Një tjetër person zhduket në mes të Tiranës pa lënë gjurmë, duke alarmuar familjarët e tij dhe policinë. Pjerin Shestani, 41 vjeç, largohet nga banesa në zonën e 21 dhjetorit në kryeqytet. Rreth orës 14:45 ai hap derën e shtëpisë dhe zhduket në drejtim të paditur. Personi i fundit që e ka parë është nëna e tij 82-vjeçare, Ballkize Shestani, ndërkohë që i vëllai, Leonardi ndodhej në punë. Kur u largua ishte i veshur me një palë tuta sportive ngjyrë gri, bluzë të zezë me vija të bardha me kapuç dhe një palë shapka. Momentin e largimit 41-vjeçari nuk kishte as para për të konsumuar ushqime dhe as mjet identifikimi. Pjerini vuan nga probleme të shëndetit mendor dhe trajtohet me qetësuesa nervor, mirëpo familjarët thonë se ai nuk është person i dhunshëm dhe i rrezikshëm për shoqërinë. Për 41-vjeçarin kjo është hera e dytë që largohet nga shtëpia, pasi në shtator 2021 gjatë kohës së karantinës, ai u largua nga banesa dhe një ditë më pas u gjet nga policia e kryeqytetit te zona e Petro Ninit. Sot familja Shestani është e shqetësuar, pasi Pjerini nuk është i zoti që të kujdeset për veten, dhe frika për fatin e tij është e madhe.