TIRANË- Atentat për hakmarrje në mes të kryeqytetit! 50-vjeçari Preng Gjini  është personi që fatmirësisht i ka shpëtuar një atentati të mirëorganizuar ditën e sotme mbi urën e Selitës edhe pse ndodhet në gjendje kritike për jetën tek Trauma, ndërsa i është nënshtruar një operacioni në bark. Makinës së tij i vendosën tritol të një sasie 400 gram C4 në pjesën e përparme të makinës dhe shpërthimi i madh është kontrolluar nga një telekomandë në distancë ndërsa ai ishte duke udhëtuar.

Shpërthimi ka qenë aq i fuqishëm saqë ka shkaktuar dëmtime edhe dy makinat përreth dhe janë plagosur dy kalimtarë, një 45-vjeçar italian i identifikuar si Silvano Barbadoni dhe 14-vjeçar. Të dy personat kanë marrë ndihmën e duhur në spital dhe janë larguar më pas në gjendje të mirë shëndetësore. Shpërthimi i tritolit të makinës solli kaos në rrugët e Tiranës, ku u grumbulluan njerëz të frikësuar e alarmuar.

Kjo ngjarje lidhet edhe me sagën e hakmarjeve mes dy fiseve Gjini dhe Reçi në Rrëshen, ku jo më larg se disa muaj më parë Kastriot Reçi, mbeti i vrarë me snajper. Preng Gjini është vëllai i Armando ose Tonin Gjinit nga qyteti i Rrëshenit, i cili mbeti i vrarë në 12 gusht 2019. Armando Gjini, i kishte shpëtuar më parë dhe një atentati me tritol, pasi fatmirësisht ka mundur ta pikasë në kohë lëndën eksplozive. Ndërkohë një vit pas vrasjes së Armando Gjinit, në Tiranë organizohet një atentat akoma dhe më i sofistikuar ndaj vëllait të tij, Preng Gjini.

Ky i fundit po udhëtonte në një zonë shumë pranë rezidencës ushtarake Turke në Tiranë, zonë e cila ka qenë e populluar me kalimtarë, kur mjeti i tij ka shpërthyer shumë fort, duke dëmtuar plotësisht makinën.

 Policia e Tiranës thotë se ngjarja dyshohet se ka lidhje me hakmarrjen në qytetin e Rrëshenit dhe trafikun e drogës, pasi vëllai i Preng Gjinit, Armando, konsiderohej dhe është arrestuar nga prokuroria si ushtari i Met Kananit, të arrestuar si trafikant droge në Turqi. Pas atentatit të ndodhur në Tiranë, forca të shumta të FNSH-së janë nisur në drejtim të Mirditës, si një pistë e dyshuar për të kapur autorët, pasi atje është vendlindja e tij dhe familja me të cilën kanë hasmëri.
Rendit zhvillimet sipas orarit:
Ora 23:12
Atentati në Tiranë/ Dhjetëra të afërm të Preng Gjinit mblidhen përpara Spitalit të Traumës (VIDEO)

Një numër i madh njerëzish janë grumbulluar përpara Spitalit të Traumës në Tiranë, ku po merr mjekimin Preng Gjini, të cilit iu bë atentat ditën e sotme në urën e Selitës.

Makina e tij shpërtheu në ecje, duke e lënë të plagosur rëndë. Ai po operohet në bark në spital dhe ndodhet në gjendje të rëndë shëndetësore.

Gazetari i Report Tv, ka siguruar pamje të njerëzve përpara spitalit, që mendohet se janë të afërm të Preng Gjinit, vëllai i Armando Gjinit që është ekzekutuar një vit më parë në Rrëshen.

Edhe pse kjo ishte një ngjarje e cilësuar nga kreu i policisë së Tiranës, Rebani Jaupi si hakmarrje, nuk kishte efektivë policie përpara spitalit të Traumës. Por dhjetëra persona që me gjasë mund të jenë të afërm të personit që iu bë atentat po qëndrojnë përpara spitalit.

Ora 20:56
Kronologjia e krimeve mes dy fiseve në Rrëshen, që terrorizoi Tiranën, atentate e vrasje nga Italia, në Belgjikë (EMRAT)

1600198374_qyno1.jpg

Viktima, para se të qëllohej për vdekje, ka qenë duke lëvizur në këmbë drejt shtëpisë së tij, ndërsa një automjet tip “Smart” e ka ndjekur pas deri pranë banesës. Makina i është afruar dhe autorët e kanë thirrur para se ta qëllonin.

Në momentin që Gaspër Reçi ka ndaluar dhe është kthyer përballë personave që ndodheshin në “Smart”, është qëlluar me armë zjarri. Ai ka mbetur i vdekur në vend, ndërsa makina është larguar me shpejtësi nga vendi i ngjarjes.

Ka qenë vajza e viktimës që ka lajmëruar Policinë, pasi ka dëgjuar të shtënat kur po priste të atin që të kthehej në shtëpi. Vrasja e Gaspër Reçit në Itali iu bashkua dosjeve të Policisë shqiptare, pasi u dyshua se kishte lidhje me ngjarje që kishin ndodhur më parë në Shqipëri.

SERIALI I VRASJEVE

Sajmir Jaku, drejtor i Tensionit të Lartë në OSHE për Veriun, u vra më 9 shtator 2016. Dyshohet se dy persona të armatosur kanë qëlluar për vdekje zyrtarin, ndërsa nga të shtënat me armë edhe një person tjetër mbeti i plagosur. Policia ka thënë se Sajmir Jaku është qëlluar me kallashnikov kur ka qenë duke pirë kafe në një nga lokalet e zonës më të frekuentuar të qytetit të Rrëshenit me një shok.

Pas vrasjes, autorët braktisën automjetin tip “BenzMercedes” në një fshat të Kurbinit ku e kanë djegur dhe më pas u larguan. Ngjarja mbeti e pasqaruar, edhe pse për hetimin e saj u angazhua Policia dhe Prokuroria me gjithë burimet e tyre njerëzore.

Me dhjetëra veprime hetimore u kryen për disa muaj me radhë, por përfundimisht ngjarja ka mbetur pa autorë. I vetmi fakt që dihet është se autorët e atentatit kanë qenë dy persona.

VRASJA NË ITALI

Një tjetër krim që u dyshua se kishte lidhje me këtë serial hakmarrjeje, ishte vrasja e ndodhur më 28 prill 2017 në Itali, ku u ekzekutua shtetasi Gaspër Reçi, i cili u qëllua me katër plumba. Policia dyshonte se vrasja e Gaspër Reçit mund të ishte kryer si hakmarrje për vrasjen e Sajmir Jakut.

Pak më vonë, më 6 shtator të po atij viti, vritet 31-vjeçari Kreshnik Gjini në komunën e Forestit të Belgjikës. Gjini ishte nipi i Sajmir Jakut dhe u dyshua se ishte vrarë në shenjë hakmarrje për ekzekutimin e Gaspër Reçit në Romë. Në lidhje me tri ngjarjet, mësohet se Sektori i Krimeve të Rënda në Policinë e Shtetit ka shkëmbyer informacione e prova me Policinë belge dhe atë italiane.

VRASJA NE BELGJIKE

Policia shqiptare u përfshi në hetimet për vrasjen e 31-vjeçarit Kreshnik Gjini, i cili u ekzekutua më 6 shtator 2017 në Belgjikë. Ka qenë Policia belge ajo që ka kërkuar ndihmën e Policisë shqiptare për hetimin e ngjarjes, e cila dukej se kishte lidhje me një serial vrasjesh e hakmarrjesh të ndodhura edhe në vendin tonë.

Një vajzë e identifikuar me emrin Kristina, e cila ka qenë e dashura e Kreshnik Gjinit, ka pohuar për policët belgë se daja i 31-vjeçarit është vrarë një vit më parë në Shqipëri. Daja i tij ishte Sajmir Jaku, ish-drejtori i linjës së Tensionit të Lartë për Veriun në OSHEE.

“Ai ndihej i kërcënuar”, ka thënë e dashura e Kreshnik Gjinit në dëshminë e dhënë para hetuesve. Bazuar në historinë e 31-vjeçarit të vrarë, por edhe në dëshminë e dhënë prej së dashurës, hetuesit belgë dyshonin se vrasësit ishin shtetas shqiptarë që mund të kishin vepruar për çështje hakmarrje.

VRASJA NE RRESHEN

Më 13 gusht të vitit 2019 u ekzekutua në qendër të qytetit të Rrëshenit, në sy të dy fëmijëve, Armando Gjini, i njohur edhe me emrin Tonin Gjini. Shkak për këtë ngjarje, sipas Policisë dyshohej e kaluara e tij në Belgjikë. Gjini u qëllua disa herë me pistoletë, ndërsa ndodhej brenda automjetit të tij përballë katedrales. 48- vjeçari dyshohet që të jetë vrarë për shkak të prishjes së pazareve të drogës.

Hetuesit, nga ana tjetër, nuk përjashtojnë pistën e gjakmarrjes, pasi familja e tij është përfshirë në një konflikt të përgjakshëm shumë vite më parë. Por, nisur nga mënyra e ekzekutimit, e cila i ngjan stilit mafioz, hetuesit thonë se ka pak gjasa që të bëhet fjalë për hakmarrje. Në konsideratë është marrë dhe një pistë e tretë, që ka të bëjë me dyshimet e vrasjes për shkak të borxheve.

48- vjeçari njihej si pjesë e grupit të Met Kananit. Vrasja e tij dyshohet se është bërë nga njerëz me pagesë.

Viktima, i njohur ndryshe si Tonin Gjini, ishte person i njohur në qytetin e Rrëshenit, kjo edhe për shkak të arrestimit të tij në vitin 2018 dhe vendosjes së eksplozivit në makinë pak kohë para vrasjes. Konflikti midis dy familjeve nisi në vitin 2016 për shkak të një ngarkese droge nga Turqia

Ora 20:54
Atentati në ndaj Preng Gjinit/ Forca të FNSH-së në  drejtim të Mirditës (VIDEO)

Pas atentatit të ndodhur në Tiranë, forca të shumta të FNSH-së janë nisur në drejtim  të Mirditës, si një pistë e dyshuar për të kapur autorët. Atje është vendlindja e tij dhe familja me të cilën kanë hasmëri.

Ora 20:30
Atentati në Tiranë/ Preng Gjini në gjendje serioze, i nënshtrohet operacionit në bark

Preng Gjini ndodhet në gjendje serioze në spitalin e Traumës në Tiranë dhe po i nënshtrohet operacionit në bark.

Ora 20:29
'Atentat i mirëorganizuar', gazetari Qyno: Kundërshtarët e kanë ndjekur deri në kryeqytet (VIDEO)

Gazetari Elton Qyno në një lidhje telefonike në Report Tv tha se ky është një atentat i mirëorganizuar nga dora kriminale, ndërsa ata e kanë ndjekur  deri në kryeqytet. Ai thotë se Gjini po udhëtonte në një zonë shumë pranë rezidencës ushtarake Turke në Tiranë, zonë e cila ka qenë e populluar me kalimtarë, kur mjeti i tij ka shpërthyer shumë fort, duke dëmtuar plotësisht makinën.

Ora 20:18
Atentati ndaj Preng Gjinit/ Jaupaj: Ka pista për hakmarrje, gjendja e tij do të përmirësohet, janë dëmtuar qytetarë të tjerë nga shpërthimi (VIDEO)

Drejtori i policisë në Tiranë, Rebani Japupaj në një deklaratë për mediat tha se gjendja e të plagosurit do të përmirësohet, ndërsa është dëmtuar edhe një shtetas italian që ka qenë rastësisht aty.

“Sapo mjeti është futur në urë me drejtues Preng Gjinin ka ndodhur një shpërthim që dyshohet me lëndë plasëse. Është ngritur grupi hetimor me specialistë të Krimeve të Rënda nën drejtimin e policisë kriminale në bashkëpunim edhe me një qark tjetër ku po kryejmë hetime. Po hetojmë në vendin e ngjarjes për të përcaktuar llojin e lëndës shpërthyese. Kemi ngritur edhe pistat e hetimit për të cilat dyshojmë që ka ndodhur kjo ngjarje. Ka pista për një hakmarrje midis personit që është dëmtuar dhe disa qytetarëve të tjerë jashtë Tiranës”,  tha ai.

Ora 19:54
I mbuluar në gjak, por gjallë, dalin pamjet e Preng Gjinit të plagosur në makinë (VIDEO)

Me bluzën e bardhë e i  gjakosur në makinë, dalin pamjet e Preng Gjinit të plagosur.

Ora 19:45
Shpërthimi i makinës/ Kaos në urën e Selitës, njerëz të grumbulluar e të frikësuar (FOTO-VIDEO)

1600190881_shperthimingalarte.jpg

Shpërthimi i tritolit të makinës  mbrëmjen e sotme ka krijuar kaos në urën e Nisharakut, e njohur ndryshe si ura e Selitës. Njerëz të grumbulluar dhe të frikësuar janë shfaqur.

Ora 19:38
FOTO / Personi që iu bë atentat mbrëmjen e sotme, vëllai i Tonin Gjinit, i vrarë një vit më parë

Tonin Gjini

Preng Gjini është vëllai i Armando ose Tonin Gjinit nga qyteti i Rrëshenit, i cili mbeti i vrarë në 12 ngusht 2019. Armando Gjini, i kishte shpëtuar më parë dhe një atentati me tritol, pasi fatmirësisht ka mundur ta pikasë në kohë lëndën eksplozive. Armando, konsiderohej dhe është arrestuar nga prokuroria si ushtari i Met Kananit, të arrestuar si trafikant droge në Turqi. Ai i kishte shpëtuar më parë dhe një atentati me tritol, pasi fatmirësisht ka mundur ta pikasë në kohë lëndën eksplozive. Ndërkohë një vit pas vrasjes së Armando Gjinit, në Tiranë organizohet një atentat akoma dhe më i sofistikuar ndaj vëllait të tij, Preng Gjini.