Fitoi finalen me 1 pikë, Trepça kampione në Vlorë për herë të parë në Ligën Unike! Humor gjatë festës, dëmtohet trofeu

Në një atmosferë tepër të zjarrtë dhe të denjë për një finale, Trepça e Mitrovicës fitoi Ligën Unike në Vlorë përballë Yllit të Suharekës.

Në pallatin e sportit të Vlorës, ku shumë tifozë shqiptarë nga Kosova kishin udhëtuar për të ndjekur skuadrat e tyre, Trepça fitoi me rezultatin e ngushtë 67-66.

“Ishte ndeshja shumë e fortë dhe e përgëzoj Yllin për këtë. Ishte shumë burrërore si lojë dhe finalet janë gjithmonë të vështira,”-u shpreh Drilon Hajrizi, basketbollist i Trepçës.

LEXO EDHE:
Basketboll meshkuj/ Besëlidhja 'ia merr dorën' Tiranës, e mposht edhe në ndeshjen e dytë dhe shkon në finale

“Është kupa e tretë me rradhë që kemi fituar, por vlera e kësaj kupe është e shumëfishtë. Ne jemi të Mitrovicës dhe lidhja me Vlorën është që prej Isa Boletinit dhe Ismail Qemalin. Për këtë arsye kjo kupë e shton vlerën edhe më shumë në një kohë që kur kjo ligë është bërë për bashkimin e trojeve shqiptare,”-tha Izet Tahiri, trajner i Trepçës.

Momenti i ngritjes së trofeut shkaktoi edhe pak ilaritet në pallatin e sportit, pasi trofeu në duart e kapitenit të Trepçës u shpërbë. Megjithatë kjo nuk e pengoi skuadrën nga Mitrovica të festonte gjatë. Liga Unike është një kompeticion me 8 skuadra, 4 nga Shqipëria dhe 4 nga Kosova, ndërsa përveç rritjes së cilësisë si qëllim ka edhe bashkimin përmes sportit të dy vendeve shqipfolëse.

Ne.k./Shqiptarja.com

TAG:
• liga unike
• basketboll
• Trepça
• Ylli