Një ditë e shënuar, festa e dritës dhe e shpresës – Krishtlindja. Një festë e madhe që sot bashkon mijëra besimtarë, por edhe këdo tjetër, duke i dhënë kësaj dite një magji të veçantë që afron zemrat dhe sjell paqe e dashuri. Këtë ditë e nisim në shoqërinë e tre artistëve të talentuar dhe besimtarë të krishterë: Ernis Cili, kantautor; Sabina Mitrovasili, këngëtare; dhe Elvin Muçaj, kompozitor. Përveç një performance të bukur artistike, ata ndajnë me ne mendime dhe mesazhe domethënëse për kuptimin e kësaj feste të shenjtë. Flasim për simbolin e Krishtlindjes, traditat, përgatitjet, tryezën familjare dhe lutjen që bëhet në këtë ditë të veçantë. Si festohen Krishtlindjet në kishë dhe në familje? Cilat janë ritualet që e bëjnë këtë festë kaq të dashur dhe të veçantë? Por njëkohësisht ndalemi edhe te raporti me Zotin, si një bekim që ndikon në jetën tonë të përditshme, duke përcjellë mesazhe kuptimplota, veçanërisht për të rinjtë.