Protesta/ Pas kërkesave, Goxhaj sot në hije të podiumit! Kokaj: Grupi koordinator me 40 vetë, s’kemi lider! Qytetarja i kundërvihet Arben Kolës: Po biem çdo ditë

Marshimi i protestuesve nëpër rrugët e kryeqytetit vijon, por tashmë duket se është ndarë në dy ‘fronte.’

Një pjesë e protestuesve po vazhdojnë rrugën drejt bulevardit “Zogu I”, ndërsa të tjerët po kthehen sërish në sheshin “Skënderbej.”

Me flamuj në duar dhe duke kënduar himnin kombëtar, protesuesit janë pozicionuar në zonën e '9-katësheve'. Marshimi i tyre ka bërë që qarkullimi i automjeteve të ndërpritet.

Pankartat e protestuesve ditën e sotme ishin të nxitura nga intervista e kryeministrit Rama për Financial Times ku ai komentoi kërkesat e qytetarëve për dorëheqje apo dhe që të hetohet nga SPAK si i përfshirë në afera korruptive duke u përgjigjur: “Njerëzit thonë se unë jam udhëheqësi i gjithë kësaj. Unë u them: ‘f*ck you’. Kaq e thjeshtë. Nuk më takon mua të provoj se nuk jam Kumbari, u takon atyre të provojnë se jam Kumbari.”

Protestuesit i janë kthyer me përgjigjen “F*ck you too” apo “who the f*ck is Edi Rama?” Në një tjetër pankartë është ironizuar edhe takimi i kryeministrin me presidentin francez Emmanuel Macron.

Përfundojnë fjalimet para kryeministrisë dhe tashmë protestuesit po nisin marshimin nëpër qytet. Nga podiumi u bë thirrje se kushdo që dëshiron mund të qëndrojë përpara kryeministrisë, siç kanë vepruar prej së shtunës.

Gjithashtu protestuesve iu rikujtua të pastrojnë bulevardin nga mbeturinat.

Një sirenë policie dhe një fletë me mbishkrimin “Skenë krimi” është vendosur përpara kryeministrisë. Protestuesit thërrasin “Policia është me ne”, ndërsa një vajzë me megafon në dorë qëndron mes dy efektivëve.

Një qytetar i pranishëm në tubimin para Kryeministrisë, ka deklaruar mes lotësh se para se të nisnin protestat kundër investimit në Zvërnec, ai personalisht ishte ‘dorëzuar’.

“Isha dorëzuar personalisht, derisa rinia shqiptare erdhi këtu. Dhe unë i falënderoj përzemërisht që mua më ngritën nga gjumi, nga apatia, nga mosveprimi. U kërkoj falje që nuk kam mundur të jem këtu 2 ditë më parë, pasi nuk kam qenë në Shqipëri. Kur isha me miqtë e mi, nuk shkëmbeja dot as dy fjalë me ta, kur shihja nga ekrani protestën”, tha një qytetar në protestë.

Aktivisti Edison Lika gjatë fjalës së tij në protestë është shprehur se protestuesit kanë marrë kërcënime të shpeshta për pjesëmarrjen e tyre në tubime.

Gjatë fjalës së tij, Lika tha se ndaj shumë protestuesve janë hapur hetime. Ai shtoi se shumë avokatë po i ndihmojnë protestuesit që janë nën hetim, pa asnjë përfitim monetar.

“Në fakt si këto kërcënimet që morën studentët, që janë bërë modë këto kohë, që marrin me numra privatë njerëzit për të mos marrë pjesë në protestë, ka sa të duash. Madje edhe Policia ka hapur hetime penale ndaj aktivistëve që kanë marrë pjesë në protestë. I them edhe atij studentit që këto kërcënime nuk bëhen nga ambasadat, por nga njerëz që duan të na frikësojnë. Dua t’ju them se mes nesh ka edhe avokatë që kanë ndjekur falas çështjet e protestuesve këmba këmbës. Dhe kur themi avokat, nuk e kemi fjalën për Avokatin e Popullit, sepse ai është avokat i Ramës dhe Berishës”, tha aktivisti Edison Lika.

Një qytetare gjatë fjalës së saj në protestën para Kryeministrisë, ka deklaruar se kishte ardhur kastile nga Diaspora, për të marrë pjesë në këto tubime.

Më pas ajo tregoi se ishin larguar familjarisht në emigrim, pasi mamanë e saj e kishin hequr nga puna në arsim.

“Jam një vajzë dibrane që kam ardhur enkas në këtë protestë nga diaspora. Kërkoj ndjesë pasi nuk e flas mirë gjuhën shqipe, pasi jam rritur larg. Por zemra ime gjithmonë ka qenë këtu. Për arsye partish, mamin tim e hoqën nga puna në arsim dhe familja ime iku larg në emigrim. Sot jam këtu edhe për të rinjtë dhe brezat që do të vijnë. Zëri ynë ka një rëndësi dhe sëbashku do të sjellim ndryshimin”, tha mes të tjerash një protestuese.

Një protestues i kërkoi kryeministrit Rama “të tregohet burrë dhe të dorëhiqet.” Ai i tha se vendi ka nevojë për ndryshim dhe jo për njerëz që vijnë nga listat e mbyllura.

“Nuk duam më 4 veta, duam ndryshim! Ne mund ta bëjmë këtë gjë! Ata që ke ti në partinë tënde nuk reagojnë se nuk janë zgjedhur nga ne, por nga listat e tua të mbyllura! Shqipërinë po e bëjmë ne! Shqipërinë e bën çdo shqiptar që punon në Europë, në botë, që punon këtu. Ju jeni pengesa më e madhe për zhvillimin e këtij vendi! Duam të drejta dhe liri të barabarta për të gjithë! Jep dorëheqjen, tregohu burrë se e dimë që je burracak!”

Flamingot, simboli i protestave përpara kryeministrisë, nuk munguan as këtë mbrëmje. Një grup protestuesish parakaluan në paradën e zakonshme mes të tjerëve duke mbajtur flamingot në duar.

Me thirrje kundër qeverisë dhe për një bashkim mes shqiptarëve, një vajzë u tha protestuesve se ka ardhur koha për lëvizje mbarëkombëtare.

“Pas gjimnazit më doli e drejta e studimit në Amerikë me 100% bursë, por vendosa të qëndroj në vendin tim. Vite më vonë, shqiptarët po tregojnë që ka ende shpresë. Sytë po shohin që ka në mesin tonë burra e gra sypatrembur që u vlon gjakun për Shqipërinë! Ka ardhur koha që plagët të shërohen dhe autorët gjakatarë ta paguajnë njëherë e mirë! Le të bjerë zemërimi i shqiptarëve në krye të zuzarëve! Kryeministri po zvogëlohet i trembur! Ka ardhur koha për një lëvizje mbarëkombëtare! Ai kolltuku ku ke hipur është trikëmbëshi që populli varet përditë!”, tha vajza.

Protestuesit nuk tërhiqen nga kërkesat e paraqitura një ditë më parë që u lexuan nga Dritan Goxhaj. Madje, në mbështetje, një prej anëtarëve të grupit organizator, tha se do t’i lexojnë çdo ditë poshtë zyrës së kryeministrit.

“Duke qenë se deklarata e djeshme trembi shumë njerëz përfshirë kryeministrin Edi Rama që u mor personalisht me disa prej nesh, do ta bëjmë të udhës ta lexojmë çdo ditë për ta kuptuar se pse jemi më shesh tash e 24 ditë!”, tha Edison Lika.

Protestuesi Erlis Sina, të cilit Edi Rama iu drejtua me një mesazh mëngjesin e sotëm, i ka kthyer përgjigje nga protesta kryeministrit.

Gjatë fjalës së tij, Sina tha se Rama tentoi mëngjesin e sotëm që ta bënte mik, por shtoi se ai nuk mund të bëhej mik i kryeministrit, pasi sipas tij, Rama ka tradhtuar shqiptarët.

Sina tha gjithashtu se Rama nuk mund të qante hallet e tij, pasi ishte shkaktari i halleve të shqiptarëve.

“Unë jam Erlis Sina, ai i cili Rama u zgjua sot në mëngjes dhe tentoi të bëhej miku im. Por përgjigjen që ia dhashë aty, po ja jap edhe këtu. Unë s’mund të bëhem miku i Ramës, sepse Rama ka tradhtuar Shqipërinë dhe shqiptarët. Ndaj Edi Rama unë nuk jam si ti. Ti nuk mund të qash hallet e mia, sepse ti je shkaktari i tyre. 24 ditë je munduar të na përçashë, të na bësh agjentë iranianë, grekë, serbë. Je munduar të na etiketosh. Ne jemi të gjithë shqiptarë. Për ne Shqipëria është e para. Ndaj sot kam ardhur me një pankartë, unë jam në këtë shesh që është plotë, ndërsa ti i ulur vetëm. Dhe kështu i vetëm do të largohesh nga ajo zyrë dhe do të shkosh në burg. Do japësh llogari për çdo qindarkë që u ke vjedhur shqiptarëve. Sot ka ardhur dita të largojmë Ramën nga pushteti. Rama i tha shqiptarëve ‘fuck you’. Ne kemi vetëm një përgjigje për të ‘Rama jepe dorëheqjen’”, tha mes të tjerash Erlis Sina.

Mëngjesin e sotëm, kryeministri Rama, me një mesazh publik drejtuar protestuesit Erlis Sina, theksonte se ai ishte ‘mbërthyer’ nga vorbulla e turmës dhe sinqeriteti e bindjet e tij po keqpërdoreshin për interesa të tjera.

"Nuk të shoh si humbësin e një proteste, po si njeriun e mbetur vetëm me bindjet e tij. Ti i je bashkuar vorbullës thithëse të turmës, sepse beson sinqerisht se po mbron diçka të çmuar. Nuk e di çfarë halli ke tamam. Po di që ke një hall që jo vetëm nuk ta zgjidh askush, po as nuk ta qan kush. Besoje ose jo, po unë e ndjej brengën tënde”, shkruante mes të tjerash Rama.

Referendumi ishte thirrja e radhës nga protesta para kryeministrisë. Një qytetare tha se kanë mundësinë që të paraqesin në KQZ kërkesa për ndryshime kushtetuese që të kufizohen mandatet.

“Ne kemi fuqinë si protestë, ta hedhim ne Edi Ramën. Ne jemi në kushtet e një referendumi të pashkruar që mund ta kthejmë në të shkruar. Kemi mundësi që kërkesat tona t’i kalojmë në KQZ për ndryshime kushtetuese, për ta bërë Shqipërinë si gjithë Europa. Amerika, Europa s’kanë mandate të pakufizuara. Ne mund ta realizojmë këtë me referendum. Askush s’mund të marrë vendime në kurriz të shqiptarëve, i vetëm”, tha protestuesja.

Një protestuese e pranishme në tubimin para Kryeministrisë, tha gjatë fjalës së saj se qytetarët që ndodhen në shesh, nuk kanë atje për asnjë parti politike.

Ajo theksoi gjithashtu se protestuesit nuk janë kundër një shteti të caktuar, si dhe nuk kanë kundërshti fetare.

“Të gjithë ne këtu që jemi në shesh nuk jemi për asnjë parti politike, nuk jemi kundër asnjë shteti, nuk jemi as për përkrahje dhe as kundërshti fetare. Kultura na ka treguar se jemi tolerant ndaj feve. Për të drejtën e përbashkët jemi bashkë, pa asnjë kusht dhe kriter. Këtu në shesh jemi për vendin tonë, për atdheun tonë. Për të ardhmen tonë që meritojmë. Kur përmend mëmëdheun, ndjej një mëmë që i ka fëmijët e saj larg. Mos ta lëmë mëmëdheun tonë, të qëndrojmë bashkë, do ja dalim”, tha një protestuese.

Menjëherë pas podiumit ku po mbahen fjalimet përpara kryeministrisë, ndodhet Dritan Goxhaj. Një natë më parë, ai renditi kërkesat kundrejt qeverisë, të paraqitura në emër të grupit të organizatorëve.

Goxhaj është një emër më dritëhije të shumta. Me një të kaluar të veshur me lavdinë e pjesëmarrjes në luftën e UÇK-së në Kosovë, aktualisht ai shfaqet si një ekstremist islamik, antisemit dhe antiamerikan që e quan Izraelin shtet terrorist, duke glorifikuar Iranin dhe Hezbollahun. 

Në një deklaratë para kamerave, qytetarja me fëmijë në krahë, e cila iu kundërvu Arben Kolës për mënyrën si organizatorët po vijojnë protestën, foli me lot në sy për sjelljen e tyre.

“Vjen emigranti i revoltuar, del ai tjetri i thotë mos fol? Dua të shpërthej se s’mban më! Si unë ka 1000 të tjerë!”, tha vajza.

Ndërsa ajo vijonte të fliste edhe kundër qeverisë Rama, një tjetër qytetare iu bashkua mendimit të saj për aktet e organizatorëve.

Qytetarja: Këta po na mbledhin dhe po na tallin!

Vajza: Sa do të vazhdojë ai? Fillojnë plazhin, zhduken pastaj, s’kanë faj se janë lodhur! Do të vazhdojnë prapë këta me paqe? Nuk ka paqe këtu!

Një zë ndryshe mes protestuesve të grumbulluar në sheshin ‘Skënderbej.’ Ndërsa pritej të niste marshimi drejt kryeministrisë dhe aktivisti Arben Kola po u drejtohej me megafon të pranishmëve, një vajzë me një fëmijë në krahë i tha se nevojitej revoltë.

Ajo kritikoi sjelljen e organizatorëve të protestës ndaj emigrantëve dhe i akuzoi si shkak që po zhbëjnë protestën çdo ditë. Më tej, i tha se njerëzit duan të ikin drejt parlamentit (gjë që të pranishmit e brohoritën) dhe jo kryeministrisë, por organizatorët i pengojnë.

Vajza: Duhet revoltë o vëlla! A ke revoltë? Apo vetëm megafonin në dorë?

Arben Kola: Po mos të kisha revoltë, s’do të kisha dalë këtu në shesh!

Vajza: S’është revoltë kjo, me paqe!

Arben Kola: Si është revolta?

Vajza: Unë i dal përballë atij! Unë jam e para që vij!

Thirrje në kor: Bravo!

Vajza: Erdhën emigrantët dhe i përzutë!

Arben Kola: Kush i përzunë?

Vajza: I përzutë ju, s’i latë të flisnin! U bë rrëmujë aty! Po bie protesta çdo ditë prej jush! Ne duam të ikim te parlamenti tani, pse na drejtoni te kryeministria! Kush je ti që më drejton mua?

Thirrje në kor: Bravo!

Arben Kola: Ik, e lirë je!

Vajza: Ju të ndaloni, thoni mos!

Një qytetare: Bravo, ke shumë të drejtë! Edhe unë u habita, gjithë ajo autokolonë!

Për të zbehur thirrjet e saj, Arben Kola ngriti sërish megafonin duke shqiptuar sërish “dorëheqje”, por vajza nuk u spraps.

Vajza: Unë dua ta rris fëmijën këtu! Unë dua ta rris në Shqipëri! S’dua protagonizëm, jam njeri i thjeshtë! Dua drejtësi për jetën time, për fëmijën tim!

Në mes të kësaj situate Arben Kola nis marshimin, ndërsa vajza e pyet: “Pse ikën o zotëri, pse nuk dëgjon?” Marshimi vijon, ndërsa ai bën thirrjet “bashkohuni me ne” e “Shqipëri e re.”

Sapo kanë kaluar disa minuta nga ora 19:00 e mbrëmjes, por temperaturat vijojnë të jenë të larta. Në ndihmë të protestuesve që kanë nisur të grumbullohen në sheshin ‘Skënderbej’ në kryeqytet, ka ardhur një grua e cila po shpërndan shishe uji falas.

Kujtojmë që disa ditë më parë, protestuesit njoftuan ndryshimin e orarit të grumbullimit duke e shtyrë me një orë (19:00) për shkak të vapës.