Koronavirusi/ Rama: Ndalohet menjëherë dalja tek liqeni në Tiranë dhe në çdo zonë rekreative në gjithë Shqipërinë

Kryeministri Edi Rama ka zbuluar se si po i kalon këto ditë në shtëpi si masë parandaluese ndaj koronavirusit në kushtet kur Shqipëria është vënë thuajse në shtetrrethim me bllokim qarkullimi, kufijsh e bare e restorante, palestra e zyrat e shërbimeve.

"Dhe meqë po rrimë në shtëpi të gjithë dhe po luftojmë secili me ato zakonet e jetës së përditshme duke ngrënë vetën për të mos bërë gjërat që jemi mësuar të bëjmë. Duke u përpjekur të përfitojmë edhe pozitivisht nga disa të mira të kësaj të keqeje të madhe, po iu tregoj një nga gjerat që bëj unë, ushtrime frymëmarrjeje yoga të thjeshta, dhe ushqim vetëm në harkun e 8 orëve dy vakte, me 16 orë agjërim, e kam me prove që është super për trupin dhe mendjen. Kush do le ta provojë në shtëpi jemi dhe do të më japë të drejtë. Më e mira do bëhet me besim dhe durim", tha Rama.

Kreu i qeverisë tha se situata me koronavirusin është një luftë e vërtetë.

"Kjo jeta e re që sapo ka nisur nuk është si stërvitjet ushtarake në kohën e zborit kur na zgjonim me sirena në 3 të mëngjesit me një alar fals për agresionin anglo-amerikan dhe na nisnin...unë të paktën andej e kam bërë zborin kodrave të Mamurrasit për të rrëzuar me ato karabinat tona model 56 avionët bombardues të imperializmit. Kjo është luftë e vërtetë me armik të vërtetë që ka sulmuar mbarë njerëzimit dhe që ka aftësinë të godasë në mënyrë të frikshme sistemet e mbrojtjes shëndetësore të cdo vendi pa asnjë zhvillim, sado i zhvilluar apo më pak i zhvilluar. Fati i luftës varet nga cfarë do të bëjmë ne që të mbështesim njëri-tjetrin dhe sistemin shëndetësor. Kjo luftë ka vetëm një armë, durimin.Prandaj miq, durim, durim, durim ", tha Rama

Kryeministri Edi Rama tha se kërkon të tregojë të vërtetën e situatës së koronavirusit në Shqipëri e nisur nga pritshmëritë e ekspertëve, pritet që javët në vijim të ketë numër shumë më të lartë të infektuarish në Shqipëri. Ai tha se nga mesi i marsit dhe fillim prilli do të jetë mundësia të shihen efektet që kanë dhënë masat parandaluese. Nëse nuk do të merren këto kufizime tha ai, do të ketë më shumë qytetarë që kanë nevojë për spital, saqë nuk do të ketë shtretër për t'i përballuar, një situatë kjo që bota e përjetoi ku Rama mori shembull sistemin shëndetësor ekselent të Lombardisë që gjithashtu u fut në kolaps. 

"Më e keqja nuk ka ardhur akoma, as që nuk dua t'ju fus frikën të zbatoni rregullat, por kam detyrë t'ju informoj, të ndaj me ju cdo të vërtetë që ekspertët ndajnë me mua në kohë reale. Përhapja e koronës është e pashmangshme. Virusi prek shumë çfarëdo masash të marrësh, me kufi hapur e mbyllur me lëvizje shumë e me lëvizje pak. Shumica e atyre që do të preken do ta kalojnë pa asnjë shenjë. Ndër ata që kanë shenja shumica do ta kalojnë në shtëpi si një grip të zakonshëm. Shumica e atyre që do të bëhen për spital do të shërohen. Duhen ngulitur në mendjen edhe të paktën dy gjëra të tjera. E para, masat kufizuese janë të domosdoshme për ta ngadalësuar maksimalisht  përhapjen. Sepse nëse nuk e ngadalësojmë përhapjen numri i atyre që do të bëhen për spital do të jetë shumë më i madh se numri i shtretërve që duhen për t'i spitalizuar. Dhe këtë problem e kanë të gjitha vendet nga Amerika tek Gjermania, nga Franca tek Britani, nga Austria tek Italia, ku sic e pamë sistemi ekselent i Lombardisë ra në kolaps. Masat shtrënguese që do të vazhdojmë të marrim na japin kohë teksa bota po kërkon pa pushim ilaçin dhe temperaturat e motit do të rriten gjë që besohet se do ta dobësojë forcën goditëse të këtij armiku të egër. E vërteta që duhet ta dimë të gjithë është se në të paktën javën e ardhshme do të kemi më shumë të infektuar se këtë javë, dhe në javën tjetër pas kësaj ende më shumë. Asnjë panik se kësaj nuk i shmanget dot askush. Është kurba e përhapjes. Pas periudhës së inkubimit virusi shfaqet, zhvillohet dhe shpërndahet me një ritëm që shkon në rritje. Por masat tona do të në ndihmojnë që rritja e këtyre dy javëve kritike të jetë shumë e ulët se sapo të kishim vazhduar jetën normale. Dhe vetëm në javën e tretë mes marsit dhe prillit do të kemi mundësinë të shohim se ku kemi arritur ne dhe ku ka arritur armiku", tha Rama.

Kryeministri Edi Rama tha se gjendja shëndetësore e një prej të infektuarve me koronavirus është më rëndë. 

"Sot kemi 38 persona të identifikuar pozitiv, prej të cilëve 12 të shtruar në spital, 2 prej tyre janë në reanimacion dhe një 65 vjeç mbahet me frymëmmarje të drejtuar nga aparatura", tha ai.