Nezar Seiti, Orlando:Falenderoj
Shqipërinë për ekstradimin

Ministri italian i Drejtësisë, Andrea Orlando ka reaguar për report TV në lidhje me ekstradimin e "Financierit të Habilajve", Nazer Seitit, duke falënderuar autoritetet shqiptare për dorëzimin e tij te drejtësia italiane.

“Falenderoj autoritetet shqiptare të cilat ju përgjigjen menjëherë, kërkesës për ekstradim të shtetasit shqiptar SEITI Nazer, i kërkuar nga autoritetet gjyqësore italiane në kuadër të një hetimi të rëndësishëm ndaj një organizate kriminale që vepronte në fushën e narkotrafikut, në linjat italo-shqiptare", thuhet në reagimin e ministri italian.

Seiti u ekstradua në drejtim të Italisë më 25 janar, për t'u gjykuar lidhur me akuzat e ngritura nga Prokuroria e Cattanias si një prej njerëzve kyç të grupit kriminal të trafikut të drogës Shqipëri-Itali i njohur si grupi "Habilaj". Në një kohë kur në Tiranë akuzohet Ministria e Drejtësisë se shkeli procedurat për ekstradimin, pasi ndaj Seitit ka një masë arresti me burg nga Gjykata e Krimeve të Rënda, ministri italian i Drejtësisë sqaron se autoritetet shqiptare respektuan Konventën Europiane. 

"Dorëzimi i tij respekton në mënyrë koherente angazhimet ndërkombëtare që detyrojnë autoritetet italiane dhe shqiptare, sipas Konventës europiane të ekstradimit të 13.12.1957 dhe Marrëveshjes dypalëshe të firmosur në Tiranë me 3.12.2007.

Kryerja e dorëzimit, i mundëson autoriteteve italiane ushtrimin e plotë të hetimit dhe të jurisdiksionit mbi faktet e rënda që përbëjnë objektin e hetimit të Prokurorisë së Catania-s, pa paragjykuar zhvillimet e procedimit që paralelisht po kryhet nga pala shqiptare, e cila madje mund të përfitojë nga bashkëpunimi i autoriteteve italiane, në bazë të konventave për ndihmën gjyqësore, që janë në fuqi mes dy vendeve tona”, shprehet Orlando për Report TV.

Në 16 tetor 2017, Guardia di Finanza shkatërroi në brigjet italiane një organizatë kriminale shqiptaro-italiane e cila besohet se ka trafikuar tonelata drogë nga Shqipëria. Si kreu i grupit u prangos Moisi Habilaj nga Vlora, i afërm i ish-ministrit të Brendshëm, Saimir Tahiri, si dhe bashkëpunëtorët e tij, shtetasit shqiptar Maridian Sulaj e Fatmir Minaj si dhe ata italianë, Antonio Riela, Vincenzo Spampinato, Gianluca Passavanti, Angelo Busaça.

Grupi kriminal ishte në përgjim që prej vitit 2013, ndërsa në përgjime përmendet edhe ish-ministri Tahiri si i përfshirë në trafikun e kanabisit. Ndaj Tahirit është nisur një hetim nga Prokuroria e Krimeve të Rënda, por kur kanë kaluar tre muaj - ende nuk ka asnjë provë konkrete, përveç përmendjes së emrit në përgjime, që mund të çojë ish-ministrin e Brendshëm përpara Drejtësisë. 


Deklarata e ministrit Andrea Orlando, publikuar në faqen e ministrisë së Drejtësisë Italiane

Er.K.Xh.F/Shqiptarja.com

TAG:
• moisi habilaj