Lutaj: Kreu i SHISH, gafa
e parë kushtetuese e Nishanit

TIRANE - Deputeti socialist Pirro Lutaj, anëtar i Komisionit parlamentar për Sigurinë Kombëtare, denoncoi sot publikisht nga studio e TV A1Report gafën e parë kushtetuese të Presidentit Bujar Nishani në lidhje me kompetencat mes Kreut të Shtetit dhe Kryeministrit për emërimin e shefit të shërbimeve sekrete.

Presidenti Nishani mbrëmë gjatë intervistës së tij të parë pas betimit në Kuvend, në studion e emisionit “Fakt” të gazetarit Çim Peka në UfoTV, deklaroi se “Presidenti s’emëron e shkarkon kreun e SHISH, është kompetencë e Kryeministrit”.

“Ajo që ka thënë Presidenti dje është një nga gjërat më të rënda ëq mund të ketë thënë Presidenti i Republikës në ditën e parë të uljes në karrigen e Kreut të Shtetit”, tha Lutaj gjatë intervistës në A1Report me gazetaren Mira Kazhani. “Është gafë kushtetuese sepse pjesa e katërt e Kushtetutës, në nenin 92 të saj, në mënyrë eksplicite thotë: “Presidenti i Republikës, me propozim të Kryeministrit, emëron drejtorin e Shërbimit Informativ të Shtetit”. Neni 92, gërma F”, shpjegoi Lutaj.

Sipas deputetit socialist, “në qoftë se Presidenti i Republikës, që ditën e parë që u ul në karriken e Kreut të Shtetit, fillon ia delegon kompetencat Kryeministrit të vendit, ky është një shqetësim shumë i madh. Nëse Presidenti e ka deleguar këtë kompetencë, ky është një veprim i rëndë që cenon Kushtetutën dhe nuk është një veprim i thjeshtë për t’u interpretuar sipas dëshirave që kanë njerëzit nëpër studio”.

Lutaj e cilësoi pjesëmarrjen e opozitës dje gjatë ceremonisë së betimit të Presidentit Nishani në Parlament “një detyrim kushtetues për të respektuar institucionin e Presidentit, megjithëse mënyra e zgjedhjes së tij nuk qe fort e këndshme, edhe për sytë e shqiptarëve, edhe për sytë e ndërkombëtarëve”.

(im/shqiptarja.com)

TAG:
• gafa