndryshe. Në një debat Rama Berisha, ky i fundit i ka avantazhet e veta. 

Çfarë avantazhesh ka zoti Shehi? Eshtë i konsumuar tashmë...

Shehi: Jo nuk është e vërtetë, absolutisht që po. Ka shumë më tepër eksperiencë dhe artikulon më mirë idetë e veta. Një debat do të ishte në favor të tij. 

Me çfarë do mburret?

Shehi: Unë gjykoj që ka shumë gjëra për tu mburrur. Sigurisht që ka edhe gabime.

Cilat janë?

Shehi: Plot janë. Kjo qeveri ka për tu mburrur. Ka edhe defekte. Unë i them qytetarëve të votojnë këtu për këto punë që janë në dorë për t’u mbyllur, të votojnë këtu për ato që do të bëhen nesër dhe programet e maxhorancës; të votojnë që të na jepni kohë që të korrigjojmë dhe gabimet që janë bërë gjatë këtyre tetë viteve. Po nuk patëm kohë si mund të rregullojmë gabimet tona. Ndaj u them qytetarëve, të votojnë për sot, dhe për ato që do bëjmë nesër dhe të kemi shanc të shohim pak pas edhe për ato që kemi gabuar deri dje.
Pra e vërteta duhet parë në sy dhe janë arsye të mjaftueshme për të na votuar. 

Zoti Gjinushi, nuk e kisha dëgjuar ndonjëherë kërkimin e mandatit të tretë për të korrigjuar gabimet...

Shehi: Po është normale, duhet koha e mjaftueshme. Kjo është e ndershme. Ne themi të vërtetën që kemi bërë dhe gabime.

Gjinushi: Po është fjala për gabimet e LZHK po, por nëse është fjala për dështimet e PD, është larg qoftë. Sepse Berishës iu dhanë tetë vjet të tjera për të korrigjuar fajet e gabimet 92-97. Dhe i ka përsëritur si dy pika uji të njëjtat gabime dhe dështime. Tani 300 mln i ka borxh bizneseve. Dhe ka qindra komuna e bashki që janë të falimentuara. Dhe kjo është arsyeja që shumë rrugë mbeten pa mbaruar. Nga 10400 km si dalin as 2000 në terren. Eshtë aritmetikë. Por në fakt cdo lloj qeverie normale duhet të kishte mbaruar që në 2009 rrugët nacionale. 

U bë rruga e Kombit...

Kjo qeveri sot e kësaj dite nuk shkon dot as në Vlorë, Korcë, Gjirokastër, edhe Lezha. Pra për tetë vjet duhet të ishin mbyllur rrugët nacionale. Në këtë logjikë do dhe 8 vjet të tjera që të vjedhë. Sepse Durrës Kukës e bëri dy tre herë më të shtrenjtë dhe standarti është i pakrahasueshëm me Kosovën. 

Po edhe e majta nuk ngulmoi për akuzën...

Gjinushi: Nuk e bën e majta akuzën. Kjo çështje u mbyll për procedurë. Dhe të shpëtosh 300 milionë dollarë për procedurë se padia iu njoftua me pesë minuta vonesë, kjo ndodh vetëm në Shqipëri. Nuk mbyllet procesi. Jo që ka një tjetër vendim gjykata e lartë. Të gjitha janë mbyllur me procedurë. Edhe Tirana me procedurë u vodh. Korrupsioni është miliona në KESH, miliona në naftë dhe miliona në krom. Pastaj nga shitjet e paligjshme të pronave të ushtrisë, hidrocentraleve llotarisë kombëtare, s’ke ku e kap. Ai nuk korrigjohet. Eshtë i mbytur. Dashi e di mirë. 

Shehi: Nuk kam përgjegjësi direkte dhe do të isha i lumtur të hetohet. Dhe do vijë në Shqipëri të hetohet. Por ju e keni bërë standard se këtu ka korrupsion. 

Gjinushi: Janë me fakte, me KLSH...

Shehi: Ky është një shtet që nuk shkëlqen në luftën kundër korrupsionit. 

Gjinushi: Po LSI ua sollëm të pastër, dhe na e sollët pis (qesh)

Shehi: Po të kishte dëshirë edhe PS...

Redaksia online
(ar.sh/shqiptarja.com)

TAG:
• kqz
• OSBE
• gafa