Protesta/ Qytetarët këmbëngulin në kërkesat e Goxhajt drejtuar qeverisë! Sulme edhe ndaj Haradinajt dhe Ali Ahmetit! Ndalojnë te selia e PD: Opozitë e shitur

Gjatë marshimit në rrugët e Tiranës, protestuesit janë ‘surprizuar’ nga një i moshuar, që kishte dalë në dritaren e banesës së tij me simbole kombëtare dhe flamurin kombëtar, për të përshëndetur pjesëmarrësit në marshim.

‘Gjyshi, gjyshi’, dëgjohen të thonë protestuesit, për të përshëndetur të moshuarin që kishte dalë në dritare për ta.

Protestuesit janë ndalur gjatë marshimit të tyre në rrugët e Tiranës përballë selisë së Partisë Demokratike.

‘Opozitë e shitur’- thërrasin në kor protestuesit, të cilët prej kohësh kanë kërkuar burgosjen e kryedemokratit Sali Berisha.

Protestuesit gjatë marshimit nëpër Tiranë, janë ndalur përballë Drejtorisë së Përgjithshme të Policisë së Shtetit.

Me thirrjet “mos e shit Shqipërinë për 600 mijë lekë” dhe “poshtë patronazhistët”, protestuesit i kanë kërkuar efektivëve të Policisë që të bashkohen me ta në tubim.

Ish-drejtori i Policisë së Shtetit, Mit’hat Havari, foli në protestën e 27-të para Kryeministrisë. Ai deklaroi se kryeministri Edi Rama do të përfundojë si ish-udhëheqësi libian Muammar Gaddafi, i cili u rrëzua nga pushteti dhe më pas u vra gjatë luftës civile në Libi në vitin 2011, nëse nuk largohet në mënyrë paqësore. Gjatë fjalimit, ai sulmoi edhe Ramush Haradinajn, i cili në një intervistë deklaroi se i vjen turp që protestues nga Kosova kanë marrë pjesë në protestë. Sulm pati edhe për Ali Ahmetin, i cili pati dënuar protestat duke thënë se vendet fqinje duan të godasin turizmin në Shqipëri.

"Rini shqiptare, kohë më parë një person tha për ju se ju vjen erë parfum. Nuk më qëndroi mirë. Juve ju vjen erë Shqipëri, lirie. Juve ju vjen erë demokracie. Djersa juaj është parfumi, që sakrifikoni këtu çdo natë para një bishe të tërbuar që nuk dorëzohet. Nuk dorëzohet se ka kusure në kurriz.

Kur vajza ime foli këtu, ju e mirëpritët. Një zotëri ishte këtu dhe më tha: 'Hajde, fol'. I thashë: 'Fjala e saj është ndryshe'. Edhe juve ju kemi edukuar që të bëheni të zot për atdheun. Ama mos harroni se ju s'mund të jeni ata që jeni sot pa ne, sikundër nesër fëmijët tuaj nuk mund të jenë pa ju.

Luan me fjalë se është në ditë të rënda. Na quan ne antiamerikanë. Besfort Lamallari deklaroi se ishte Rama që vajti në Serbi dhe foli për pavarësinë e Kosovës. Lamallari, të ka përdorur, se ti nuk guxon pa lejen e tij. Fjalët e Ramës ishin flluskë sapuni. Kosovën e çliroi vetë Kosova, me mbështetjen e SHBA-së dhe Britanisë së Madhe. Pa ata, kurrë nuk do të ishte Kosova.

Më vjen keq për dy figura politike. Ramush Haradinaj deklaroi se 'më vjen turp që jam kosovar', për kosovarët që vijnë këtu në protestë. Ne e njohim mirë historinë.

E njohim historinë, ke marrë pafajësinë ti, këtu në shesh janë dy plis, një me shqiponjë e zezë një i bardhë. Një nga veriu një nga jugu. Kosovarët e kanë mbrojtur. Ramush mos harro është vëllazëria shqiptare. Mos harro. Ndaj vijnë këtu nuk i dërgon Albin Kurti. Edhe Ali Ahmeti ishte shqetësuar. Turistët kënaqen kur shohin këtu protestë paqësore e ka marrë vesh gjithë bota. nuk ka bërë vaki se ishim mësuar me molotovë. Do përfundojë si Gadafi nëse nuk largohet në mënyrë paqësore. Të paguajë gjithçka që ka bërë. Hajde Kushner bëj një spital onkologjiku se po tmerrohet populli. Hajde sipas rregullave”, tha ai.

Vogëlushë të shumtë kanë dalë në shesh bashkë më prindërit në ditën e 27-të të protestës në Tiranë. Por, ndërsa prindërit i janë bashkuar tubimit para Kryeministrisë, për të vegjlit kanë gjetur një zgjidhje simbolike. Ata po qëndrojnë në shesh duke pikturuar.

Protestuesit morën fjalën njëri pas tjetrit për të shprehur pakënaqësitë e tyre ndaj qeverisë. Gerta Logu, një protestuese nga Mirdita, ngriti shqetësime për pronat, bujqësinë, administratën publike, shëndetësinë dhe emigracionin, ndërsa kërkoi dorëheqjen e kryeministrit.

“Jam Gerta nga Mirdita. Dy arat që kanë ngjitur me stallën mund të vijë një rus, një serb, një iranian që t'i blejë. Unë nuk i blej dot dhe këtë ma mundësoi qeveria. Kush ka qenë prej jush në spital dhe nuk është ndjerë i poshtëruar? Kush prej jush ka kaluar në doganë dhe nuk është ndjerë i nënshtruar? Administrata publike duhet depolitizuar. Është e pamundur kështu. Injorantët po udhëheqin Mirditën.

Ne jemi këtu kundër të gjithë atyre që janë ulur në atë karrige. Ne jemi këtu për ato nëna që puthin telefonin. Kam lënë Europën për të ardhur në Mirditë, por jo prej teje. Kam ardhur që fëmijët e mi të rriten me gjyshërit. Jam këtu për të gjithë ata njerëz që janë në Amerikë. Ky i hoqi fshatarët nga fshati. Nuk e vlerëson prodhimin vendas. I do të huajat. Si do të ketë turizëm? Si presim turizëm me pulat e Brazilit? Ju po hani kecat brazilianë. Ne na helmojnë. Na kanë helmuar arsimin. Duam dorëheqjen tënde. Po ne na mban Serbia kapur prej fyti”, tha ajo.

Një emigrant shqiptar tha se i është bashkuar protestës me synimin për të rrëzuar kryeministrin Edi Rama. Ai iu sugjeroi protestuesve që të bllokojnë aeroportin e Rinasit dhe portet dhe Ramën ta rrëzojnë brenda një muaji. Madje sipas tij, ta shpallin edhe non grata.

“Do rri këtu derisa të rrëzojmë diktatorin e fundit në Europë. Ne duhet ta rrëzojmë brenda 1 muaji, bllokojmë aeroporte, porte, kuvend, kryeministri. Të bllokojmë gjithçka se nuk ikën ky, është si Vuçiç, nuk e lëshon. Të nxjerrin non grata 4 persona, Edi Ramën, Linda Ramën, Belinda Ballukun dhe Taulant Ballën”, tha ai.

Protestuesit kanë ripërsëritur kërkesat utopike drejtuar qeverisë, të prezantuara fillimisht nga Dritan Goxhaj. Kësaj radhe mikrofoni për t’i lexuar kërkesat iu besua një tjetër protestueseje, Arvina Lleshit.

“Deklaratë politike për të sqaruar protestuesit se kjo protestë kërkon: Dorëheqjen e panegociueshme të kryeministrit dhe të qeverisë, krijimin e një qeveri teknike tranzitore jo partiake me mandat 12 mujor, ndryshime kushtetuese ku të gjithë shtetasit shqiptarë të jenë të barabartë para ligjit dhe miratimin me referendum popullor duke përfshirë ndryshimin e Kodit Zgjedhor, ndryshimi i ligjit për financimin e partive, kufizmin e mandatit të krye në 2. Kërkojmë anulimin e ndryshimeve të bëra në ligjin për zonat e mbrojtura, në ligjin për trashëgiminë kulturore, shfuqizimin e paketës së maleve, investimet strategjike. Këto janë kërkesat tona, legjitime dhe të panegociueshme. Ne mbetemi të vendosur në rrugën e protestës paqësore deri në plotësimin e kërkesave”, tha protestuesja.