Kthimi i Gazmend Bardhit nga SHBA solli si efekt të menjëhershëm atë që Berisha nga maja e pallatit ku qëndron i mbyllur, e quan përditë gjatë javës së fundit si “mrekullia e opozitës”. Bardhi vendosi të kundërtën e asaj që pritej pas takimit me amerikanët, pra e ndau mendjen të shkojë tek ata që Amerika i ka shpallur të padëshërueshëm. Siguroi veten, fundosi gjithçka tjetër!
Nëse s’ja arriti të bindë shumëkënd, arriti të paktën të habisë shumicën e opinionit publik shqiptar, duke marrë me vete edhe atë që deri dje njihej si grupimi i mesit në PD dhe duke e çuar te Rrugica. Tashmë Doktori i mbyllur në shtëpi nga SPAK-u mori në duar kontrollin e porcionit më të madh të deputetëve të partisë Demokratike dhe ky është një sukses jo i vogël për një politikan thuajse 80 vjeçar, të cilin e konsiderojnë të mbaruar (pas perdeve) edhe ata që i rrinë gjithë ditën pas.
Bashkimi u arrit, mjetet dhe mënyrat i dinë ata që e kryen. Tani Rithemelimi është i lirë të këndojë fitore dhe të përpiqet ta shesë këtë që ndodhi si paradhomën e kthimit në pushtet në 2025. Është i lirë të shohë ëndrra me sy hapur, pasi opozita e djathtë ka dhjetë vjet që sheh të tilla ëndrra, duke qëndruar aty ku është. Në opozitë.
Megjithatë me këtë rast vlen të bëhet një ushtrim i vogël logjik, një ekuacion i mbështetur mbi arsyen e ftohtë, e jo mbi fjalimet e Berishës nga maja e papafingos, për t’ja parashtruar protagonistëve të bashkimit. Dhe ekuacioni logjik mund të përmblidhet në këto rreshta:
Berisha dhe Bardhi u bashkuan, deri tani ligji elektoral i ndalon të kandidojnë me siglën e PD, Basha vijon të ngulmojë në korsinë e tij dhe hyn vetëm në zgjedhje duke ndarë votën opozitare, Rama dhe amerikanët qëndrojnë të ftohtë ndaj këtyre zhvillimeve, kodin zgjedhor e bën PS dhe PD (e Bashës), zgjedhjet pas një viti i fiton PS, ndërkombëtarët nxitojnë t’i njohin ato siç bënë në 2021, opozitarët e bashkuar, Partia e Lirisë dhe PD zyrtare marrin (kush të mundet) mandatin e deputetit opozitar për katër vitet që pasojnë (2025-2029) dhe Berisha do të duhet të mbajë veten me durim dhe shëndet deri në fund të dekadës në pakicë, i skeduar nga SHBA dhe nën hetim nga drejtësia shqiptare. Bardhi dhe të tjerët fusin në xhep mandatet parlamentare, Rama fut në xhep mandatin qeverisës.
Ky është realiteti cinik mbi të cilin është e detyruar të shkelë deri në zgjedhje edhe opozita e bashkuar Berisha-Bardhi. Një realitet i cili natyrisht që mund të ndikohet nga disa faktorë jo të parëndësishëm në vitin elektoral ku kemi hyrë. Së pari duhet parë çfarë do të bëjë Altin Dumani me pirgun e dosjeve që ka mbi tryezën e punës. Së dyti duhet verifikuar si do të mbyllet historia e vulës dhe stemës së PD në gjykatë. Së treti, do parë si do të marrë formë kodi zgjedhor, nëse vërtetë do të ketë një reformë në këtë drejtim para zgjedhjeve të përgjithshme. Së fundi, do pritur që të shihet nëse ka mbetur ende ndonjë grimë shprese për një bashkim real, e jo të pjesshëm të të gjithë opozitës (përfshirë Bashën) rreth një kandidature neutrale për kryeministër, siç po përflitet këto ditë.
Të gjitha këto variabla mund ta modifikojnë disi rezultatin final të ushtrimit të mësipërm logjik, por s’duhet harruar se ndodhemi mjaft afër zgjedhjeve dhe çdo ditë që kalon e bën më të vështirë përmbysjen e këtij ekuacioni. Pa harruar që edhe faktori SPAK, elementi kryesor surprizë në këtë periudhë që na ndan nga zgjedhjet, mund të godasë edhe majtas edhe djathtas (inceneratorët, 21 janari, CEZ-DIA, Gërdeci).
Gaz Bardhi dhe të tjerët kanë bashkuar armët me një palë politike që vërtetë reklamon sot diku tek 400 mijë votat popullore, por që në funksion të fitores së zgjedhjeve ofron vetëm humbje. Mesa duket këta zotërinj kanë ulur pretendimet dhe duan vetëm mandatin e deputetit, e kjo duhet respektuar si nevojë personale dhe jetike e çdo personi që sot shkon tek Berisha, e jo tek Basha. Por një hap i tillë kërkon së paku që këta deputetë që lanë “kuadratin e mesit” e shkuan tek Rithemelimi, të jenë të sinqertë dhe të hapur me votuesin e tyre. I cili pret fitoren, e jo rinovimin e mandatit vetjak të një grupi burrash e grash që duan të jenë medoemos në Kuvend edhe pas vitit 2025./ Gazeta Tema
Lajme të tjera
-
Ylli Pata: E marta e kiametit...
23 Nëntor, 19:52
-
Berisha i refuzuar nga militantët, porosi drejtuesve të qarqeve për protestën: Të martën sillni sa më shumë njerëz në Tiranë
23 Nëntor, 18:35 -
Intervista e Dumanit/ Lapardhaja: Dje konfirmoi që SPAK dhe ai janë indiferent ndaj sulmeve politike! Një prokuror që nuk ka marrë asnjë dhuratë, fat për shoqërinë shqiptare
23 Nëntor, 17:35 -
Pas 7 refuzimesh, Berisha s'heq dorë! Këmbëngul për liri në Gjykatën e Lartë
23 Nëntor, 15:41
-
Dumani ‘indiferent’, Blushi e sulmon sërish: SPAK po i garanton imunitetin qeverisë e bandave! Arrestimi i Metës banditesk
23 Nëntor, 14:43 -
Zgjedhjet 2025/ Bardhi: Betejë për jetë a vdekje! Në Kuvend, gratë deputete shpesh herë më shumë luftarake se burrat
23 Nëntor, 14:08 -
Megjithë përpjekjet dhe ndihmën e përfaqësuesit grek, PD nuk arrin ta përfshijë Sali Berishën në rezolutën e PPE-së
23 Nëntor, 12:17 -
Disa përfundime pas intervistës së Altin Dumanit
23 Nëntor, 12:07
-
Avokatët e dosjes 'Metamorfoza' reagojnë pas intervistës së Altin Dumanit: Sqarim lidhur me vlefshmërinë e të dhënave të SkyECC
23 Nëntor, 12:05 -
Fisniku Dumani
23 Nëntor, 12:03
-
Dumani me 3 apartamente? Kreu i SPAK i përgjigjet Berishës: Kurrë në jetën time s’kam pranuar jo ryshfet, por as dhuratë mbi 100 dollarë
22 Nëntor, 21:48 -
Altin Dumani: Indiferent ndaj sulmeve të politikanëve, SPAK s'mban grafikë ndaj kujt ushtron ndjekje penale! Rëndësi kanë provat, jo emri! Në Sky gjetëm lidhjet e krimit me politikanë e zyrtarë
22 Nëntor, 21:22
