Serie A/ Interi feston titullin kampion, Juventusi turpërohet në shtëpi dhe rrezikon Evropën! Napoli siguron Championsin, Milani e Roma tri pikë të arta (Renditja+VIDEO)

Interi këtë sezon u shpall kampion i Serie A për herë të 21-të në histori, ndërsa fitoi edhe Kupën e Italisë duke bërë dopietë. Sot zikaltërit luajtën ndeshjen e fundit përpara tifozëve të tyre në 'Giuseppe Meazza' duke barazuar 1-1 kundër Veronës. Inter kaloi në epërsi me autogolin e Edmundsson, ndërsa Verona barazoi në fund me Bouie.

Përtej rezultatit ekipi i Cristian Chivu ka bërë një sezon për t'u mbajtur mend dhe festa në Milano do jetë deri në mesnatë, aty ku parashikohet që pas orës 23:00 ekipi të përshëndetet me tifozët në 'Duomo' pas një parakalimi në rrugët e Milanos me autobus të hapur.

Pas orës 17:00 është programuar parada në stadium e futbollistëve zikaltër për medaljet e arta të kampionit dhe ngritjen lart të trofeut të Serie A. Pas orës 18:30 skuadra dhe drejtuesit e Interit të bëjnë një paradë me autobus të hapur në rrugët e Milanos, teksa mediet në Itali bëjnë me dije se mund të jenë nga 250-300 mijë tifozë në rrugë.

Mbërritja në 'Duomo' pritet të bëhet mes orës 22:30 ose 23:00 të mbrëmjes, nga ku futbollistët do të ngjiten në një nga ballkonet pranë dhe do të përshëndesin tifozët mes këngëve dhe fishekzjarreve.

Pas fitores 0-3 kundër Pisas, Napoli siguroi një vend për në Champions League sezonin e ri. Paçka një sezoni shumë të mirë, trajneri Antonio Conte është pranë largimit dhe destinacioni i radhës pritet të jetë kombëtarja e Italisë.

Pas ndeshjes ai dha sinjale lamtumire që janë ndjerë në ajër prej javësh, duke thënë se presidenti De Laurentiis i di prej kohësh qëllimet e tij.

“Klubi po punon për të ardhmen, të presim ndeshjen e fundit dhe pastaj së bashku me presidentin do të themi atë që është vendosur. Unë ia kam thënë prej një muaji mendimin dhe objektivin tim.

Unë kam premtuar që kur të largohem, do të lë këtu një grup solid që të bezdisë Milanin, Juven dhe Interin, të cilat e nisin gjithmonë një metër përpara. Nëse Napoli i bezdis çdo vit dhe ia del t’i kapërcejë një vit po e një vit jo, do të ishte diçka e madhe.

Është e drejtë që të jemi të qartë me presidentin, do t’i jem gjithmonë mirënjohës, pavarësisht asaj që do të ndodhë në vitin e ardhshëm. Më ka dhënë mundësinë që të jetoj në një ambient si i Napolit dhe të festoj. Më kanë thënë gjithmonë se kur fiton në Napoli është njëlloj si ta bësh 10 herë në një klub tjetër”, tha Conte.

Kolapsi i Juventusit është i plotë. As aq i papritur, duke pasur parasysh shenjat dhe mjaftueshëm dramatik për të vënë në pikëpyetje gjithçka që ishte parashikuar deri vonë. Gjysma e dytë e sezonit ka bashkuar shumë faktorë negativë, duke konfirmuar të gjitha rreziqet e mundshme të identifikuara gjatë fazës së planifikimit të ekipit. Kjo është arsyeja pse dështimi për të nënshkruar me një qendërsulmues në janar nuk mund të jetë shpjegimi për objektivat e humbura.

Kur u thirr nga Juvja, trajneri Spalletti ishte i bindur për të arritur objektivin minimal, vendin në Champions League, ndërsa e eliminua edhe nga Liga e Kampionëve të këtij sezoni, kjo edhe në Kupën e Italisë.

Klubi vendosi të rinovonte me të pavarësisht rezultateve të fundit të sezonit, duke përfshirë një zgjatje të kontratës deri në vitin 2028. Megjithatë, pas ndeshjes kundër Fiorentinës, trajneri duket në mëdyshje duke planifikuar një takim me pronarët e klubit: "Duhet të analizoj veten, sepse duhet të sjell diçka të ndryshme nga kjo. Do të flas me John Elkann (pronarin) këtë javë."

Me përfundimin e kampionatit tani po dalin në pah problemet e verës së shkuar, kur ekipi u planifikua në letër. Nga vendosja në stol e përforcimeve modeste si David dhe Openda, deri te mungesa e lidershipit në momentet kyçe.

Tani po shqyrtohet edhe puna e drejtorit të përgjithshëm Comolli, njeriut që rindërtoi departamentin teknik të klubit gjatë vitit të kaluar, përfshirë centralizimin e tregut të transferimeve. Rezulton se asnjë investim nuk ka dhënë rezultate pozitive. Të gjithë duken në dyshim.

Juventusi u mposht këtë të dielë 0-2 nga Fiorentina dhe me shumë mundësi humbi lidhjet me zonën e Champions League, vetëm një javë nga fundi i sezonit në Serie A. Nëse përpara ndeshjes 'Zonja' mbante vendin e tretë dhe as e mendonte këtë disfatë, tanimë fatet për një vend mes katër më të mirëve nuk janë vetëm në dorën e saj, pasi ndodhet në pozitën e gjashtë.

Bardhezinjtë duhet të fitojnë derbin kundër Torinos fundjavën që vjen, duke shpresuar që Roma dhe Milani të ndalen në ndeshjet e tyre. Në fundin e sfidës tifozët e Juves kanë protestuar me fërshëllima kundër futbollistëve, teksa ultrasit kanë kërkuar më shumë përgjegjësi duke u thënë lojtarëve që të 'tregojnë b**et' në fushë.

Edhe pas ndeshjes, jashtë stadiumit, një pjesë e madhe e ultrasve kanë protestuar për gjendjen e ekipit, ndërsa kori i tyre ishte 'Juventusi jemi ne'.

Pas disfatës, trajneri Luciano Spalletti nuk e ka fshehur zhgënjimin duke thënë se mund të mos ishin as në Europa League.

"Bëhet ndeshja e jetës tënde, ndeshja ku e hedh poshtë sezonin tënd. Sipas mendimit tim, duhet të fillojmë të reagojmë në mënyrën se si e ushtrojmë këtë presion mbi veten tonë. Është e vërtetë që kjo ndeshje, nga pikëpamja sportive, përcakton shumë gjëra, por niveli i ekipit dhe niveli i futbollit që ofroi mbetet.

Evropa? Jemi në Europa League, mund të kishim qenë edhe jashtë saj, sepse kështu funksionon. U them lojtarëve dhe stafit se është koha të përgjigjen për presionin që kemi në këto ndeshje për 'jetë a vdekje'. Sipas mendimit tim, kemi bërë një rrugëtim ku e pamë skuadrën të reagojë dhe të krijojë për të qenë një skuadër e fortë.

Ka momente të caktuara kur duhet të tregojmë një reagim, personalitet dhe një karakter që na lejon të jemi më të kthjellët në vendimet që marrim, atë që nuk e treguam sot. Ne shkojmë në shtëpi duke marrë përgjegjësitë. Një klub si Juventusi meriton të jetë në Champions League, por ka shumë skuadra të forta dhe ne marrim përgjegjësitë", tha Spalletti pas ndeshjes.

Interi luan sot në orën 15:00 kundër Veronës ndeshjen e fundit në shtëpi për këtë sezon. Zikaltërit kanë dy javë që e kanë siguruar titullin e 21-të kampion në Serie A dhe kjo pasdite në Milano do të jetë festive.

Tanimë festa në 'Meazza' ka nisur, me stadiumin që është kthyer në një ambient festiv me disa nga DJ dhe artistët më të njohur në Itali. 21 miq nga bota zikaltër e artistëve do të argëtojnë tifozët nga ora 12:30 deri në 14:30, përpara se futbollistët e Interit të dalin në fushë së pari me trofeun e Kupës së Italisë mes një koreografie që pritet e veçantë.

Pas orës 17:00 është programuar parada në stadium e futbollistëve zikaltër për medaljet e arta të kampionit dhe ngritjen lart të trofeut të Serie A. Pas orës 18:30 skuadra dhe drejtuesit e Interit të bëjnë një paradë me autobus të hapur në rrugët e Milanos, teksa mediet në Itali bëjnë me dije se mund të jenë nga 250-300 mijë tifozë në rrugë.

Mbërritja në 'Duomo' pritet të bëhet mes orës 22:30 ose 23:00 të mbrëmjes, nga ku futbollistët do të ngjiten në një nga ballkonet pranë dhe do të përshëndesin tifozët mes këngëve dhe fishekzjarreve.

Napoli po kryeson 0-2 kundër Pisas në udhëtim për raundin e 37-të në Serie A. Golin e dytë për miqtë e ka shënuar Amir Rrahmani në minutën e 27-të. Shqiptari tjetër, Elif Elmas dhuroi një asist nga këndi për kapitenin e Kosovës, me mbrojtësin që e ndali sferën në rrjetë pas goditjes me kokë për të qetësuar Conten në stol. Ky është goli i dytë për Rrahmanin këtë sezon.

Mes zërave të shumta për largimin e Igli Tares dhe Giorgio Furlanit, pronari i Milanit, Gerry Cardinale zbriti së bashku me dyshen e drejtuesve në dhomat e zhveshjes së 'Marassit' për t'i dhënë zemër ekipit në ndeshjen kundër Genoas e cila fillon sot në orën 12:00. Sfida kundër Genoas në udhëtim është shumë e rëndësishme për kuqezinjtë që duan një vend në Champions League sezonin e ri.

Jo vetëm orari i pazakontë (12:00), por derbi Roma - Lazio do të jetë krejtësisht i pazakontë, veçanërisht për shkak të bojkotit nga tifozët e Lazios, të cilët, në shenjë proteste ndaj presidentit Claudio Lotito kanë vendosur ta lënë 'Curva Nord' krejtësisht bosh.

Tifozët e Lazios do të brohorasin për ekipin e tyre të preferuar nga Ponte Milvio, vendi i tyre i zakonshëm i takimit jashtë stadiumit, por brenda stadiumit 'Olimpico' ata kanë shfaqur një banderolë për të bërë që zëri i tyre të dëgjohet: "Dinjiteti dhe respekti vlejnë më shumë se një derbi".

Roma dhe Lazio do të përballen këtë mesditë në orën 12:00 në 'Olimpico' për derbin numër 187 mes tyre. Në historikun e kësaj ndeshje, është Roma ajo që ka më së shumti fitore me 71 të tilla, Lazio me 51 fitore dhe 64 ndeshje të tjera janë ndarë barazim.

Trajnerët Gian Piero Gasperini dhe Maurizio Sarri kanë bërë me dije edhe formacionet zyrtare të ndeshjes. Lazio do të luajë këtë ndeshje me portierin e tretë, Alessio Furlanetto.

Formacionet, Roma vs Lazio