Shqipëria pa trajner, Reja: Kontrata më përfundoi, tani vendos Duka! (Reagimet e lojtarëve pas Francës)

Mesfushori Keidi Bare shprehet se dëshira ishte për ta inauguruar stadiumin me gol, por Franca ishte tepër e vështirë për t'u depërtuar. “Pësuam dy gola të evitueshëm dhe bie morali por në të dytën mendoj se nuk na rrezikuan shumë. Kishim raste për të shënuar por ky ishte rezultati dhe janë Franca ka shumë kualitet.

Më i miri në fushë? Dua të them se ekipi i tyre të vinte në vështirësi sepse janë lojtarë klasi. I gjithë ekipi na vuri në vështirësi. Të them të drejtën mendoja që për të inauguruar këtë stadium me një gol por nuk ia dola dhe shpresoj të shënoj në vijim".

Pavarësisht humbjes në ndeshjen inauguruese kundër Francës, Hysaj shpreh shprese te kjo kombëtare. “Po të rezistonim dhe pak, do bënim më mirë si në pjesën e dytë. Ato dy raste, ndikuan në humbjen e ekipit. Besoj se jemi një ekip i mirë dhe po rritemi. Treguam që jemi një ekip që mund të luftojmë me të gjithë, që të sistemojmë problemet e fillimit. Franca nuk na trembi, por është kënaqësi të luash ndaj këtyre çunave me famë botërore”.

Sulmuesi kuqezi Bekim Balaj u shpreh i zhgënjyer që nuk e nisën me këmbën e mbarë inaugurimin e stadiumit të ri kombëtar përballë Francës. “Ishte ndeshje tjetër me motivim tjetër. Stadium i ri dhe me mbështetje por për fat të keq nuk morëm dot rezultat tjetër për të kënaqur tifozët por përballë kishim Francën. Shpresoj të luajmë mirë në të tjera ndeshje. Duhet të perfeksionohemi sepse ky ekip është në rritje. Duhet më shumë pjekuri dhe vetëbesim dhe rezultate më të mira. Franca mbrojtje shumë e fortë por jo e pamundur. Kishim shumë faulle dhe korne dhe ndoshta me pak kujdes do të përfitonim” tha ai për Supersport.