Receta e ditës - Qofte furre me mish dhe speca dhe makarona me perime / Pjesa e parë

6 Qershor 2019, 11:51

Receta e parë: Qofte furre me mish dhe speca

Përbërësit:

Brumi:

500 gr mish i grirë

2 lugë gjelle qepë në rende

2-3 lugë gjelle peksimadhe

Kripë dhe piper i zi

½ lugë çaji piper i kuq

1 kokërr vezë

2 lugë gjelle majdanoz

Garnitura:

4 speca me ngjyrë

3 domate mesatare

2 qepë të kuqe

60 gr pure domate ose salcë domate

80 gr salcë kosi

70 gr djath pice

Përgatitja:

Vendosim në një tas mishin, qepën, peksimadhen, kripë, piper të zi, piper të ku, vezë e majdanoz dhe e punojmë mirë brumin me duar e më pas e lëmë të pushojë në frigorifer për 15-20 minuta. Presim specat në feta rrumbullake me trashësi 1,5-2 cm. I vendosim në një tepsi ku kemi shtruar letër pjekje. Gjithashtu dhe domatet I presim në feta rrumbullake me trashësi 0,5 cm.  Edhe qepët e kuqe i presim në feta rrumbullake. Pjesët anësore të specave dhe domateve  që teprojnë i presim në kubikë shumë të vegjël 0,5 cm dhe i përziejmë me mishin duke e punuar mirë. Mbushim gropëzat e specave duke i ngjeshur mirë ato me brumin e qofteve. Pasi kemi mbushur të gjitha fetat e specave, i lyejmë secilëm me gjysmë luge çaji me salcë ose pure domate. Mbi salcën vendosim nga një fetë me qepë të kuqe. Mbi qepë vendosim një lugë çaji salcë kosi. E lyejmë mrië qepën dhe mbi salcën e kosit vendosim një fetë domate të cilën e spërkatim me pak piper të kuq dhe përsëri me salcë kosi. Vendosim tavën në furrë në temperaturë 200 ºC për 30 minuta. Pasi të kalojë kjo kohë nxjerrim tavën dhe vendosim mbi çdo domate pak djath pice. E vendosim në furrë dhe i lëmë 5 minuta dhe I shërbejmë të ngrohta.