Thyejnë xhamat e Prefekturës dhe bllokojnë rrugët/ Protesta në Shkodër dhe Kavajë për çmimin e karburantit, Rama: Janë të PD (VIDEO)

Lulzim Basha ka dështuar sot që të shesë si protesta qytetare ato që organizoi PD dhe bashkitë që drejtohen prej saj në Vaun e Dejës, Shkodër e Kavajë. Kjo jo vetëm për shkak të numrit të ulët të pjesëmarrësve nga radhët e PD, por edhe për arsyen tjetër, atë të përdorimit të administratës për kapital politik të kryetarit Basha që I ndiqte nga Tirana. Pas Kavajës dhe Vaut të Dejës, ku mediat përcollën me foto dhe emra se si administrata ishte ajo që kishte dalë në protestë, po ju sjellim faktet se kush protestoi në Shkodrën e Voltanës. Voltana, njëlloj si Isa Sakja i  Kavajës e ZeF Hilës i Vaut të Dejës, ka nxjerrë administratën në protestë. Ne po ju sjellim disa nga personat pjesëmarrës në protestë/ Lexo.al

Bashkia e Lezhës ka reaguar pas deklaratave të kryeministrit Rama se në protestë ishin punonjësit e bashkive të drejtuara nga PD. “Bashkia Lezhë sqaron opinion publik se asnjë punonjës i këtij institucioni nuk është në protestën që po mbahet në Shkodër, të paktën në mënyrë të organizuar. Sa i përket banorëve të Lezhës,kjo është një përgjigje që mund ta japin si grupe interesi” thuhet në deklaratën e bashkisë së Lezhës, që drejtohet nga Fan Frrokaj i zgjedhur nga radhët e PD.

Njëri nga protestuesit në Shkodër ka hedhur sende të forta në drejtim të Prefekturës duke thyer një xham, ndërsa kanë vijuar me thirrjet kundër qeverisë Rama. Pas mbi një orë protestë në lagjen Xhabije dhe në rrugët e qytetit janë shpërndarë duke paralajmëruar sërish protestë.

Me rreth të kuq xhami i thyer te godina e Prefekturës në Shkodër

Protestuesit në fshatin Kosmac të Shkodrës pas bllokimit të rrugës pasditen e sotme për 60 minuta kanë paralajmëruar se do të rikthehen sërish nesër në të njëjtën orë.

Një grup banorësh të Kavajës kanë bllokuar rrugën, ndërsa nuk ka ndërhyrje nga policia.

Pas rreth një ore bllokim banorët e fshatit Kosmac kanë mbyllur protestën duke liruar aksin rrugor Shkodër-Lezhë. Banorët protestuan për mungesën e tregut, ndërsa kërkuan uljen e çmimit të karburantit.

Edhe disa banorë të Kavajës janë solidarizuar me protestën e studentëve në Tiranë, por kanë edhe një kërkesë tjetër me karakter ekonomik, uljen e çmimit të karburantit. Ata kanë bllokuar për disa minuta autostradën, ndërsa kanë paralajmëruar se protesta do të vijojë edhe nesër.

Kryetari i Sindikatës së Arsimit në Shkodër Arjan Peraj  bëri thirrje për bojkot të mësimit nga mësuesit dhe maturantët. “Bojkotoni mësimin, të gjithë mësuesit dhe maturantët, cdo ditë këtu për të protestuar në orën 16:00”.

Protesta e qytetarëve në Shkodër po mbështetet nga simpatizantë të Partisë Demokratike.

Pas protestave lokale kundër qeverisë në Lezhë, Shkodër e Kavajë ka reaguar kryeministri Rama, i cili thotë se janë punonjës të bashkive që drejtohen nga demokratët.

Interesant! Punonjësit e bashkisë Lezhë protestojnë si fermerë, të bashkisë Shkodër si shoferë dhe të bashkisë Kavajë si francezë. Studentët s'duhet të dialogojnë, po duhen mbajtur peng me çdo kusht që të përdoren si qendër graviteti e revolucionit të Lulit&Monikës. Jo politikë?

Edi Rama, kryeministër

Ndërkohë që në hyrje të Shkodrës janë në protestë disa grupe interesi; të prekurit nga përmbytjet vitet e kaluara, sindikata e mësuesve, e taksive, studentët, por edhe qytetarë të thjeshtë. Protesta po zhvillohet në lagjen Xhabije. “Sot ka një mijë arsye që protestojmë, por kryesoja është mbështetja e studentëve në Tiranë” tha njëri nga banorët.

Protestuesit në fshatin Kosmac kërkuan uljen e çmimit të karburanteve dhe lëshuan thirrje kundër kryeministrit Edi Rama. “Poshtë Edi Rama, qeveri e krimit, Edi Rama o laper prite Shkodrën se po vjen” janë disa nga thirrjet e protestuesve në fshatin Kosmac.