Sot në "Rreze Dielli" flasim për një temë që prek çdo familje: koston dhe sfidat e prindërimit. A është bërë sot më e vështirë të rrisësh një fëmijë? Kush “kushton” më shumë, djemtë apo vajzat? Dhe a po ndikon realiteti ekonomik në vendimin për t’u bërë prind?  Shifrat e fundit tregojnë një rënie drastike të lindjeve krahasuar me vitet ’90. Nga mbi 82 mijë lindje atëherë, sot kemi rreth 21 mijë në vit - një ndryshim i madh që po cilësohet alarmant. Një nga arsyet kryesore, sipas specialistëve, mbetet faktori ekonomik. Sepse të rrisësh një fëmijë ka kosto financiare, emocionale dhe kohore. Dikur kishim më pak të ardhura, por më shumë fëmijë. Sot kemi më shumë shpenzime: kurse private, aktivitete, dado, teknologji, standarde më të larta jetese. Prindërit punojnë më shumë, por shpesh kanë më pak kohë. Megjithatë, përtej çdo fature dhe çdo sakrifice, të jesh nënë apo baba mbetet një nga bekimet më të mëdha. Për ta diskutuar këtë temë nga këndvështrime të ndryshme flasim me:  Silvana Koçibelli, nënë e dy fëmijëve dhe gjyshe; Elidon Shehu, psikolog dhe baba i një vajze; Blerina Gjyriqi, eksperte ekonomie dhe nënë e dy fëmijëve. Si ka ndryshuar prindërimi ndër vite, a është vërtet më e vështirë sot, apo thjesht më e kushtueshme? A mjafton një pagë për të rritur një fëmijë? A duhet të trembemi nëse nuk ua plotësojmë çdo dëshirë fëmijëve tanë? Dhe në fund, a është e vërtetë që të rrisësh një vajzë kushton më shumë se një djalë.