VËZHGIMI/ Tregu i Fierit problematik! Rasti i konfirmuar në Lezhë ndërgjegjëson qytetarët! Dezinfektohet Lushnja

Në linjat e urbaneve, që tashmë udhëton personeli mjekësor është parë mbipopullim dhe njerëz që rrinë ngjitur me njëri-tjetrin, ndërsa edhe në orarin e lejuar për të lëvizur, njerëzit nuk janë ndërgjegjësuar plotësisht për të mbajtur distancën me njëri tjetrin dhe për të dalë për nevojat e domosdoshme dhe jo për xhiro.

Ulja e temperaturave ka sjellë edhe ulje të qarkullimit të këmbësorëve. Ditën e sotme ka pasur një numër më të reduktuar se një ditë më parë. Ka pasur radhë të vogla në sportelet e Ujësjellësit dhe të bankave të nivelit të dytë, por respektohet distanca.

Përfshirja e Lezhës në hartën e zonave të prekura nga koronavirusi, duke se i ka frikësuar qytetarët. Ndërgjegjësimi i tyre është më i madh për zbatimin e rregullave të përcaktuara. Në qytet nuk shihen lëvizje të grupuara dhe te njësitë e tregtimit dhe të shërbimit, qytetarët mbajnë distancën nga njëri-tjetri.

Qyteti i Fierit vijon të jetë problematik, specifikisht në tregje. Edhe pse ai renditet i dyti, pas Tiranës për numrin e lartë të rasteve, kjo nuk i ka trembur qytetarët të cilët vijojnë të grumbullohen në treg për të blerë fruta-perime pas masa mbrojtëse, as doreza dhe as maska. Nga ana  tjetër, një supermarket ka vendosur një person i cili u dezinfekton duart të gjithëve me alkool, por nuk ruhet mjaftueshëm distanca.

Qyteti i Lushnjes ka vijuar dezinfektimin e hapësirave publike. Ditën e sotme janë dezinfektuar hapësirat e blloqeve të pallateve pranë Komisariatit dhe dy kopshte. Sipas një grafiku të hartuar nga Bashkia, dezinfektimi bëhet çdo dy ditë.