Gjykata Kushtetuese rrëzoi padinë e 30 deputetëve të Rithemelimit e grupit Bardhi, përmes së cilës kërkonin pezullim e masave të sigurisë ndaj Sali Berishës dhe shpalljen antikushtetuese të tyre.

Me shumicë votash kushtetuesja nuk legjitimoi deputetët kërkues, vendim i cili lë në fuqi dhe legjitime masat ‘detyrim paraqitje’ dhe ndalim i lëvizjes jashtë vendit për Berishën, ndërkohë që mbetet e hapur rruga për arrestimin e tij.

“Gjykata vendos për mosmarrëveshjet e kompetencës ndërmjet pushteteve, e cila në rastin konkret pretendohet se është midis Kuvendit, nga njëra anë, dhe SPAK dhe GJKKO, nga ana tjetër. Një e pesta e deputetëve dhe Kuvendi janë subjekte kushtetuese të ndryshme që nuk mund të barazohen me njëri – tjetrin”.- thotë Gjykata Kushtetuese.

Pra sipas Gjykatës Kushtetuese 30 deputetët firmëtarë, duke mos qenë subjekt i konfliktit, nuk kishin të drejtë t’i drejtoheshin Gjykatës për këtë çështje, por duhet të ishte vetë Kuvendi.

‘Grupi i një të pestës së deputetëve, pavarësisht se është pjesë e ushtrimit të veprimtarisë legjislative të Kuvendit, nuk nënkupton që është subjekti kushtetues për të cilin bën fjalë neni 73, pika 2, i Kushtetutës, pra ai nuk mund të veprojë në emër dhe me tagrat e Kuvendit.’- njofton Gjykata Kushtetuese.

Siç kryetarja e Kushtetueses, Holta Zaçaj u tha gazetarëve, një mënyrë tjetër që Gjykata të vihej në lëvizje mund të ishte padia nga vetë Berisha, por pasi të kishte shteruar ankimet ndaj masave të sigurisë në të trija shkallët e gjykimit, deri në rekurs, të cilin ende nuk e ka bërë.

Kërkesa sipas gjykatës u shqyrtua 5 ditë nga dorëzimi, pasi vetë deputetët kishin kërkuar përshpejtim për shkak se këtë të enjte pritet të votohet në seancë plenare dhënia e autorizimit ndaj SPAK për arrestimin  e Sali Berishës.

Deputetët e Rithemelimit, pretenduan se masa e marrë ndaj Sali Berishën ‘detyrim paraqitje’, më 20 tetor, për aferën e privatizimit të klubit sportiv Partizani, është antikushtetuese dhe është marrë pa u kërkuar paraprakisht autorizimin e Kuvendit. Report Tv zbuloi ekskluzivisht edhe emrat e 30 deputetëve të cilët firmosën padinë drejtuar Gjykatës Kushtetuese për të pezulluar kërkesën e SPAK. Mes deputetëve që fiirmosën ishte dhe Gazment Bardhi e 10 deputetë të grupit të tij.

Në mesin e firmëtarëve ishin jo vetëm Bardhi por dhe deputetë të grupit të tij si Agron Gjekmarkaj, Dhurata Çupi, Helidon Bushati, Saimir Korreshi apo edhe Lefter Gështenja. Ndryshe nga kërkesa për marrëveshjen me emigrantët me Italinë, asnjë deputet i Partisë së Ilir Metës, (Partia e Lirisë) nuk firmosi këtë herë për pezullimin e kërkesës së SPAK për arrestimin e Berishës. 

Me 6 vota pro, asnjë kundër dhe asnjë abstenim, Këshilli i Mandateve pranoi (18 dhejtor) kërkesën e SPAK për dhënien e autorizimit për arrestimin e ish-Kryeministrit Sali Berisha. Përfundimisht Kuvendi do të vendosë në seancën plenare të 21 Dhjetorit, ndërsa SPAK e ka lënë të hapur edhe mbylljen në qeli të ish Berishës. Votave të mazhorancës iu bashkua Enkelejd Alibeaj, ndërsa socialistët thanë se askush nuk mund të sfidojë drejtësinë siç ka bërë ish-Kryeministri.

Prokuroria e Posaçme i kërkoi më (12 dhjetor) Kuvendit autorizimin për arrestimin e Sali Berishës në kushtet kur ish-kryeministri në hetim për aferën e privatizimit të klubit “Partizani”, nuk zbatoi masën e gjykatës, atë të detyrimit për tu paraqitur. SPAK kërkoi ta zëvendësojë masën dhe ta ashpërsojë në arrest shtëpie ose arrest me burg, vendim që më tej do të presë vulën e gjykatës.

Foto: Firmat e deputetëve që i janë bashkangjitur kërkesës së Gjykatës Kushtetuese për të kërkuar pezullimin e arrestimit të Sali Berishës

Foto: Firmat e deputetëve që i janë bashkangjitur kërkesës së Gjykatës Kushtetuese për të kërkuar pezullimin e arrestimit të Sali Berishës

Foto: Firmat e deputetëve që i janë bashkangjitur kërkesës së Gjykatës Kushtetuese për të kërkuar pezullimin e arrestimit të Sali Berishës

Rendit zhvillimet sipas orarit:
Ora 16:30
Rithemelimi kërkoi pezullimin e arrestimit të Berishës, Gjykata Kushtetuese e rrëzon: Nuk legjitimohen pasi nuk janë subjekt në konflikt

1703072499_saliberisha.jpeg

Gjykata Kushtetuese ka rrëzuar padinë e deputetëve të Rithemelimit për të pezulluar vendimin e GJKKO-së për arrestimin e Sali Berishës. Në mbledhjen e Këshillimit me shumicë votash, Gjykata Kushtetuese, nuk ka marrë në shqyrtim kërkesën e tyre, pasi sipas GJK-së, nuk është legjitimohen që t’i drejtohen gjykatës pasi nuk janë subjekt në konflikt. Sipas Gjykatës Kushtetuese duhet që Berisha t’i drejtohet gjykatës, pasi të mbarojë të gjitha shkallët e gjyqësorit.

Vendimi i plotë i Gjykatës Kushtetuese

Në datën 15.12.2023 në Gjykatën Kushtetuese është regjistruar kërkesa e një grupi prej jo më pak se një e pesta e deputetëve të Kuvendit të Republikës së Shqipërisë (30 deputetë), të cilët kanë kërkuar:

interpretimin përfundimtar të nenit 73, pika 2, të Kushtetutës, i cili parashikon se: “Deputeti nuk mund të arrestohet ose t’i hiqet liria në çfarëdo lloj forme apo ndaj tij të ushtrohet kontroll personal ose i banesës, pa autorizimin e Kuvendit”;

zgjidhjen e konfliktit të kompetencave ndërmjet Kuvendit dhe SPAK e GJKKO-së për sa i takon çështjes së heqjes dhe/ose kufizimit të lirisë së deputetit të Kuvendit në çdo formë, pa kërkuar e pa marrë paraprakisht autorizimin e Kuvendit;

konstatimin e papajtueshmërisë me Kushtetutën dhe marrëveshjet ndërkombëtare të masave shtrënguese të sigurimit personal të caktuara me vendimet gjyqësore të GJKKO-së së shkallës së parë dhe apelit ndaj deputetit Sali Berisha, si dhe pezullimin e këtyre masave.

Grupi i deputetëve ka parashtruar se ndaj deputetit Sali Berisha janë vendosur dy masa shtrënguese personale “Detyrimi për paraqitje” dhe “Ndalimi i daljes jashtë shtetit”, pa u kërkuar më parë autorizimi i Kuvendit, siç parashikohet nga neni 73, pika 2, i Kushtetutës. Në këtë mënyrë, vendimet gjyqësore për vendosjen e këtyre masave kanë krijuar një mosmarrëveshje kompetencash midis organit të Kuvendit, nga njëra anë, dhe organeve të SPAK-ut dhe GJKKO-së, nga ana tjetër, prandaj, për këtë shkak, lind nevoja e interpretimit të nenit 73, pika 2, të Kushtetutës. Grupi i deputetëve ka pretenduar edhe se këto masa janë marrë në kundërshtim me Kushtetutën, për rrjedhojë kanë kërkuar pezullimin e tyre. Ata, gjithashtu, kanë parashtruar se si subjekt i pakushtëzuar nuk kanë detyrimin për të provuar para Gjykatës lidhjen mes veprimtarisë ligjore që kryejnë dhe çështjes kushtetuese të ngritur.

Gjithashtu, kërkuesi ka paraqitur në Gjykatë një kërkesë për përshpejtimin e gjykimit të çështjes, duke parashtruar se në datën 21 dhjetor 2023 është caktuar seanca plenare e Kuvendit gjatë së cilës është planifikuar miratimi për dhënien e autorizimit për kërkesën e arrestit të deputetit.

Kolegji i Gjykatës Kushtetuese, në datën 19 dhjetor 2023, pasi mori në shqyrtim paraprak çështjen, vendosi ta kalojë atë për shqyrtim në Mbledhjen e Gjyqtarëve.

Mbledhja e Gjyqtarëve, e mbledhur sot, në datën 20 dhjetor 2023, bazuar në nenin 54, pika 3, të ligjit nr. 8577/2000, të ndryshuar, me shumicë votash, vlerësoi se kërkesa nuk plotëson kriteret ligjore paraprake për pranimin e saj për shqyrtim në seancë plenare, për këto arsye:

Neni 124 i Kushtetutës parashikon se Gjykata zgjidh mosmarrëveshjet kushtetuese dhe bën interpretimin përfundimtar të saj.

Kurse bazuar në nenin 131, pika 1, shkronja “ç”, të Kushtetutës, Gjykata vendos për mosmarrëveshjet e kompetencës ndërmjet pushteteve, e cila në rastin konkret pretendohet se është midis Kuvendit, nga njëra anë, dhe SPAK dhe GJKKO, nga ana tjetër.

Kushtetuta ka mirëpërcaktuar rastet kur grupeve të deputetëve u janë njohur të drejta si entitete dhe në këtë drejtim një e pesta e deputetëve dhe Kuvendi janë subjekte kushtetuese të ndryshme që nuk mund të barazohen me njëri – tjetrin.

Për rrjedhojë, kërkuesi, grupi i deputetëve, nuk legjitimohet t’i drejtohet Gjykatës, pasi referuar mosmarrëveshjes së pretenduar të kompetencave, ai nuk është subjekt në konflikt, pra nuk rezulton t’i jetë marrë ndonjë kompetencë apo të jetë cenuar drejtpërdrejt në ndonjë kompetencë. Grupi i një të pestës së deputetëve, pavarësisht se është pjesë e ushtrimit të veprimtarisë legjislative të Kuvendit, nuk nënkupton që është subjekti kushtetues për të cilin bën fjalë neni 73, pika 2, i Kushtetutës, pra ai nuk mund të veprojë në emër dhe me tagrat e Kuvendit.

Për këto arsye, Mbledhja e Gjyqtarëve vendosi moskalimin e çështjes për shqyrtim në seancë plenare, ndaj pretendimet e kërkuesit dhe kërkesa për pezullimin e masave të sigurimit nuk mund të shqyrtohen në themelin e tyre. 

M.Q./Shqiptarja.com