Zoran Zaev: Pas shtyrjes së negociatave na mungojnë fondet nga BE! Ngrin marrëveshja me Greqinë për emrin

GREQI- Kryeministri i Maqedonisë së Veriut, Zoran Zaev thotë se pas refuzimit të hapjes së negociatave nga BE, Marrëveshja e Prespës me Greqinë do të futet në krizë. Në një intervistë për për seksionin grek “Euronews”, Kryeministri maqedonas tha se disa pjesë të Marrëveshjes së Prespës varen nga hapja e negociatave, pasi do të duhet të akordohen fonde nga Bashkimi Europian.

“Maqedonia e Veriut nuk pret anëtarësimin e menjëhershëm në BE, por një përgjigje pozitive do të ishte nxitje për dy vendet ballkanike, Maqedoninë e Veriut dhe Shqipërinë, që të vazhdonin në rrugën e duhur”, tha kryeministri Zaev. 

Sipas Zaev, pas refuzimit të hapjes së negociatave, disa dispozita të zbatimit të Marrëveshjes së Prespës janë në rrezik.

LEXO EDHE:
Mali i Zi dhe Shqipëria përpara, të tjerët mbeten të bllokuar

“Ka një lidhje mes zbatimit të marrëveshjes dhe fondeve në rastin e hapjes së negociatave. Lidhja ekziston sepse miqtë tanë grekë kanë pranuar që të bënim marrëveshjen e Prespës për shkak të së ardhmes që Maqedonia e Veriut ka në Bashkimin Europian. Por, në këto kushte, Marrëveshja nuk mund të realizohet. Një pjesë e saj do të pezullohet sepse nuk mund të implementohet. Ndoshta ne do të përpiqemi të shkojmë përpara në disa kapituj por gjërat janë të ndërlidhura pasi procesi i zbatimit të kapitujve nënkupton zgjerimin e sovranitetit tonë për të hyrë në Bashkimin Evropian",  u shpreh Kryeministri i Maqedonisë së Veriut.

Zaev tha gjithashtu se perspektiva për Maqedoninë e Veriut, për Shqipërinë dhe gjithë Ballkanin Perëndimor, është perspektiva europiane, në të kundërt rajoni do të përballet me zhvillime të pakëndshme.

Marrëveshjen e Prespës në qershor të vitit të kaluar në pjesën greke të Prespës e nënshkruan qeveritë e Maqedonisë dhe Greqisë, sipas të cilës Republika e Maqedonisë e ndryshon emrin e saj në Republika e Maqedonisë së Veriut. Ndryshimi i emrit zgjidh problemin me Greqinë, që daton që nga shpallja e pavarësisë së Maqedonisë nga ish-Jugosllavia në vitin 1991.

Më 11 janar të këtij viti, Kuvendi i Maqedonisë me shumicë prej dy të tretave miratoi ndryshimet kushtetuese të cilat dalin nga Marrëveshja e Prespës, më pas më 25 janar me shumicë të thjeshtë marrëveshja u ratifikua edhe në Parlamentin grek.

Ministria e Punëve të Jashtme (MPJ) e Maqedonisë më 9 shkurt njofoti se pas përmbushjes së të gjitha kushteve juridike për hyrjen në fuqi të Marrëveshjes së Prespës, Qeveria e Republikës së Maqedonisë, do ta shpallë në Gazetën Zyrtare datën e hyrjes në fuqi të amandamenteve kushtetuese dhe ligjin kushtetues.

“Më pas, Republika e Maqedonisë së Veriut dhe Greqia do të dorëzojnë një letër të përbashkët deri te sekretari i përgjithshëm i OKB-së, me të cilën e informojnë Antonio Guteresh për datën e hyrjes në fuqi të marrëveshjes përfundimtare, me çka i jepet fund kontestit disa dekadësh bilateral mes dy vendeve”.

Pas kësaj, njoftoi MPJ “Republika e Maqedonisë së Veriut në mënyrë adekuate i informon :Sekretariatin e OKB-së, vendet anëtare, vendet vëzhguese të OKB-së, si dhe organizatat tjera ndërkombëtare ku është anëtare, për ndryshimet e bëra”.

TAG:
• zoran zaev
• emri i maqedonise
• Maqedonia e Veriut
• marreveshja e prespes

Sondazhi i ditës:

Si ka qene per ju viti 2024?

• I mire

  43.5%

• I keq

  22.7%

• As i mire as i keq

  33.8%

Vota total: 1553

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq