"Bastard, halabak, plehra, fundërrinë...trafikant droge".
 
Me këto fjalë i drejtohet kryetari i degës së PD në Lushnje, Myslim Murrizi një punonjësi të policisë rrugore në Tiranë, i cili e ka ndaluar atë për shkak të mosvenies së rripit të sigurimit.
 
Në videon e publikuar nga vetë Murrizi në rrjetin social Facebook, duket qartë momenti i ndalimit dhe kontrollit të dokumenteve nga polici i rrugores.
 
Aty dhe dëgjohet dhe fjalori i ulët aspak i denjë për një funksionar politik, si "bastard, halabak, plehra, fundërrinë apo dhe trafikant droge", me të cilat Murrizi i drejtohet policit, ndërsa ky i fundit ruan qetësinë.  
 
Pavarësisht fyerjeve dhe tensionimit të situatës nga kryetari lokal i PD-së, polici bën detyrën duke e gjobitur atë për shkeljen në rrugë. 

Sjellja skandaloze e zyrtarit të PD sigurisht që le një shije të hidhur, atëherë kur opozitës i duhet më shumë se kurrë të krijojë besim te qytetarët, institucionet dhe shteti. Parime për të cilat është ngujuar edhe në çadrën përpara Kryeministrisë në Bulevard prej 41 ditësh.