Një nënë që prej gjashtë muajsh jeton mes ankthit dhe dhimbjes kërkon djalin e saj të zhdukur. Artan Vlashi, 36 vjeç nga Gramshi, u nis nga Greqia për t’u kthyer në Shqipëri, por që prej momentit që ka mbërritur në pikën doganore të Kakavijës, çdo gjurmë e tij humbi.Në studio, nëna Lefterie Hoxha rrëfen mes lotësh se si humbi kontaktet me të birin. Ajo tregon se Artani nuk ka pasur konflikte me askënd, ka mbyllur rrjetet sociale dhe ka bllokuar familjarët në telefon. Përpjekjet për ta gjetur kanë qenë të pafundme: miqtë, vendi i punës, institucionet, por askush nuk ka dhënë një informacion konkret.Në një rrëfim prekës, nëna flet edhe për jetën e vështirë familjare pas divorcit, dhunën që ka përjetuar dhe sakrificat për të rritur fëmijët e saj. Mesazhi i saj për djalin është i thjeshtë dhe i dhimbshëm: të dëgjojë zërin e tij dhe të dijë që është mirë, kudo që ndodhet.Një histori që ngre pikëpyetje të forta dhe një thirrje publike për ndihmë, në shpresën se Artani do të kthehet pranë familjes së tij.