Vrasja e babë e bir, dëshmon në gjykatë ish e dashura e Besmir Dedjas, konfirmon njohjen me Ervis Bardhin të penduarin e SPAK që tregoi krimin

Në Gjykatën e Elbasanit vijon gjyqi për vrasjen e babë e birë, Gentian dhe Nezir Beqiri, në vitin 2012. Për këtë ngjarje, SPAK pa marrë të pandehur Etien Cani, Klajdi Dokoli, Ardjan Çapja, Florenc Çapja dhe Olsi Leku. Në seancën e radhës ka dëshmuar Joniana Hasani, ish e dashura e Besmir Dedes, shokut të Ervis Bardhit, që prej disa vitesh është bërë bashkëpunëtori i prokurorisë. Sipas rrëfimit të Ervis Bardhit, vrasjen e Gentianit, i cili ndodhej në “Arrest shtëpie” e ka kryer vetë Ervis Bardhi, i cili ishte shok me Beqirin dhe hynte e dilte në këtë banesë. Ndërsa vrasjen e babait të Gentian, Nezir Beqiri, e ka kryer Olsi Leku.

Joniana Hasani, ishte thirrur disa herë me radhë nga gjykata, por Policia e Shtetit, nuk kishte bërë të mundur gjetjen e saj. Pas disa muaj kërkimesh, Hasani është lokalizuar dhe më pas paraqitur në ambientet e gjykatës së posaçme.

Hasani u ka thënë gjyqtarëve se disa vite më parë ka pasur një marrëdhënie shoqërore me Besmir Dedja. Ajo tregoi se për shkak të shoqërisë me këtë person, ajo kishte takuar 2 apo tre herë dhe shokun e të dashurit, Ervis Bardhin.

Sipas vajzës, si Dedja dhe Bardhi, konsumonin hashash. Ndërsa për ngjarjen e vrasjes së Gentian dhe Nezir Beqirit, Joniana Hasani, deklaroi se nuk kishte asnjë dijeni se çfarë ka ndodhur dhe kush mund të ishte autori.

Dëshmitarja ishte thirrur nga prokuroria për të provuar njohjes mes Ervis Bardhit dhe Besmir Dedjas, person ky që bashkëpunëtori i prokurorisë ka treguar se pas vrasjes së dyfishtë në 25 gusht 2012, ai ishte larguar dhe strehuar në banesën e mikut të tij, Besmir Dedja.

Në seancën e djeshme, ishte thirrur dhe ish-punonjësi i policisë, Neshat Budani, që në 2012 ishte caktuar me shërbim ruajtje pranë banesës ku qëndronte, Gentian Beqiri, i cili ishte me “arrest shtëpie” për shkak të vrasjes së Sokol Çapjas në 2005.

Budani u transportua me ambulancë nga Elbasani në Gjykatën e Posaçme SPAK, pasi vuan nga sëmundja e diabetit. Budani nuk ka pranuar të flasë fare para gjykatës, duke treguar se nuk ishte në gjendje të mirë shëndetësore.

Pas daljes nga salla të këtij dëshmitari, trupi gjykues ngarkoi prokurorin e çështjes Behar Dibra, që të gjejë dhe paraqesë në seancën e radhës të 11 Majit, dy procesverbale të ndryshme të përpiluara nga Oficerët e Policisë Gjyqësore në Elbasan.

Si ndodhi vrasja e Gentian dhe Nezir Beqirit?

Ata u vranë në banesën e tyre, ku Gentian Beqiri allias Ardian Meta ishte në ‘arrest shtëpie’ dhe ruhej me dy policë në derën e shtëpisë, pasi akuzohej si autor i vrasjes së biznesmenit të njohur Sokol Çapja, ngjarje kjo e ndodhur në dhjetor të vitit 2005.

Vrasja e Gentian Beqirit, është kryer në ambientet e brendshme të banesës së tij, që ndodhet në lagjen “Sporti i vjetër” në Elbasan, ku teksa qëndronte i shtrirë në krevat pasi ishte i paralizuar është qëlluar për vdekje me 7 plumba të një pistolete me silenciator dhe më pas mbytën edhe babanë e tij Nezir Beqiri. Kjo ndodhi ndërkohë që jashtë derës së shtëpisë ruanin dy efektivat e policisë, të cilët u akuzuan më pas për “Shpërdorim detyre”.

Konfliktet e fisit Çapja

Gjithçka nisi në vitin 2005. Mes killerit me pagesë Dritan Sheme dhe njërit prej vëllezërve Çapja në Elbasan dhe më konkretisht Sokolit ishte lidhur një kontratë vdekje, ku qëllimi ishte eliminimi fizik i Rezart Çelës, i cili në vitin 2005, po mbante shtrënguar Sokol Çapjen, për shumë makineta bixhozi në qarkun e Elbasanit, të cilat në fakt ishin në pronësi të një italiani të quajtur, Paolo Mazzuco. “Kontrata e vdekjes” ishte lidhur me një vlerë 30 mijë euro, ku fillimisht Sokol Çapja kishte dhënë një pagesë prej 15 mijë euro paradhënie dhe diferenca tjetër prej 15 mijë euro, do të merrej sapo Dritan Sheme, të kishte çuar deri në fund punën e marrë përsipër, vrasjen e Rezart Çelës.

Sheme, si një killer profesionit, ekzekutoi në tetor 2005 Rezart Çelën, dhe pas disa ditësh paraqitet tek Sokol Çapja, për të kërkuar diferencën prej 15 mijë euro. Mirëpo Sokoli, pasi u lirua nga Rezart Çela, hyri në një gjendje euforie dhe nuk donte t’ia jepte kusurin e shumës së rënë dakord me Dritan Shemen. Sokol Çapja, duke qenë i influencuar nga Kamer Mehja, i cili i thoshte Sokolit se nuk duhej të kishte frikë nga Dritan Sheme, i thoshte: “...nuk duhet të kesh frikë nga Dritani, i cili është i gjatë një metër e gjysmë, kurse ti je dy metra...".

Kontrata e vdekjes mes Shemes dhe Çapjat u shpjegua nga Elton Mema, djali i Fadil Memës, i cili ishte pyetur nga prokurori Ritvan Suka në 14 shkurt 2019 në ambientet e gjykatës së Torinos, në prani të kolonelit italian Paolo Palazzo dhe Antonio Nicolletta dhe prokurorit Italian, Cezare Parodi. Në dëshminë që Elton Mema shpjegoi se ngatërresa me Çapjat ndodhi pikërisht kur babai i tij, donte të festonte ditëlindjen e 40-të, në lokalin e tyre “Univers”,ku Çapjat e kushtëzuan se nuk e donin prezencën e kushëririt të tyre Dritan Sheme në lokal.

Kalvari i vrasjeve në vite

2005

Për hakmarrje, me 26 dhjetor të vitit 2005, në një lokal pranë universitetit të Elbasanit, tre persona qëlluan ndaj Sokol Çapes, pronari i hotel Universit në Elbasan. Autorët pasi hynë në lokal iu kërkuan të klientëve që të shtriheshin ndërsa iu drejtuan Sokol Çapes duke e qëlluar atë dhe duke e lënë të plagosur rëndë, ndërsa vdiq në spital. Të dyshuar për këtë krim, policia arrestoi Armand Hasanin, kunati i Fadil Memës Dritan Shemen, si dhe Gentian Beqirin, i njohur edhe me emrin Ardian Meta. Beqiri, u dënua me 25 vite burg në Gjykatën e Apelit në Durrës, por Gjykata e Lartë riktheu çështjen ndërsa Beqiri u la në arrest shtëpie. Ai u vra me 16 gusht të vitit 2012, ndërsa dy person iu afruan banesës që ruhej me policë dhe iu prezantuan atyre se ishin djemtë e tezes së Gentian Beqirajt. Në të njëjtën ngjarje mbeti i vdekur edhe babai i tij, Nezir Beqiraj.

2006

Pas vrasjes së Çapjes në vitin 2005, me 19 qershor 2006, u vra Dritan Sheme në një banesë në kryeqytet, pak kohë pasi ishte kthyer në Shqipëri nga Italia. Për këtë krim, policia nuk ka identifikuar dot të dyshuarit.

2006

Po në vitin 2006, mbeti i vrarë kunati i Fadil Memës, Ardian Ibrahimi, i cili u qëllua pranë autoshkollës që ishte në pronësi të Memës. Po ashtu edhe për këtë ngjarje, nuk pati persona të ndaluar apo të arrestuar pavarësisht se u shoqëruan shumë të tillë.

2009

Ndërkaq në vitin 2009, mbeti i vrarë ish- efektivi i antidrogës së Elbasanit Roland Rexhepi, i njohur edhe me nofkën Doda. Për këtë krim ishin dyshuar dhe u ndaluan, Armand Llaka e Marjus Tafa e Arben Jace. Gjykata nuk i vlerësoi provat e ofruara nga prokuroria, duke liruar të dyshuarit.

2012

Ndërkaq në vitin 2012, në banesën e tij u vra Gentian Beiqiri, bashkë me babain e tij Nazim Beqiri, i cili ishte i njohur edhe si një nga miqtë e ngushtë të Fadil Memës. Për këtë krim, policia arrestoi Arben Jaçen dhe Florenc Çapjen. Edhe në këtë rast ashtu si në rastin e Rexhepit, personat u lanë të lire për mungesë provash. Jaçe pati pretenduar se gjithçka ndaj tij ishte një inskenim pa asnjë provë.

13 Mars 2015

Me 13 mars 2013, u vra në Torino të Italisë, Fadil Mema. Ai u qëllua në mbrëmje me armë zjarri duke marrë 6 plagë, poshtë shtëpisë së tij. Djali i tij Eltoni iu pohoi mediave italiane se ata i dinin autorët e vrasjes së babait të tij. Gjithë seriali i vrasjeve, i pandëshkuar nga drejtësia solli edhe masakrën e mbrëmshme me tre të vrarë dhe 8 të plagosur.

Shkurt 2016

Një atentat me armë zjarri i mori jetën një tjetër anëtari të fisit Çapja, Agron Çapja, si dhe dy personave të tjerë: Eno Bedalli dhe Ardit Sinakolli.

Përplasjet mes fiseve në Elbasan

26.12.2005 vritet Sokol Çapja
28.05.2006 vritet Ardian Ibrahimi
15.08.2012 vritet Gentian Beqiraj
15.08.2012 vritet Nezir Beqiraj
16.08.2012 plagoset Fadil Mema
13.03.2015 vritet Fadil Mema
03.02.2016 vritet Eno Badelli
03.02.2016 vritet Ardit Sinakolli
03.02.2016 vritet Agron Çapja

SI.E./K.T./Shqiptarja.com

TAG:
• fisi capja
• Besmir Dedja
• gentian beqiri
• nezir beqiri
• Ervis Bardhi
• Joniana Hasani
• neshat budani