Vetëm një ditë na ndan nga Dita e Verës, ndaj dhe Rreze Dielli sot hapet me shkëlqimin e fëmijëve të “Kako Dance Academy” që na dhurojnë një performancë festive plot ngjyra. Ndërsa në këndin e gatimit dy gjimnazistet nga Elbasani Desilda Kovaçi dhe Elvinsa Rançi përgatisin Ballokumet tradicionale të Ditës së Verës dhe një Byrek me qumësht, vezë dhe djathë.  

Në prag të Ditës së Verës, një nga festat më të dashura dhe më të lashta të traditës shqiptare, vëmendja kthehet tek qyteti i Elbasanit, vendi ku kjo festë merr kuptimin e saj më të plotë. Në këtë periudhë, familjet elbasanase nisin përgatitjet për të pritur pranverën me zakone që janë ruajtur brez pas brezi. Mes aromës së gjalpit dhe miellit të misrit që përhapet në kuzhina, përgatiten ballokumet, ëmbëlsira simbol e kësaj dite, ndërsa shtëpitë mbushen me gëzim, kujtime dhe rituale të vjetra. Në këtë bisedë në “Rreze Dielli” do të ndalemi tek traditat e Ditës së Verës, një festë me origjinë pagane që feston ringjalljen e natyrës dhe ardhjen e stinës së ngrohtë. Do të tregojmë për ritualet dhe simbolet fatsjellëse, për përgatitjen e “hisës” dhe të tryezës së Ditës së Verës, si dhe për gatimet tradicionale që nuk mungojnë në këtë ditë të veçantë. Po ashtu, do të zbulojmë edhe sekretin e ballokumeve, recetën dhe mjeshtërinë që i bën ato kaq të veçanta në Elbasan. Për të na rrëfyer më shumë rreth këtyre traditave, në studio do të kemi dy amvisa nga qyteti i bukur i Elbasanit, Merita Çela dhe Lavdije Papri, të cilat do të ndajnë me ne përvojën dhe kujtimet e tyre nga përgatitjet familjare të kësaj feste. Gjithashtu, në bisedë do të bashkohet edhe aktivisti i mjedisit Ervin Skënderi, me të cilin do të flasim për lidhjen e kësaj feste me natyrën dhe mesazhin që ajo përcjell për respektin ndaj mjedisit dhe traditës.