Fokusi te arsimi dhe fuqizimi i të rinjve, BE hap thirrjen për Çmimin e Integrimit të Romëve 2025. Thirrja është e hapur për një gamë të gjerë aplikantësh, duke përfshirë: organizatat e shoqërisë civile, institucionet publike, si bashkitë, shkollat apo qendrat sociale, individët dhe aktivistët, të cilët me punën dhe përkushtimin e tyre kanë sjellë ndryshim në komunitetin Rom, duke luftuar diskriminimin dhe duke krijuar modele të suksesshme integrimi. Ky çmim nuk është thjesht një trofe, por një mirënjohje për ata që me përkushtim dhe vizion kanë ndikuar pozitivisht në jetën e komunitetit Rom. Përmes kësaj nisme, e cila përcillet në studion e “Rreze Dielli” nga aktivistja rome Ina Marku, Bashkimi Evropian synon të tregojë se përfshirja dhe barazia nuk janë vetëm ideale, por realitete të prekshme që ndërtohen çdo ditë nga njerëz dhe organizata që nuk ndalen përballë sfidave. Të dëgjosh një histori suksesi frymëzon, por ta tregosh atë histori është hapi i parë drejt një ndryshimi më të madh. Çmimi i BE-së për Integrimin e Romëve është një ftesë për të ndarë këto histori dhe për të bërë të dukshëm ata që kontribuojnë në një shoqëri më të drejtë dhe të barabartë për të gjithë.