“Një trup i lirë nga tensioni nervor dhe lodhja është vendi ideal që natyra ofron si strehim për një mendje të ekuilibruar dhe plotësisht të aftë për të zgjidhur me sukses të gjitha problemet komplekse të jetës moderne” – kjo është një thënie nga Joseph Pilates, themeluesi i një prej disiplinave të akivitetit fizik, por dhe mendor më të përhapura vitet e fundit, Pilates, një disiplinë stërvitjeje për trupin, e menduar dhe ideuar për të zhvilluar forcën dhe elasticitetin muskulor, për të ndihmuar të ruajmë ekuilibrin midis trupit dhe mendjes. Ushtrimet e saj, të kryera me qetësi dhe saktësi, jo vetëm që përmirësojnë forcën dhe fleksibilitetin, por gjithashtu ndihmojnë në reduktimin e stresit dhe përmirësimin e shëndetit mendor. Pilates është një zgjedhje ideale për ata që kërkojnë një metodë efektive për të përmirësuar shëndetin fizik dhe mendor, me përfitime të shumta që ndikojnë në të gjitha aspektet për një jetë më të shëndetshme dhe më të ekuilibruar. Po çfarë benefitesh specifike marrim nga ushtrimi i pilates, i diskutojmë në studion e “Rreze Dielli” me Linda Kalemin, një prej përqafueseve të para të kësaj disipline në Shqipëri, e cila e sapo kthyer nga Turqia ku ka jetuar me vite, propozon që Pilates t’a fusë në Tiranë  në shërbim të komunitetit, dhe për më tepër falas për të moshuarit.