Adile Hoxha është një 37 vjeçare shqiptaro - filipineze shumë e njohur në Tik Tok, ku ndiqet nga 2 milion ndjekës. Ajo poston edhe video në shqip ku ndan historinë e familjes së saj dhe mban gjallë gjuhën apo traditat shqiptare të trashëguara nga i ati  Ekrem Hoxha, i biri i Daut Hoxhës. Adile rrëfeu në "Rreze Dielli" se si nisi historia e dashurisë mes prindërve të saj, emigrimin e të atit 16 vjeç nga Shqipëria në 1946 dhe deri tek emri, të cilin e ka marrë nga gjyshja çame. I ati ka ndërruar jetë para 3 vitesh dhe për Adilen kjo ishte një humbje e madhe, pasi i mungon e folura shqip me të, këngët patriotike, ditëlindjet, gatimet tradicionale etj. Ajo tha se ka ardhur vetëm 5 herë në Shqipëri dhe planifikon ta vizitojë sërish këtë verë. Adile është nënë single, ka një djalë 20 vjeçar, Rizai, të cilin e lindi kur ishte adoleshente. Por kjo nuk e pengoi të studionte në dy fakultete për psikologji dhe shkenca politike e të punojë në fushën e marketingut. Dëshira e saj e madhe është të njohë një djalë shqiptar sipas porosisë të babait.