Unë e kam takuar vonë teta Netën, në makinën e Edi Ramës, atëherë ministër Kulture. Zbriti në Kombinat, te varrezat. Pyetjes si do të kthehej në Tiranë, të të birit, që do të vazhdonte rrugën për në Vlorë, iu përgjigj: “E gjej vetë.” Rama, sapo ishte emëruar ministër Kulture dhe daljen e parë si i tillë, e bëri në qytetin ku kaloi fëmijërinë.
Aty afër shtëpisë së kohës kur mësoi notin në Vlorë, hipi në timonin e një autobusi të djegur dhe i premtoi qytetit që e donte siç do njeriu fëmijërinë e vet dhe e mbante në mendje si oborri me lule i shtëpisë së Anetës, në Vlorë.
Kohë më pas kur flisje me teta Netën për Vlorën, e kuptoje kollaj, pse Edi e donte qytetin. Ajo mbante mend çdo detaj, edhe vargjet e këngës së 45 kushtuar një fëmije që vdiq aksidentalisht, ndërsa ktheheshin nga koncertet e pasluftës. Kur ma tregoi dhe i thashë që ai ishte xhaxhai që nuk njoha kurrë, ajo u bë përgjithmonë e shtëpisë, për mua.
E takoja, pavarësisht humorit të Ramës, që nuk qe kurrë dy herë njësoj. “Mos ia merr për keq, kështu është ai. Ja sa iku sot, më pa me këtë fundin me lule; “Ç’e ke këtë?”, tha e nisi të tallej.
Po unë e njoh e nuk ia marr për keq. Sa më shumë do, aq më pak e tregon. "
Teta Neta vetëm krenohej me të birin. Nuk e tregonte kurrë lëndimin, kur ia sulmonin djalin dhe prej djalit, atë vetë, kurrë. Erdhi një ditë, te Top Channel ku punoja, për të kërkuar një material arkive. Donte të padiste Berishën që e kishte fyer publikisht. Me këto gjëra mund të merrej fare mirë, zyra e shtypit e Ramës, po ajo i bënte vetë. “Boll punë ka Edi. Unë këtë e bëj për vete, për Kristaqin. Do e hedh në gjyq.”
Dhe u ul në tavolinën e fundit të kafes së Topit, e më tregoi për ndjenjën që i kishte shkaktuar fjala e Berishës, që ajo e njihte mirë. Ishte e dërmuar. Unë rrija e dëgjoja. Kur gjyqi u mbyll dhe ajo e humbi, m'u rikthye në kujtesë portreti i asaj dite, i Aneta Ramës, që me gjithë lëndimin, nuk ia linte barrën, as shkarkonte mërzinë të birit. “E gjej vete.”, -thoshte, ajo grua Vlore, që e pata shumë xhan njëherë e përgjithmonë, pas asaj dite kur e pashë të trishtuar, por të padorëzuar, me atë zërin karakteristik e portretin krenar, të pangatërrueshëm.
Ajo nuk merrte kurrë në telefon të thoshte diçka për të birin dhe punën e tij. Nuk besoj ta ketë bërë me askënd. Nuk ankohej, nuk kërkonte, nuk priste, nuk ndërhynte.
Një ditë i shkova në shtëpi kur ishte sëmurë. Më tregoi atë ditë për herën e parë të Edit në Greqi. “Sapo u hapën kufijtë dhe Edi shkoi te njerëzit e mi në Greqi. Po kur u kthye qe gjithë inat. “Po çfarë kanë ata më shumë se ne, që të jetojnë kaq mirë.”, më thoshte. Çfarë kanë grekët më shumë se shqiptarët?!" Nuk e pranonte dhe qe vërtet i tronditur, në vend të kënaqej, siç doja unë që ia këshillova të shkonte.”
Pastaj më tregoi fotot e të birit të vogël, që nuk ndryshoi kurrë. “Nuk u bë dot gojëmbël, por mbeti njeriu që atë që e mendon, ta thotë, pastaj e bën.”, më tha Aneta Rama në atë takim të fundit të gjatë me të. "Do të rrish për drekë, kam peshk nga Vlora.” -, tha në fund, po atë çast mori Zaho në telefon dhe unë ika, ndërsa e kam në sy, si atë ditë, ulur në divanin, e rrethuar nga fotot e fëmijëve të vegjël dhe dashurisë së saj të madhe, Kristaqit. Dikur më tregoi se nuk i pëlqente më të festonte ditëlindjen, që i përkonte me ditën e martesës, qyshkur iku i shoqi. Në ditën e lindjes së tij, edhe ajo vendosi ta shoqërojë përgjithmonë. Kur lexova lajmin, m'u kujtua dita kur e pashë të zbriste nga makina e të birit ministër, me një tufë lule për në varreza dhe zërin e saj: “E gjej vetë si kthehem.”
Nënat janë dashuria më e madhe që ka njeriu. Kur ato nuk kthehen më, është e vështirë. Për fat nënat nuk ikin kurrë. Janë diku, gjithmonë duke të vështruar nga lart dhe miratuar me kokë, çfarë ti bën dhe nuk bën. Ç'fat të kesh nënë të mençur.
Kam dashur gjithmonë ta intervistoj Aneta Ramën, po sikleti i zërave që na kompleksojnë: “Ja kjo, do e intervistojë se është nëna e Ramës.” Ah sa gjynah, që nuk e bëra.
U ula dhe shkrova dy fjalë për të, siç bëjmë, vetëm kur njerëzit ikin, se nuk dimë sa njerëzore është t'ua themi sa janë gjallë. Teta Neta, lamtumirë!
Komente
Lajme të tjera
-
Rrëfimi i Fatos Nanos: Kur isha 9 vjeç, për pak vdiqa! Më përjashtuan nga gjimnazi bashkë me Fatos Lubonjën
31 Gusht 2023, 15:25 -
Rama përfaqësoi shqiptarët e punës, në Britaninë e Madhe
24 Mars 2023, 17:30
-
Xhunga: Vajza, mos u lidhni me 'të fortin' me lekë, ndryshe pasojat janë të rënda
2 Mars 2023, 10:41
-
Revolucioni vulëhumbur dhe e reja që po vjen!
24 Shkurt 2023, 11:23
-
Targa e Benzit dhe njerëzit që më shpëtuan jetën
21 Tetor 2022, 19:02
-
FOTOLAJM/ Kryeministri Rama, lule te varri i prindërve: Kur të dy të shohin nga lart, lutesh të jesh i denjë për dashurinë e tyre
1 Gusht 2021, 10:49 -
‘Një për të gjithë e të gjithë për një’, nga fjalët e ngrohta të nënës së tij, Anetës dhe të Lindës, tek kujtimet e karrierës së tij politike, Rama publikon videon
23 Prill 2021, 09:00 -
Fevziu lexon pa ndroje mesazhin skandaloz të Sali Berishës për Anetën, nënën e ndjerë të Edi Ramës. Ja si reagon kryeminstri (VIDEO)
16 Tetor 2020, 10:14 -
Sgarbi mesazh ngushëllues Ramës për humbjen e nënës: I qëndroj pranë, bashkë me shumë italianë
2 Gusht 2020, 21:25 -
'Mund të derdhësh lot pse iku ose të bësh atë që ajo donte'/ Rama postim prekës për nënën e tij që u nda nga jeta 1 ditë më parë
2 Gusht 2020, 17:16 -
Dënojeni me votë, jo me mallkime
2 Gusht 2020, 15:17
-
Fqinji për Report Tv: Aneta Rama ishte zonjë e rrallë, para një muaji e takova për herë të fundit...
1 Gusht 2020, 11:03
Aneta guri i kendit, nga fillon dhe ndertohet shtepia,La pas vedi gurethemelin e ndertimit te shtetit demokratike shqiptar.Lavdi per Nenemadhen, Zonjen e Madhe Aneta!
PërgjigjuBukur Rudina! Qutetari dhe kulture
Përgjigju