ITALI - Vëllezërit Stiven dhe Cristian Shpendi ishin protagonistë të premten në raundin e fundit të Serie B në Itali. Dy binjakët shënuan nga dy gola secili për ekipet e tyre, me Stivenin që mbajti Empolin në Serie B. Ndërkohë, veç Venezias që kishte fituar të drejtën për të luajtur në Serie A sezonin e ri, një biletë direkte e siguroi edhe Frosinone. Në play-off do të garojnë Monza dhe Palermo në gjysmëfinale, teksa Catanzaro, Modena, Juve Stabia dhe Avellino do të përballen që në fazën çerekfinale.

Stiven Shpendi mba Empolin në Serie B me dopietë

Në 'Brianteo', vendasit e Monzas barazuan 2-2 kundër Empolit. Protagonist për miqtë ishte Stiven Shpendi, djaloshi i Kombëtares që shënoi dy gola dhe mbajti të tijtë në Serie B. Stivenit iu deshën vetëm disa sekonda lojë për të shënuar golin e parë, por më pas Monza përmbysi me Petagnan dhe Delli Carri. Në limitet e sfidës, pikërisht në minutën e parë shtesë, Stiveni shënoi edhe golin e dytë për barazimin 2-2, çka bëri që me këtë pikë Empoli të dilte nga zona e ftohtë dhe të shpëtonte sezonin vetëm në fundin e takimit. 15 gola këtë sezon në Serie B për Stivenin.

Cristian Shpendi shënon dy gola për Cesenan

Në një ndeshje pa objektiva, Cesena dhe Padova shënuan shtatë gola në përballjen mes tyre, teksa ishte Padova që fitoi 3-4. Pjesa e parë prodhoi gjashtë gola dhe u mbyll 3-3. Për Cesenan dy nga golat u shënuan nga Cristian Shpendi, binjaku i Stiven Shpendit. 12 gola ka shënuar këtë sezon Cristiani me fanellën e Cesenas në Serie B.

Pescara rrëzohet në Serie C, përleshje mes tifozëve dhe policisë

Pescara barazoi 1-1 kundër Spezias në 'Adriatico' dhe nuk mundi dot të mbijetonte duke u rrëzuar në Serie C. Lot për futbollistët dhe Insignen, ndërsa tifozët u përplasën me policinë në një protestë të organizuar jashtë stadiumit.

Rendit zhvillimet sipas orarit:
Ora 09:19
VIDEO/ Pescara u rrëzua në Serie C, tifozët përleshen me policinë jashtë stadiumit 'Adriatico'

Përleshjet shpërthyen jashtë stadiumit 'Adriatico' të Pescarës midis tifozëve dhe policisë pas barazimit 1-1 me Spezian në ditën e fundit të sezonit të rregullt të Serie B, që rezultoi në rënien e klubit vendas në Serie C. Tifozët e ekipit me bazë në Abruzzo organizuan një protestë kundër ekipit dhe klubit, duke hedhur tymuese dhe flakadanë.

Gjatë minutave të fundit të ndeshjes në “Adriatico”, ultrasit brohoritën kundër presidentit Daniele Sebastiani dhe fishkëllyen Lorenzo Insignen, i cili, sipas tifozëve, ishte “fajtor” për dështimin, pasi nuk shënoi një penallti vendimtare javën e kaluar në ndeshjen kundër Padovës. Insigne u pa në lot pas ndeshjes së djeshme.

S.Dh/Shqiptarja.com

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 9 Maj, 13:00

    PS propozon masa më të ashpra për shoferët e dehur e ata të rinj, si iu duket?

Lajme të tjera