Çim Peka: Basha nuk ka marrë para nga rusët, por nga Rama, dhe i dërgoi në SHBA për lobim me biznesmenë rusë

Çim Peka thotë se Lulzim Basha nuk ka marrë financime nga rusët, por ka marrë nga kryeminsitri Edi Rama dhe i ka dërguar në SHBA për lobim me biznesmenë që kanë lidhje me rusët. Në një postim në rrjetet sociale, gazetari i televizionit të familjes së Berishës, thotë se Edi Rama sponsorizon liderët rus në Ballkan.

"Jo, Lulzim Basha nuk ka marre financime ruse! Basha ka marre financime nga Rama dhe i ka derguar ne SHBA per lobim me biznesmen qe kane lidhje me ruse. Me kete eshte shantazhuar nga 2017 prej Rames, Lu e Kim. Po, Edi Rama sponsorizon lideret pro rus ne Ballkan. Shikoni qendrimet dhe afrimitetin e tij me Vucic.

Pyetje: Vucic i Rames apo biznesmeni transportues i Bashes eshte me afer Putin?

Ps: Ka vetem nje parti sllave dhe pro ruse ne kete vend.  Ajo eshte ish Partia Komuniste, me vone Partia e Punes, sot Partia Socialiste. Kaq", shkruan gazetari Çim Peka.

Pas daljes së shkrimit të bërë nga Zëri i Amerikës, në të cilën përmendej se në 2017, PD-së i janë dhënë 500 mijë dollarë nga Rusia, Sali Berisha nuk ka nguruar që ta përdorë për të sulmuar Lulzim Bashën. Berisha ka shkuar më tej duke kërkuar rihetim të çështjes.

Historia e dosjes së lobimit rus nga PD

Më 14 nëntor 2017, “Stonington Strategies” raportoi në Departamentin e Drejtësisë se ka marrë dy pagesa nga Partia Demokratike me vlerë totale 500 mijë USD dhe një pagesë të tretë nga “Biniatta Trade LP” në vlerën e 150 mijë USD. Por kush fshihet pas kompanisë “Biniatta Trade”, që rezulton fantazmë e regjistruar në parajsat fiskale dhe çfarë e lidh me rusët? Në një artikull të gjatë hulumtues rreth këtyre pagesave për Muzin Capitol, revista amerikane Mother Jones ngrinte dyshime se pas një pjese të pagesave të bëra nga kompania “Biniatta Trade LP” me bazë në Skoci, për aktivitete lobimi në favor të PD-së para zgjedhjeve të vitit 2016 në Shqipëri, qëndronin biznesmenë rusë. (lexo ketu). 

Asnjëra prej këtyre pagesave nuk rezulton e deklaruar në raportin financiar të dorëzuar nga PD në Komisionin Qendror të Zgjedhjeve për zgjedhjet e 25 qershorit duke ngritur dyshime për origjinën e paravee  duke sjellë nisjen e hetimeve nga prokuroria. Më pas prokuroria u tërhoq nga akuza për pastrim parash dhe Gjykata pushoi çështjen e ngritur për falsifikim dokumentash ndaj Lulzim Bashës, Arben Ristanit dhe Ilir Dervishajt lidhur me pagesat për firmën Muzin. Ish-kryetari i Partisë Demokratike, Lulzim Basha ka dhënë shpjegime të ndryshme për pagesën 500 mijë dollarëshe, duke u shprehur në fillim se ajo u dha nga shqiptaro-amerikanët, por më pas është shprehur se “Çfarë ka bërë lobuesi dhe si e ka bërë lobuesi e di ai. Janë marrëdhënie të firmës Muzin me palë të treta”.

M.Q./Shqiptarja.com

TAG:
• lulzim basha
• lobimi rus per pd
• Çim Peka