Akuzohet për lidhje me grup kriminal në Durrës, arrestohet ish-deputeti i PS, Jurgis Çyrbja! Doli në Sky ECC, 3 akuza, mes tyre tregtimi i sekretit shtetëror (VIDEO)

Jurgis Çyrbja dhe makina e policisë me të cilën u transportua

Ish-deputeti Jurgis Çyrbja, i arrestuar me 3 akuza të rënda nga SPAK mbrëmjen e sotme (20 Tetor), ka lënë qelitë e Policisë së Durrësit dhe u vendos në bllokun e Sigurisë në Tiranë, ku do i nënshtrohet procedurave të tjera hetimore.

Ish-ligjvënësi socialist akuzohet për lidhje me një grup kriminal në Durrës dhe komunikime në platformën e koduar SKY ECC. GJKKO ka dhënë masën “arrest me burg” ndaj tij. I arrestuar është edhe Ahmet Masha, kunati i vëllait të ish-deputetit, po për të njëjtën dosje penale.

Meqë hetimet kryhen nga ana e SPAK, edhe ish-deputeti është transferuar drejt Tiranës, ku do i nënshtrohet hetimeve të tjera dhe marrjes në pyetje. Po kështu do dalë për masë sigurie në Gjykatë, për konfirmimin e saj.

Makina e Policisë, gjatë aksionit mbrëmjen e sotme në Durrës

Detaje të reja nga operacioni i Prokurorisë së Posaçme në qarkun e Durrësit mbrëmjen e sotme, ku u arrestua ish-deputeti socialist Jurgis Çyrbja, me 3 akuza të rënda.

Bashkë me ish-ligjvënësin është arrestuar edhe Ahmet Masha, një emër i njohur për Policinë dhe Drejtësinë, pasi ka qenë i arrestuar në vitin 2013 për kontrabandë nafte, bashke me një grup prej 8 personash.

Gjithashtu rezulton se Masha është njëkohësisht edhe kunati i vëllait të ish-deputetit Çyrbja, por nuk ka detaje nga Prokuroria ende për lidhjet mes të dyve dhe provat që i implikojnë në çështjen e lidhjes me një grup kriminal dhe komunikimet në SKY ECC.

Ish-deputeti akuzohet për korrupsion zgjedhor, tregtim të sekreteve shtetërore dhe përkrahje e autorit të krimit. SPAK njoftoi se nesër do të dalin me njoftim të detajuar për dosjen e bujshme hetimore. GJKKO ka aprovuar masat e sigurisë paraprake “arrest me burg” për të dy. Por mësohet se ka edhe persona të tjerë që po kërkohen për arrestim.

Ndërkohë pritet transferimi nga momenti në moment drejt Tiranës i dy të arrestuarve.

Ndërsa Prokuroria e Posaçme kryen veprimet proceduriale për arrestimin e ish-deputetit socialist Jurgis Çyrbja dhe të dyshuarit tjetër Ahmet Masha, forcat e Policisë së Shtetit, kryesisht ato speciale, po vijojnë kontrollet dhe aksionin në qarkun e Durrësit.

Ish-ligjvënësi është izoluar në paraburgimin e Komisariatit Durrës për të kryer veprimet paraprake proceduriale, para se të transferohet në masa të larta sigurie drejt Tiranës.

Por paralelisht, përveç kontrolleve në banesë, përqëndrime forcash ka pasur edhe në Komisariatin e Shijakut. Në pamje shihet përqëndrimi i madh i makinave të policisë, pasi në qytet po bëhen kontrolle për persona të dyshuar, por edhe në objekte, pasi ish-deputeti ka edhe një lokal në këtë qytet.

SPAK duket se ka ndarë detyrat me planizim uniformash blu në disa drejtime, me object hetimin që po kryen. Ka kontrolle në banesa, rrugë dhe veprime të tjera për llogari të hetimeve.

Çyrbja ka 3 akuza të deklaruara zyrtarisht nga SPAK dhe për të cilat GJKKO ka dhënë masën “arrest me burg”

Me urdhër të SPAK, mbrëmjen e sotme u arrestua ish-deputeti i PS, Jurgis Çyrbja për lidhje me një grup kriminal në Durrës. Burime për gazetarin e Report Tv, Artur Korriku bëjnë me dije se bashkë me Çyrbjan është arrestuar edhe Ahmet Masha, i cili mësohet se është kunati i vëllait të ish-deputetit. Masha dhe Çyrbja kanë qenë bashkë në momentin e arrestimit në Durrës.

Masha nuk është një emër i panjohur për Policinë dhe drejtësinë. Në vitin 2019, Masha rezulton se është marrë në pyetje nga Policia e Durrësit lidhur me atentatin që u organizua ndaj Plaurent Dervishajt, një personazh mjaft i njohur i botës së krimit. Masha vetëm është marrë në pyetje, pra s'ka qenë në hetim apo akuzë për atentatin ndaj Plaurent Dervishajt më 20 qershor 2019. Aso kohe, 43 plumba kallshnikovi u derdhën drejt Plaurent Dervishajt, si edhe dy miqve të tij, Julian Meçe dhe Bashkim Haxhija. Të tre i shpëtuan atentatit. 

Ndëkohë, në dhjetor të vitit Masha 2013 rezulton se ka pasur një çështje penale në ngarkim për kontrabandë nafte, bashkë me të dyshuar dhe hetuar të tjerë. Në total 13 persona. Në atë dosje ka qenë edhe halla e deputetes së PD, Albana Vokshi.

Ahmet Masha, atëkohë 30 vjeç, sipas dosjes hetimore, u dënua për naftë kontrabandë me anijen në pronësi të babait të tij, “Rovato”. Në përfundim të procesit, në maj të vitit 2015, Gjykata ka dhënë dënimin me 100 mijë lekë të rinj gjobë për Mashën, kurse Prokuroria kërkoi 1 vit burgim.

Ish-deputeti socialist Jurgis Çyrbja, i cili u arrestua me urdhër të SPAK për lidhje me një grup kriminal, u transferua nga paraburgimi i Durrësit në Bllokun e Sigurisë në Tiranë.

Mësohet se Policia e Shtetit që ka shkuar në ndihmë të prokurorëve për ekzekutimin e urdhër-arresteve, ka ushtruar kontrolle edhe në banesën e ish-ligjvënësit, teksa kontrolle u zhvilluan në Durrës dhe Shijak në kuadër të aksionit dhe personave të tjerë që mund të jenë në dosjen e SPAK.

Nuk ka detaje se çfarë është gjetur deri tani si provë fizike, teksa sipas procedurës është sekuestruar makina e ish-deputetit dhe mes sendeve të bllokuara është i përfshirë edhe telefoni. SPAK do të japë nesër detaje për operacionin, kurse ndaj ish-deputetit ka 3 akuza të rënda.

Ish-deputeti socialist Jurgis Çyrbja, i cili u arrestua me urdhër të SPAK po mbahet në ambientet e Policisë së Durrësit. Report Tv sjell pamjet e furgonit të Policisë që do e transferojë në Tiranë

Ai u prangos nga blutë me urdhër të SPAK dhe masë sigurie nga Gjykata e Posaçme, “arrest me burg”, për 3 akuza të rënda.

Çyrbja mësohet se për momentin është në Durrës, në Drejtorinë e Policisë së Qarkut. Po kryen veprimet proçeduriale, veprime të cilat po i kryejnë prokurorët e SPAK-ut.

Bëhet me dije se pas këtyre procedurave standarde, ish-ligjvënësi do të transferohet në Tiranë, në mjediset e Drejtorisë së Policisë, për të vijuar më tej me marrjen në pyetje, komunikimin e akuzave dhe daljen në Gjykatë për konfirmim mase.

Policia e Shtetit ka ekzekutuar deri tani 2 urdhra arresti të lëshuara nga SPAK. Një prej të arrestuarve është ish-deputeti socialist Jurgis Çyrbja, i qarkut Durrës, që më 9 Tetor la mandatin dhe më 11 Tetor SPAK e mori të pandehur për dosjen e shpërdorimit të detyrës më 2016, kur drejtonte Hipotekën e Durrësit.   Sot (20 Tetor) ai është arrestuar për lidhje me një grup kriminal dhe komunikime në SKY, me 3 vepra të rënda penale.

Mësohet se gjithashtu ka një të arrestuar të dytë me urdhër të SPAK. Ai është Ahmet Masha, një emër i njohur për Policinë, i hetuar më parë.Ish-deputeti në momentin që është arrestuar në Durrës, ish-deputeti ka qenë në shoqërinë e shoferit të tij, duke udhëtuar me makinë.