Pas ish-kryetarit të bashkisë së Durrësit Vangjush Dako, ish-kryeprokurorit Adriatik Llalla dhe deputetit Tom Doshi zyrtarë të tjerë të lartë shqiptarë pritet që të shpallen non grata nga Shtetet e Bashkuara të Amerikës. Ambasada e SHBA në Tiranë ka publikuar një mesazh të shkurtër, por të qartë në faqen zyrtare duke deklaruar se lufta kundër korrupsionit është prioritet i saj në Shqipëri.

Ambasada thotë se gjithsej janë 14 shqiptarë të shpallur 'non grata', por nuk i publikon emrat e tyre, ndërsa thekson se raste të tjera po vijnë. SHBA paralajmëron duke u shprehur se zyrtarët e tanishëm dhe të kaluar të korruptuar dhe anëtarët e familjeve të tyre rrezikojnë që të humbin privilegjin për të hyrë në SHBA në të ardhmen.

"Qeveria e Shteteve të Bashkuara është e përkushtuar në luftën kundër korrupsionit dhe respektimin e sundimit të ligjit në mbarë botën. Lufta kundër korrupsionit është prioritet i punës së Ambasadës së Shteteve të Bashkuara në Tiranë.

Këtë javë, ne do të shpjegojmë përcaktimet publike për korrupsion madhor sipas Nenit 7031(c) të legjislacionit të Shteteve të Bashkuara. Kur Shtetet e Bashkuara mësojnë se një zyrtar qeveritar i huaj është përfshirë në korrupsion madhor, Sekretari i Shtetit ka autoritetin të shpallë individët dhe anëtarët e familjes së tij/saj të afërt si të skualifikuar përgjithmonë për të hyrë në Shtetet e Bashkuara

Disa zyrtarë të korruptuar shqiptarë dhe anëtarët e familjeve të tyre janë skualifikuar përgjithmonë për të hyrë në SHBA. Është një ndëshkim i rëndë vetëm për zyrtarët më të korruptuar kudo në botë".

Por si e vendos SHBA-së rastin kur një zyrtar shpallet 'non grata'?

"1. Të kërkuarit, pranuarit apo dhënien e parave, dhuratave, apo përfitimeve të tjera personale në shkëmbim të favoreve, të ofruara për shkak të postit.

2. Përvetësimin e fondeve publike

3. Ndërhyrjen në procese gjyqësore, zgjedhore apo procese të tjera publike.

Sekretari i shtetit mund ta përcaktojë individin dhe anëtarët e familjes në mënyrë publike apo private. Sekretari i shtetit ka përcaktuar publikisht rreth 100 persona në të gjithë botën, 14 prej të cilëve janë shqiptarë. Raste të tjera po vijnë.

SHBA do t'iu hapin dyert zyrtarëve publikë me etikë, ndershmëri dhe përgjegjësi. Zyrtarët e tanishëm dhe të kaluar të korruptuar dhe anëtarët e familjeve të tyre rrezikojnë që të humbin privilegjin për të hyrë në SHBA në të ardhmen" mbyllet mesazhi i ambasadës së SHBA-së. 

SHBA është mbështetësja e fortë e zbatimit të reformës në drejtësi në Shqipëri.