Prej 9 muajsh, familja Osmani është në kërkim të 34-vjeçarit Entol Osmani nga Shkodra, për të cilin nuk kanë asnjë informacion të sigurt. Entoli, me origjinë nga Elbasani dhe banues prej vitesh në Shkodër, u nis drejt Tiranës për të takuar një mik të tij, por pas mbërritjes në kryeqytet humbi çdo kontakt me familjen. Familjarët kanë kërkuar informacion te miku me të cilin Entoli kishte thënë se do të qëndronte. Jeta e 34-vjeçarit ka pasur edhe periudha të vështira. Entoli kishte vuajtur një dënim prej 12 vitesh burg, pasi kishte plagosur partnerin e ri të ish-bashkëshortes së tij. Në periudhën para zhdukjes, Entoli bashkëjetonte me një grua 56-vjeçare, ndërsa ai ishte 34 vjeç. Diferenca e moshës nuk ishte pranuar fillimisht nga familja, por babai kishte zgjedhur ta mbështeste vendimin e të birit. Një tjetër detaj që ka ngritur pikëpyetje te familjarët është largimi i partneres nga shtëpia vetëm tri ditë pas zhdukjes së Entolit. Për këtë arsye, familja kërkon përgjigje si nga shoku me të cilin ai kishte shkuar të takohej në Tiranë, ashtu edhe nga bashkëjetuesja e tij. Ndiqni historinë e plotë në “Pa Gjurmë”, me gazetaren Odeta Dume, çdo ditë në ekranin e Report TV, ora 16:00.