Më 15 janar 1986, jeta e Velo dhe Asime Memajt ndryshoi... Çifti nga Tepelena, atëherë 31 dhe 29 vjec, po prisnin me padurim ardhjen në jetë të dy djemve binjakë. Lindja u krye në maternitetin e Fierit, larg shtëpisë së tyre, por me shpresën se gjithçka do të shkonte mirë. Dy foshnjet erdhën në jetë, por që në orët e para u përballën me pak vështirësi shëndetësore. Mjekët i siguruan prindërit se ishte një gjendje e zakonshme për të porsalindurit dhe se do ta kalonin shpejt. Sipas familjes, njëri prej binjakëve ishte më i dobët dhe më i pafuqishëm, ndërsa tjetri dukej në gjendje më të mirë shëndetësore. Por, në mënyrë të papritur, pas tre ditësh, mjekët njoftuan se pikërisht foshnja që dukej më i fortë kishte ndërruar jetë. Një lajm i rëndë që familja nuk e besoi kurrë plotësisht. Cifti tregojnë se nuk u lejuan ta shihnin trupin e pajetë të djalit të tyre dhe as ta varrosnin vetë. Ata nuk morën asnjë certifikatë vdekjeje dhe asnjë shpjegim të detajuar mbi shkaqet e humbjes. Asimja u kthye në Tepelenë me një djalë në krahë dhe me një boshllëk të madh në zemër. Gëzimi për jetën që vazhdoi u përzie me hidhërimin për jetën që, sipas tyre, u shua në rrethana të paqarta. Sot, 40 vite më pas, ata janë prindër të katër vajzave dhe një djali, por hija e asaj që ndodhi në janarin e vitit 1986 vazhdon t’i ndjekë, dyshimet nuk janë shuar kurrë për ta.