Dëbohet ambasadori dhe diplomati iranian, Basha: Lufta kundër terrorizmit kompromentohet kur s'ka luftë ndaj krimit të organizuar në vend

Kryetari i Partisë Demokratike, Lulzim Basha ka reaguar këtë të enjte ndaj vendimit të kryeministrit Edi Rama për të dëbuar nga Shqipëria ambasadorin e Iranit dhe një diplomat.

Në një postim në rrjetin social “Twitter”, Basha shkruan se lufta kundër terrorizmit kompromentohet kur nuk zhvillohet paralelisht një luftë pa kompromise ndaj krimit të organizuar brenda vendit.“Çdo bashkëjetesë shtetërore me krimin e organizuar është kompromentim i luftës ndaj terrorizmit”, shkruan më tej Basha.

Ndërsa në deklaratën zyrtare të Partisë Demokratike shprehet mbështetja për shpalljen “non grata” dhe dëbimin e diplomatëve iranianë, ndërsa kërkohet prej strukturave shtetërore të Sigurisë Kombëtare përkushtim të qëndrueshëm dhe bashkëpunim pa zvarritje me aleatët strategjikë.

Pak më parë ndaj të njëjtës cështje ka reaguar dhe ish-kryeministri Sali Berisha, i cili e ka cilësuar vendimin si të ardhur "pas një veprimtarie të rrezikshme, komplotiste, të papajtueshme me statusin e tyre diplomatik në drejtim të muxhahedinëve iranianë që jetojnë si azilantë politikë në vendin tonë."

Ditën e djeshme u bë me dije se ambasadori iranian Gholamhossein Mohammadnia dhe një diplomat, identiteti i të cilit nuk është bërë i ditur, u dëbuan nga vendi nën arsyen e cenimit ë sigurisë kombëtare. Ndaj këtij vendimi kanë ardhur edhe një sërë reagimesh nga SHBA, ku shprehet aprovimi dhe mbështetja e tyre ndaj hapit të ndërmarrë nga qeveria shqiptare. (Lexo këtu)

Postimi i plotë Lulzim Bashës në rrjetin social "Twitter"

TAG:
• lulzim basha
• debimi i iranianeve