Aktori turk Can Yaman është liruar pas disa orësh pasi u arrestua në Turqi në kuadër të një hetimi për trafikimin dhe konsumimin e lëndëve narkotike mes personazheve të njohur, gazetarëve dhe VIP-ave të Stambollit. Yaman, shumë i famshëm për rolet e tij si protagonist në disa seriale televizive të suksesshme, është arrestuar së bashku me edhe 6 persona të tjerë, mes të cilëve edhe aktorja Selen Gorguzel.

Shtatë të arrestuarit iu nënshtruan një sërë testesh në Institutin e Mjekësisë Ligjore, me qëllim verifikimin nëse, kur dhe çfarë lloj droge kanë konsumuar. Ndërkohë, policia gjatë natës së kaluar ka kryer bastisje në 9 klube nate të ndryshme në metropolin buzë Bosforit, duke arrestuar disa shpërndarës droge dhe menaxherët e lokaleve ku dyshohet se shiteshin substanca narkotike.

Në javët e fundit, në kuadër të të njëjtit hetim, më shumë se 20 personazhe të botës së spektaklit, VIP-a dhe gazetarë kishin rënë në rrjetën e policisë. Yaman u dërgua së bashku me të arrestuarit e tjerë, përfshirë edhe menaxherë lokalesh, në Institutin e Mjekësisë Ligjore të Stambollit për të verifikuar përdorimin e mundshëm të drogës. Operacioni drejtohej nga Zyra Hetimore për Kontrabandën, Trafikun e Narkotikëve dhe Krimet Ekonomike e Prokurorisë së Përgjithshme të Stambollit.

Sipas asaj që raportojnë mediat turke, prokuroria nuk kishte lëshuar një urdhër-arrest për Can Yaman në kuadër të hetimeve që po zhvilloheshin. Aktori dyshohet se është gjetur me lëndë narkotike me vete ndërsa ndodhej brenda njërit prej lokaleve të kontrolluara gjatë operacionit dhe për këtë arsye u vendos në pranga.

Rendit zhvillimet sipas orarit:
Ora 14:00
U arrestua në Turqi pas një hetimi për trafik droge, kush është Can Yaman! Ish-avokati që u bë aktori më i famshëm turk i të gjitha kohërave

I biri i një avokati dhe i një profesoreje letërsie, Can Yaman (i arrestuar në Turqi pasi është përfshirë në një hetim për trafik dhe përdorim droge) ka lindur në Stamboll më 8 nëntor 1989.

I ndjekur nga legjione fansash që jo vetëm e vlerësojnë, por e adhurojnë, të cilët njohin çdo detaj të jetës së tij, e presin gjatë lëvizjeve të tij me shpresën për ta parë dhe, mbi të gjitha, për ta prekur: një shpatull, flokët, çfarëdo qoftë. I bukur, madje për të gjithë shumë i bukur, aktori shkon në Itali pas një suksesi të jashtëzakonshëm me ribërjen e “Sandokan”. Pikërisht për rikthimin në televizion të programit “C’è posta per te”, më 10 janar, ishte paralajmëruar si një nga të ftuarit.

Në një kohë shumë të shkurtër, Yaman është shndërruar në një nga aktorët turq më të famshëm të të gjitha kohërave, edhe pse për të kalimi drejt aktrimit ndodhi pothuajse rastësisht: gjatë një pushimi veror ai kishte takuar menaxherët e tij të ardhshëm, të cilët e bindën të provonte rrugën e spektaklit. Debutimi, pasi kishte punuar për një periudhë si avokat, erdhi në vitin 2014 me serialin “Affari di cuore”, ndërsa suksesi nuk vonoi: në 2017 shpërtheu me “Luna piena” dhe, sidomos, me “Daydreamer – Le ali del sogno”.

Kalimi nga aktor në idhull ishte i shpejtë, i mbështetur edhe nga pamja e tij fizike, edhe pse sipas tij kjo nuk ka qenë kurrë një kartë mbi të cilën ai ka luajtur.

“Janë të tjerët që më kujtojnë gjithmonë se jam i bukur, po të varej nga unë, do ta kisha harruar prej kohësh”, ka thënë ai. Madje, ka shtuar: “Bukuria më ka ndihmuar në punën time? Po të mos isha i bukur, do të kisha pasur edhe më shumë sukses”, kishte deklaruar në një intervistë për Corriere.

Yaman ka interpretuar shpesh edhe në Itali, në seriale shumë të ndjekura si “Viola come il mare”, përkrah Francesca Chillemi, “El Turco” dhe “Sandokan”, një serial me sukses të madh publik.

SI.E./Shqiptarja.com