Basha tregon 3 formulat e grabitjes...a i përdori ato edhe në Rrugën e Kombit?! (VIDEO)

Gjatë deklaratës për mediat, kryedemorkati Lulzim Basha foli për formulën që sipas tij qeveria po përdor për të grabitur buxhetin e shtetit përmes koncensioneve korruptive.  

"Të gjitha janë koncesione dhe kontrata korruptive në përfitim direkt personal të Edi Ramës dhe klientëve të tij, pa asnjë përfitim publik. Formulat e grabitjes janë të thjeshta. Në rastin e koncesionit të rrugëve: Fryrje me disa herë e kostove të ndërtimit dhe mirëmbajtjes së rrugëve për të ndarë të gjitha fondet e fryra me Edi Ramën dhe qeveritarët. Në rastin e koncesionit të pompave, sikurse në koncesionet e plehrave, në koncesionet e shëndetësisë dhe të të gjitha llojeve të tjera formula është: jep kontrata dhjetravjeçare për shërbime pa asnjë kosto dhe rrezik për privatin me çmime të fryra të financuara tërësisht pa asnjë rezik nga buxheti i shtetit, për të ndarë pastaj paratë me Edi Ramën dhe qeveritarët. Forma tjetër e grabitjes është: dhënia e pasurive natyrore në përdorim apo për koncesione mbi burimet natyrore. Bregdeti, pyjet, lumenjtë, mineralet po u jepen privatëve gjoja për investime serioze dhe strategjike, Koncesione hodrocentralesh, privatizim bregdeti, ndërtime në zonat e mbrojtura, të gjitha janë shfrytëzim pa asnjë përfitim apo leverdi ekonomike i pasurive të vendit nga një grusht oligarkësh. E gjithë qeverisja e Edi Ramës tashmë është një aktivitet i përditshëm dhe i vazhdueshëm kriminal. Çdo akt, çdo veprim, çdo firmë e Edi Ramës dhe ministrave bëhet vetëm për të vjedhur, vetëm për të grabitur, vetëm për të përfituar padrejtësisht", tha Basha.

Pyetja e thjeshtë që lind është: Nga e gjen Basha këtë siguri për formulat e grabitjes së pasurive publike përmes koncensioneve. Ai tha se formulat janë mjaft të thjeshta, teksa i sqaroi me detaje. Mos ndoshta këto kanë qenë formula që ai i ka vënë në zbatim kur ka qenë vetë në qeveri? Kujtojmë se Basha është akuzuar për një koncension mjaft abuziv, të lënë ende në mes me rrugën jo totalisht të përfunduar, atë të Rrugës së Kombit.


Lajmi kryesor:

Basha 'bëhet' kryeministër dhe kryeprokuror: Qeveria ime do bëjë ligj kundër korrupsionit qeveritar, ja kë do ndëshkojmë! (VIDEO)


G.M./b.ha./Shqiptarja.com