Pas lirimit të bashkëshortit
Andrea kërkon gjykim të shkurtua

Pa kaluar 24 orë nga heqja e masës së sigurisë arrest me burg për bashkëshortin e saj Odhise Andrea, gjyqtarja e lartë e pandehur për korrupsion Majlinda Andrea kërkon nga kolegët e saj gjykim të shkurtuar.

Kjo kërkesë e Andreas u paraqit nga avokati i saj Theodhori Sollaku, ndërsa Kolegji Penal i drejtuar nga Evelina Qirjako vendosi të shtyjë seancën për më 17 Janar aty ku do të shprehet nëse pranojnë apo jo këtë kërkesë. Gjykim të shkurtuar, përveç gjyqtares nën akuzë,  kërkoi dhe Petraq Dashi, Ilia Cabiri dhe Eleni Lino ndërsa bashkëshorti i gjyqtares kërkoi që gjykimi ndaj tij të zhvillohet me procedurë normale.

Prokurori Arben Kraja kërkoi nga gjykata të refuzojë gjykimin e shkurtuar pasi sipas tij procedimi për 5 të pandehurit është i lidhur me prova e fakte të njëjta dhe një copëtim i dosjes do të dëmtonte ecurinë e gjykimit.

Report TV ka mësuar se nga trupa gjykuese e cila një ditë më parë i dha lirinë Odhise Andreas, gjyqtarët Ardian Dvorani dhe Shkëlzen Selimi kanë votuar kundër duke kërkuar qëndrimin e tij në burg.

Ndërsa relatorja Evelina Qirjako dhe anëtarët Medi Bici dhe Artan Zeneli kanë votuar pro lirimit të bashkëshortit të koleges së tyre.
Këtë të premte kolegji shtyu dhe vendimin për lirimin nga qelia të Ilia cabirit e Petraq Dashit dy të vetmit nga pesë të pandehur që qëndrojnë pas hekurave.
Në korrik të 2016 këta pesë të pandehur u vunë nën akuzë pasi prokuroria i hetoi për korrupsion ku me 50 mijë euro Petraq Dashi arriti të blej një vendim gjyqësor në favor të Eleni Linos e Ilia Cabirit.
  Redaksia Online
(B.K/Shqiptarja.com)