Bashkëjetesa në pallat është një nga sfidat më të ndjeshme të jetesës urbane sot, veçanërisht në një qytet të madh si Tirana, ku dhjetëra familje ndajnë të njëjtën hapësirë të përbashkët çdo ditë. Nga pastërtia e shkallëve te funksionimi i ashensorit, nga pagesat e përbashkëta te mirëmbajtja e ambienteve, çdo detaj ndikon drejtpërdrejt në cilësinë e jetesës dhe në marrëdhëniet mes fqinjëve. Shpeshherë, mungesa e komunikimit dhe e përgjegjësisë së përbashkët kthehet në burim konfliktesh: debate për pagesat mujore, pakënaqësi për mirëmbajtjen, probleme me administrimin e fondeve apo me respektimin e rregullave të bashkëjetesës. Në këtë realitet, roli i administratorit të pallatit bëhet thelbësor. Ai nuk është thjesht mbledhësi i kuotave, por ndërmjetësi mes banorëve, organizatori i komunitetit dhe garantuesi i funksionimit normal të hapësirave të përbashkëta. Por sa funksionon realisht ky rol? A janë të ndërgjegjësuar banorët për detyrimet dhe të drejtat e tyre? Dhe si mund të përmirësohet bashkëjetesa në një komunitet ku përgjegjësia është e përbashkët. Në lidhje me këtë problematikë flasim në "Rreze Dielli" me Isidor Koti, administrator pallati.