Prej datës 1 nëntor, familja Sala po përballet me ditët më të vështira të jetës. Haki Sala, 74 vjeç, është zhdukur pa gjurmë nga ambientet e Spitalit “Nënë Tereza”, ku ishte i shtruar për trajtim mjekësor. I moshuari ndodhej në repartin e Urologjisë, pasi kishte kryer një ndërhyrje kirurgjikale. Sipas bashkëshortes, Hakiu ishte operuar më 31 tetor, dhe vetëm 24 orë më pas kishte dalë nga dhoma e spitalit pa njoftuar askënd. Ai ishte i veshur me pizhame blu dhe një palë shapka kur zbriti dhe doli nga godina spitalore. Bashkëshortja, me lot në sy, kujton minutat e fundit të tij… Gjatë trajtimit të rastit në “Pa Gjurme”, janë mbledhur të pakta informacionet për Haki Salën. I vetmi sinjal erdhi nga një qytetar, i cili dyshonte se kishte parë të moshuarin pranë zonës së Zogut të Zi. Kamera e Report TV shkoi për verifikime në këtë zonë, por fatkeqësisht nuk u gjet asnjë gjurmë e tij. Familjarët kërkuan që të hapeshin kamerat e sigurisë brenda qendrës spitalore “Nënë Tereza”, por ato u hapën disa ditë me vonesë. Falë këtyre pamjeve, u arrit të kapet momenti kur i moshuari ka dalë nga hyrja e pasme e Urologjisë, më 1 nëntor, rreth orës 13:00, ndërsa më pas drejtimi i tij mbeti i paditur. Janë kaluar 26 ditë që kryefamiljari i familjes Sala rezulton i humbur. Edhe pas kërkimeve intensive nga bashkëshortja dhe djali, nuk ka pasur asnjë rezultat.