Në një kohë që para Ministrisë së Arsimit zhvillohej protestë, kryeministri Edi Rama mblodhi këshillin e ministrave në godinën e qeverisë.

Mbledhja rutinë e qeverisë siç do të mërkurë për të marrë vendime, nuk la jashtë vëmendjes atë se çfarë po ndodhte në Tiranë me protestuesit që edhe në ditën e dytë të tubimit para Ministrisë së Arsimit, vijuan sulmet ndaj institucionit.

Sic Report Tv mëson, kryeministri Edi Rama ka mbajtur qëndrim në mbledhjen e qeverisë edhe për protestën.

Për atë pjesë të tubimit që përfshin studentët, ata që të paktën publikisht u shfaqën si nismëtarë të tubimit, kryeministri mësohet t’i ketë kërkuar anëtarëve të kabinetit qeveritar, të jenë të gatshëm për të dëgjuar kërkesat që studentët kanë, duke i ndarë kështu nga pjesa tjetër e akteve të dhunshme.

Ndërkohë, këtë të mërkurë në mesditë, do të mbahej mbledhja e zgjeruar e grupit parlamentar të Partisë Socialiste dhe kabinetit qeveritar, në Pallatin e Brigadave, por ndoshta nën klimën e kësaj situate, mbledhje u anulua. Nga kryeministria apo PS nuk pati asnjë arsye zyrtare të anulimit.

Takimi ishte thirrur nga kryeministri Edi Rama në orën 12:00 dhe pritej të mblidhte deputetët socialistë dhe ministrat e kabinetit qeveritar. Sipas axhendës në fokus të diskutimeve do të ishin dy çështje “Prania Besnike” dhe “Pasqyra Albania”.