TIRANE – “Profeti Muhamed është bir i Zotit”. Kjo fjali përbën skandalin e radhës në tekstet shkollore shqiptare dhe gjendjet pikërisht në Sociologjinë e klasës së 11.
 
"Recitimi i motos islame, sipas së cilës Allahu është i vetmi Zot dhe Muhamedi është i biri i tij". Kjo fjali e shkruar në faqen 109 të Sociologjisë në pjesën ku flitet për Islamin, bie ndesh me themelin e këtij besimi fetar. Sipas Kuranit, librit të shenjtë të kësaj feje ekziston vetëm një Zot dhe se profeti Muhamedi është i dërguar i tij, por jo biri.
 
sociologjia 11

Libri i Sociologjisë me të cilën mësojnë prej vitesh nxënësit e shkollave të mesme mban firmën e bashkautorëve Fatos Tarifa, Klementin Mile dhe Flora Gjoka.  Por ndryshe nga herët e tjera kur ‘gafave’ pa fund të teksteve shkollore nuk iu dilte asnjë për zot, këtë radhë Klementin Mile autori i pjesës së tekstit për fenë ka pranuar e madje rregulluar gabimin
 
I kontaktuar nga A1Report Klementin Mile thotë se kjo fjali është një lapsus, duke e justifikuar njëherësh me presionin e kohës me qëllim për të nxjerrë në treg librin në datën e caktuar.

“U njoftova për problemin e krijuar nga shtëpia botuese. Është bërë një lapsus, por në kushtet në të cilat është përgatitur teksti, për 2 muaj, është e pranueshme. Është një lapsus i rregulluar dhe në ribotimin që do të ketë teksti do jetë në formën e saj korrekte. Ai është një lapsus dhe unë u kërkoj ndjesë të gjithë atyre që mund të jenë prekur nga kjo gjë. Dhe forma më e mirë për të kërkuar ndjesë është ta rregullojmë”, tha Mile për A1 Report.

klementin mile

Bashkautori i librit te Sociologjise 11 Klementin Mile

Libri i Sociologjisë është botuar për herë të parë në vitin 2010 dhe është ribotuar në vitin 2014.
 
sociologjia 11

Gafa me tekstet shkollore vjen pas një sërë skandalesh të tjera, ku nxënësve u mësohej se si të rrisnin temperaturën e trupit përmes shkrirjes së shkumësit në ujë në mënyrë që të manipulonin me sëmundjen e tyre për të lënë mësimin, apo rasti ku vëllai duhet të zgjedhë nëse ai apo motra duhet të hanin një karamele vdekjeprurëse.

Redaksia Online
(Gre.M/Shqiptarja.com)