Pa dyshim qumështi dhe nënproduktet e tij janë ushqimet më të rëndësishme dhe të përdorura në tryezën tonë të përditshme. Nga ferma në tryezë, rrugëtimi i qumështit kalon nëpër disa procese thelbësore, ku cilësia, higjiena dhe siguria ushqimore janë garanci që nuk mund të komprometohen. Por, sa e njohim këtë rrugëtim? Si përzgjidhet qumështi që vjen nga fermerët shqiptarë, cilat janë kontrollet që kryhen për të garantuar sigurinë e tij dhe çfarë fshihet pas procesit të prodhimit të qumështit dhe kosit që konsumojmë çdo ditë? Për të zbuluar më shumë mbi këto procese, për të kuptuar sfidat e industrisë së përpunimit të qumështit dhe rëndësinë e bashkëpunimit me fermerët vendas, teksa gatuajmë në këndin tonë të kuzhinës flasim me Ines Kaja, Menaxhere e Prodhimit në Kompaninë LUFRA, për të kuptuar më shumë për prodhimet vendase si qumështi, gjalpi, kosi e djathi, standardet e cilësisë dhe sigurisë ushqimore, si dhe për përgjegjësinë që mbart çdo produkt përpara se të mbërrijë në tryezën e konsumatorit.