Një 33-vjeçar në kërkim të bashkëshortes së tij, e cila prej një muaji tashmë ka humbur çdo kontakt me të, duke i privuar edhe mundësinë që ai të shohë djalin e tij të vogël. Lorenc Koleta është i riu nga Vlora, i cili sot i drejtohet për ndihmë emisionit “Pa Gjurmë”. Lidhja me Elsën, vajzën nga Librazhdi e cila është 2 vite më e madhe në moshë, nuk shkoi ashtu siç ai e kishte menduar. Ata u njohën në vitin 2017 përmes rrjetit social facebook, dhe një vit më pas u martuan ndërsa sot kanë një djalë 3 vjeç. Çifti banonin në Vlorë, mirëpo jeta e Lorencit ka qenë e ndarë mes qytetit të lindjes dhe Italisë, atje ku ai punonte prej vitesh, pasi në Shqipëri e kishte të vështirë të siguronte të ardhura. Duke mos pasur bashkëshortin pranë, ditët bëheshin më të zymta për Elsën, çka ndikoi dhe në raportin mes tyre. Ditët e para të vjeshtës në vitin 2021 nisën debate të ashpra mes çiftit dhe si rezultat Elsa vendos që të largohej nga Vlora drejt Italisë. Molla e sherrit mes çiftit e ka zanafillën verën e po atij viti, pasi Lorenci qëndroi disa ditë në banesën e të afërmve të Elsës në Itali, e më pas ata e akuzuan se ai u kishte vjedhur një sasi të hollash në shtëpi. Në tetor të vitit 2021 Lorenci I jep Elsës firmën për prokurën e djalit, dhe më datë 18 ajo bashkë me fëmijën udhëton drejt Italisë, në Ciari, provincë e Breshias, aty ku kishte hallën e saj. Javët e para pasi Elsa ishte larguar, ata komunikonin me telefon dhe kamera, por këto takime online u rralluan. Në dhjetor të po atij viti, Lorenci shkon te halla e Elsës për ta takuar bashkë me djalin, por zonja Manushaqe I thotë se kur ishin kthyer nga puna, Elsën nuk e kishin gjetur në shtëpi. Për Lorencin gjithçka është një trillim. Ai ka dyshimet e tij për vendndodhjen e bashkëshortes dhe djalit të vogël, por ende asnjë gjurmë të tyren. Prej 1 muaji 35-vjeçarja e ka bllokuar Lorencin në rrjete sociale dhe në telefon, ndërsa ai është i shqetësuar për fatin e djalit të vogël.