Një artiste që, ndonëse nuk është shqiptare, ka zgjedhur Shqipërinë si shtëpinë e saj dhe ka krijuar një lidhje të veçantë me muzikën tonë. E njohur për interpretimet e saj në gjuhën shqipe, veçanërisht për këngët e ikonës së muzikës shqiptare Vaçe Zela, ajo ka fituar zemrat e publikut me ndjeshmërinë dhe respektin ndaj traditës sonë muzikore. Prej rreth dy vitesh jeton në Tiranë së bashku me bashkëshortin e saj. Me Sara Payman, e lindur dhe rritur në Angli, me origjinë iraniano-indiane, ndajmë në "Rreze Dielli" momente të bukura artistike dhe personale: nga albumi që pritet të publikohet së shpejti, te jeta e saj në Tiranë me familjen e bashkëshortit, i cili është rritur në Shqipëri dhe ka origjinë iraniano-gjermane. Një histori dashurie që ka kaluar kufij, tre dasma në vende të ndryshme, një pasion i madh për muzikën, edhe pse e diplomuar në Universitetin e Kembrixhit për stomatologji. Në këtë bisedë do të flasim për jetesën mes kulturave të ndryshme, për artin, por edhe për gatimin: cila është kuzhina e saj e preferuar, sa e njeh traditën tonë kulinare dhe pse jo, do të mësojmë edhe një nga recetat e saj të preferuara nga kuzhina persiane.