‘Gruaja në spital, vjehrra më zhduku fëmijët’/ Qan babai, një muaj pa i parë

20 Korrik, 21:56 | Përditesimi i fundit: 2022-07-20 22:39:11

Krenar Memaj, 46-vjeçari nga Berati kërkon ndihmën e emisionit “Pa Gjurmë”, pasi prej 1 muaji nuk ka asnjë të dhënë për dy fëmijët e tij të mitur, vajzën 8 vjeçe dhe djalin 6-vjeçar. Ata për herë të fundit u panë më 20 qershor të këtij viti, pasi të miturit iu morën Krenarit nga Policia e Durrësit dhe nuk iu dha asnjë informacion për fatin e tyre. E gjithë kjo ndodhi e ka zanafillën në vitin 2013 kur Krenari u njoh me mblesëri me Emrie Menën, një vajzë nga Dibra, por që jetonte në Durrës. Çifti filluan jetën në qytetin bregdetar, ndërsa 1 vit më pas u bënë prindër të një vajze, e cila erdhi në jetë, ndërkohë që Krenari dhe Emria nuk ishin të celebruar. Ajo mori mëmësinë Emrie dhe mbiemrin e saj, Mena, ndërsa atësia e Krenarit apo mbiemri i tij nuk ishte i shkruajtur asgjëkundi. Diçka e tillë bëri që mes çiftit të nisnin konfliktet e para. 46-vjeçari kërkonte që të celebrohej me Emrien dhe jeta të vazhdonte normalisht, por ajo i thoshte se një gjë e tillë nuk mund të bëhej, pasi do të humbiste përfitimin e një shume prej 80 mijë lekësh të vjetra që merrte nga Bashkia e Dibrës. Krenari kurrë nuk e mësoi se për cilën arsye gruaja e tij e përfitonte këtë shumë, ndaj sot ka dyshime të forta për të kaluarën e Emries, nisur dhe nga fakti që ajo kurrë nuk pranoi të bënte celebrimin me të. Në qershor të vitit 2016 vjen në jetë fëmija i tyre i dytë, djali, i cili gjithashtu mori vetëm mëmësinë dhe mbiemrin e saj, ndërsa babai biologjik nuk figuronte në asnjë dokument. Zënkat mes çiftit kanë qenë të shpeshta, deri kur në maj të 2022-shit ndodh diçka e papritur në familjen e tyre. Emria niset në Dibër për të marrë pagesën prej 80-mijë lekësh nga Bashkia, mirëpo atje vëllai i saj e kërcënon me thikë dhe në sy të saj e të fëmijëve, rreh babain e moshuar. Kjo ndodhi u shenjua thellë në mendjen e Emries duke lënë kështu pasoja të rënda në gjendjen e saj mendore. Kur u kthye në Durrës ishte agresive, rrihte fëmijët dhe zihej me bashkëshortin. Ndërkohë që shëndeti i saj përkeqësohej, familja vendosi ta dërgonte në spitalin psikiatrik, ndërsa 2 fëmijët e mitur iu dhanë motrës së saj Flutura Tota, e cila banon në kryeqytet. Pas shumë përpjekjesh, Krenari arrin t’i marrë fëmijët, por 1 muaj më parë ai shoqërohet në komisariatin e policisë së Durrësit, pasi ishte akuzuar për dhunë nga bashkëshortja e tij, e cila vuante nga probleme të shëndetit mendor dhe kurohej me ilaçe. Kështu, fëmijët përfundojnë në duart e policisë ndërsa Krenari doli para gjykatës, ku për çudi i shpëtoi një dënimi me burg, mirëpo sipas urdhrit të mbrojtjes që kishte përfituar bashkëshortja, ai duhet t’i qendronte asaj 150 metra larg. Prej asaj dite, as gjykata dhe as policia e Durrësit nuk e kanë njoftuar Krenarin lidhur me fatin e dy fëmijëve të tij.

Programe të tjera

    Nuk u gjeten video për këtë program!

Shiko të gjitha