Reshjet e dëborës kanë zbritur edhe në zonat e ulëta. Tirana është zbardhur në orët e para të mëngjesit, por reshjet kanë qenë me intensitet të dobët. Rruga e Kombit është bllokuar dhe në të janë regjistruar edhe 2 aksidente, pa të plagosur. Borë ka rënë edhe në Elbasan, Shkodër e Gjirokastër si dhe janë rikthyer në Korçë, Kukës dhe Dibër ku raportohen disa fshatra të bllokuara. 4 aksidente pa të plagosur janë regjistruar edhe në aksin Qukës-Qafë Thanë. Izolohet edhe Dardha në Korçë. Pezullohet mësimi nga moti i keq në Gjirokastër, Pukë, Fushë Arrëz si dhe në disa shkolla të Korçës. Probleme me energjinë elektrike në Berat.

Situata në zona të caktuara të vendit paraqitet problematike nga reshjet e dëborës që kanë rënë. Trashësia e dëborës në këto zona e ka bërë të pamundur qarkullimin e automjeteve. ARRSH ka njoftuar drejtuesit e mjeteve që në disa akse kryesore të vendit do t'i duhet të qarkullojnë me zinxhirë. 

Kanë nisur reshjet e dëborës në qarqet kryesorë në Verilindje të vendit ndërsa mësohet se temperaturat e ulëta do të mbizotërojnë  në ditët në vazhdim, ndërsa pritet të ketë reshje të dobëta dëbore dhe temperatuara të ulëta që sipas parashikimeve meteorologjike do të bien nga 0 deri -6 °C.

Një mjet i tonazhit të rëndë, kamion me targa turke, në vendin e quajtur ura e “Doçit” në Kastriot të Dibrës, nga ora 18:00 deri në orën 23:30, ka rrezikuar të binte nga ura, por falë ndërhyrjes së policisë dhe banorëve të zonës është bërë i mundur nxjerrja e tij. 

Qyteti i Dibrës është përfshirë nga reshjet e  dëborës, duke sjellë vështirësi për qarkullimin e automjeteve dhe lëvizjen e banorëve në disa zona.Ndonëse aktulaisht reshjet jane me intensitet të ulët, në zonën e Peshkopisë trashësia e dëborës ka arritur në 30 centimetër. 

Moti i keq dhe reshjet e vazhdueshme të dëborës që kanë përfshirë prej disa ditësh një pjesë të vendit kryesisht në zonat malore kanë shkaktuar probleme në fshatin Grik, në Dibër banorët e së cilës prej tre ditësh po vuajnë mungesën e enegjisë elektrike.