67-vjeçari Flamur Abazi nga Golemi ka humbur kontaktet mbrëmjen e 14 gushtit 2020, rreth orës 22:00. Ai ishte larguar nga banesa, duke lënë pas bashkëshorten e tij, e cila ishte duke fjetur. Pak kohë para humbjes, Flamuri ishte diagnostikuar me Alzheimer dhe po kurohej me medikamente. Kujdesi i familjes për të ishte i madh, por askush nuk e kishte imagjinuar që ai do të largohej nga shtëpia. Mbrëmjen e 14 gushtit, kamerat e sigurisë e kapën teksa merrte rrugën drejt Plazhit të Golemit. Ai ishte i veshur me pantallona të shkurtra, bluzë të bardhë dhe kapelë, e cila e shoqëronte gjithmonë. Pas asaj rruge, tre fëmijët dhe bashkëshortja e tij nuk kanë pasur asnjë informacion për fatin e Flamurit për pesë vite. Nga video e regjistruar, duket qartë se ai ka probleme shëndetësore, pasi dorën e djathtë e mban të mbledhur dhe ecja e tij është e ngadaltë, për shkak të çalimit. Pavarësisht kërkimeve intensive të familjes dhe policisë, nuk ka pasur asnjë gjurmë të Flamurit. Informacionet e pakta që kanë arritur pak ditë pas humbjes flasin se fillimisht u dyshua se ai ishte parë pranë Spitalit të Kavajës dhe më vonë u pa pranë qendrës së qytetit. Megjithatë, edhe pas kërkimeve në terren, asnjë shenjë jete nuk është zbuluar për babain e tre fëmijëve.