U rihapën pas 2 muajve karantinë/ Berberët: U çliruam, qeveria të zgjasë orarin! Stomatologia: Do të rrisim çmimet

Qytetarët i janë drejtuar sot dhe klinikave dentare për të marrë shërbim. Orjola Zenelaj, mjeke stomatologe tregon se cdo qytetar pajiset me mjete mbrojtëse, i matet dhe temperatura dhe më pas nis puna. Veshjet mbrojtëse kanë kosto, ndaj dhe Orjola shprehet se nëse kjo situatë vijon do të reflektohet në rritjen e çmimeve.

“Ndikon negativisht në lidhje me punën sepse shton kohën në poltron, kohën në klinik për cdo pacient. Këto janë kosto që mbulohen nga klinika por nëse kjo situatë vazhdon sigurisht që do të jetë një kosto ekstra dhe shpenzim ekstra kështu që ndoshta në një të ardhme mund të na nevojitet që këto kosto të shtohen tek kostot e shërbimit për cdo pacientë.

Orari ne na ndikon shumë negativisht sepse ideja është që në këtë periudhë të gjithë pacientët janë në marrëdhënie pune. Duke qenë se në dy muaj ata nuk e kanë vazhduar punën është e vështirë që ata të marrin leje dhe të vijnë të marrin shërbime dentare”-u shpreh Orjola Zenelaj. Pas një periudhe 2 mujore këto biznese mund të ushtrojnë aktivitetin e tyre, por sikur u shprehën për Report Tv ajo çka i mundon është cështja e orarit.

Sot nisën punën të gjitha parukeritë dhe berberët, por jo të gjithë i kanë respektuar masat e vendosura në protokollin e ministrisë së Shëndetësisë. Nga një vëzhgim në Tiranë jo në të gjitha rastet berberët kanë respektuar distanca 2 metra mes klientëve, apo pajisjen me qese njëpërdorimshme për këpucët e klientëve. Nga vëzhgimi duket se parukeritë janë më të kujdesshme.

Rregullat që do të respektojnë parukeritë dhe berberët
Do të ushtrojnë aktivitetin e tyre nga ora 5 e mëngjesit deri në 17.30 të pasdites
Së pari duhet të garantojnë dezinfektim të ambientit
Duhet të sigurojë ruajtjen e distancës 2 metra mes klientëve
Punonjësit në parukeri duhet të jenë të pajisur me maska dhe doreza si edhe klientët
Në hyrje të subjektit, klienti do të pajiset me veshje plastike qese njëpërdorimshme për këpucët
Karriget, poltronat ku ofrohen shërbimet duhet të vishen me mbështjellëse letre njëpërdorimshme.
Subjektet do të përdorin peshqirë të paketuar dhe çdo klient duhet të trajtohet me peshqir të pastër
Të gjitha pajisjet duhen sterilizuar dhe dezinfektuar pas çdo procesi
Prenotimi për shërbimin do të bëhet online
Në ambientet e biznesit duhet afishuar protokolli i verdhë me të gjitha rregullat
Nuk duhet të lejohet në subjekt asnjë person që ka simptoma të COVID-19.
Asnjë person me temperaturë 37.5 nuk duhet të lejohet të hyjë në subjekt.
Rekomandohet shmangia e parasë cash dhe ofrimi shërbimeve me pagesë me kartë krediti

( Kliko këtu ) Protokolli i plotë që duhet të zbatojnë berberët

Pas dy muajsh karantinë sot mes bizneseve që u rihapën janë edhe berberët. Report Tv ishte në një sallon duke bërë një vëzhgim për të ndjekur nga afër protokollin që po ndiqet për masat për parandalimin e përhapjes së COVID-it.

Klodi, e cila është pronarja e sallonit, tregon se puna ka filluar vrullshëm, pasi që një javë më parë që u dha lajmërimi oraret janë zënë nga klientët. Mirëpo, ka një kërkesë për qeverinë për shtyrjen e orarit të hapjes deri në 20:00, pasi Tirana është zonë e kuqe dhe orari i lejuar është 17:30.

"Pas dy muajve më në fund dhe shyqyr, deri në një muaj edhe duruan, por dy muaj ishte torturë për meshkujt. Rregullat do mundohemi ti mbajmë sa më strikt, janë pak të vështirë, por ne do i zbatojmë. Ky është biznesi jonë, me këtë ushqehemi. Para një jave që e kemi marrë vesh që do të hapemi, oraret janë zënë që ditën që u njoftua.

Jemi goxha të ngarkuar me distancën dhe rregullat e reja, mirë do të ishte deri në orën 20:00, por do të përshtatemi në këto kushte. Këto muaj në cdo drejtim ka qenë një katastrofë e vërtetë. Unë kam edhe një vajzë në klasën e parë, me mësimet online, shumë ngarkesë, por më duket se tani u çliruam.

Sallon përmbush të gjitha standardet, punojmë me orare. Dezinfektimi është bërë, klienti nëse nuk është i pajisur me doreza, ne i kemi" tha Klodi.

Për Arjona Lena, pronare e një salloni bukurie, shprehet se kjo periudhë dy mujore ia ka vlejtur për sigurinë e shëndetit, por tani do ti rikthehen punës.

“Jemi të lumtur që filluam sot. Jemi përshtatur, iu masim temperaturën, kemi dorezat, dezifektantin, maskën për klientin. Kjo periudhe pauze dy mujore për sigurinë tonë ja vlente, tani do fillojmë prap do punojmë sic ishim. Ashtu si lokalet edhe ne punën e kemi më shumë pasdite që kthehen njerëzit nga puna”-u shpreh Arjona Lena.

“Jemi shumë të lumtur. Ishte e nevojshme për shëndetin e të gjithëve kështu që tani u kthyem pothuajse në normalitet dhe është e domosdoshme për femrat. Jemi me maska me doreza me dezifektues me të gjitha, edhe distanca, normalisht ajo është kryesorja”-u shpreh një kliente.