Kardiokirurgu shqiptar Enkel Kallushi, i cili prej vitesh ushtron profesionin në Itali, është vlerësuar së fundmi nga mediat italiane si një ndër kirurgët më të spikatur të zemrës. Ai punon në spitalin prestigjioz Ospedale del Cuore “G. Pasquinucci” në Itali, ku ka realizuar mbi një mijë ndërhyrje të suksesshme kardiokirurgjikale. I lindur në Tiranë dhe i diplomuar për Mjekësi në Shqipëri, Kallushi vendosi të vijojë karrierën në Itali që prej vitit 2000, duke u shndërruar sot në një emër të respektuar në fushën e kirurgjisë së zemrës. Mediat italiane e përshkruajnë si mjekun në duart e të cilit kanë kaluar mijëra zemra, falë profesionalizmit dhe përkushtimit të tij të jashtëzakonshëm. Një tjetër histori suksesi që dëshmon se profesionistët shqiptarë po lënë gjurmë të rëndësishme në arenën ndërkombëtare. Për “Rreze Dielli”, në një lidhje direkte nga Italia, kardiokirurgu rrëfen si është të “mbash” mijëra zemra në duar, si dhe shpjegon pse sot po shtohen rastet e atakeve kardiake, çfarë duhet të kenë më shumë në kontroll njerëzit dhe lidhjen mes ushqimit dhe stresit të përditshëm.