Suli për Report Tv: Janë përmbytur 250 familje... por jo vetëm nga shiu! Nesër do bëhet vlerësimi i shtëpive

Kreu i bashkisë së Kamzës Rakip Suli tha për Report Tv se nga përmbytjet e shiut që kanë prekur këtë zonë janë përmbytur rreth 250 familje. Suli tha se problemi për këtë zonë nuk ishin vetëm përmbytjet nga reshjet e shiut por edhe përzierja e tyre me ujërat e zeza për shkak të problemit 30-vjeçar me kanalizimet, ndërsa deklaroi se nga nesër do të bëhet vlerësimi i tyre.

"Nga rënia e tërmetit janë të dëmtuar disa objekte, nga të cilat 15 janë bërë të pabanuara. Kemi mbledhur të dhëna për të bërë riparimin dhe dëmshpërblimin e tyre. U morën të gjitha masat për të strehuar ata që kishin mbetur jashtë në pallatin e kulturës.

Kamza është një zonë me një mijë e një probleme. Pas tërmetit dëmi më i madh ishte shiu. Me një të rënë shiu këtu përmbytet rreth 50% e banesave. Problem janë kanalizimet. Pjesa më e rrezikshme. Përmbytjet nuk janë bërë vetëm nga shiu por nga bashkimi i tij me ujërat e zeza. Mbrëmë u morën masa për familjet që kishin nevojë për t'u zhvendosur nga shtëpitë. Sot janë disa mjete që po punojnë për zonat e rrezikuara. Të përmbytura janë rreth 250 familje. Nesër do bëhet vlerësimi i këtyre shtëpive. Një problem 30-vjeçar nuk mund të zgjidhet as për një ditë as për një javë", u shpreh Suli.

Lajmi kryesor:

Uji pushton shtëpitë, drita dhe ujë nuk ka, anulohen disa fluturime nga stuhia (Situata e plotë nga përmbytjet)

/r.k./Shqiptarja.com

TAG:
• permbytje